Diosman asuykuychik

Ñoqaqa manam qonqasqaykichikchu

¿KUYANCHU Diosqa serviqninkunata? Chayna kaptinqa, ¿maynatam kuyan? Chay tapukuykunamanta yachanapaq qawasunchik kikin Jehová Diospa ima nisqanmanta. Bibliantakamam willawanchik imayna sientekusqanta. Qawasun Isaias 49:15 nisqanpi ima niwasqanchikmanta.

Serviqninkunata mayna kuyasqanta qawachinanpaqmi Jehová Diosqa servichikurqa Isaias libropi kaq sumaq rikchanachiykunata. Kikinmi kaynata nin: “¿Ñuñusqan wawata maman qonqarunmanchu? ¿Wachakusqan wawata maman qepanchakurunmanchu?”, nispa. Yaqapaschá piensachwan chay tapuypa kutichiyninqa sutilla kasqanta, manam pi warmipas wawachantaqa qonqarunmanchu, maman atiendenantam imay horapas necesitan. Jehová Diosmi ichaqa chaymantapas astawanraq niyta munarqa.

¿Imanasqam mamakunaqa wawachankuta ñuñunku hinaspa tukuy ima necesitasqankutapas qonku? ¿Waqasqanmanta upallanallanpaqchu? Manam. Lliw mamakunam wawankutaqa mana ‘qepanchanmankuchu’. Mana qepanchanmanchu niq palabrataqa nichwantaqmi hebreo rimaypi “llakipayanmanku” nispa (Exodo 33:19; Isaias 54:10). Chaytaqa nichwantaqmi mana yanapayniyoqta kuyapayanamantapas. Wawachankuta mamakuna llakipayasqanman hina kuyakuyqa manam ancha kanchu.

Llakikunapaq hinataqmi wakin mamakunaqa wawanku ñuñumanta kaptinpas mana llakipayankuchu. Diosmi nin: “Ichapas mamanqa qonqarunman wawanta”, nispa. Kunan tiemponchikpi runakunaqa mana kuyapayakuqmi kanku (2 Timoteo 3:1-5). Wakinpim uyarinchik chayllaraq naceq wawankuta mana atiendeq, maqaq otaq saqeruq warmikunamanta. Isaias 49:15 nisqanmantam Bibliamanta yachaq runa nin: “Mamakunaqa pantaqmi kanku, wakinpiqa wawankuta kuyasqankupas chiriyarunmanmi sasachakuykuna kaptin. Runakuna maynaña kuyakuyniyoq kaspapas pantankum”, nispa.

Diosmi niwanchik: “Ñoqam ichaqa mana qonqasqaykichikchu”, nispa. Kunanqa aswan allintam entiendenchik Isaias 49:15 nisqanpi Jehová Diospa ima niy munasqanmanta. Chaywanmi qawachin pantaq mamakunamantaqa payqa aswan llakipayakuq kasqanta. Pantaq mamaqa qonqarunmanmi wawachanta, Jehová Diosmi ichaqa haykapipas llakipayawasun serviqninkunataqa. Chayraykum hanaypi rimamusqanchik Bibliamanta yachaq runaqa nin enteron Ñawpaq Testamentomantaqa Isaias 49:15 nisqanpi Diospa kuyakuynin aswan sutilla kasqanmanta.

Anchatam kallpanchawanchik Jehová Diospa ‘kuyapayakuq hinaspa llakipayakuq’ kasqanmanta yachasqanchikqa (Lucas 1:78). Kikinmi nin: “Manapunim dejasqaykichu nitaqmi saqesqaykichu”, nispa (Hebreos 13:5). ¿Manachu yachayta munawaq payman astawan imayna asuykuymanta?