Wakchakunapaq sumaq willakuykuna

DIOSPA Palabranmi asegurawanchik: ‘Mana imayoqkunaqa manataqmiriki qonqallasqachu kanqa’, nispa (Salmo 9:18). Diosninchikmantapas ninmi: “Makillaykita kicharispam llapallan kawsaqkunata saksaykachinki”, nispa (Salmo 145:16). Kay nisqanqa manam yanqachu. Tukuy atiyniyoq Diosninchikqa tukuy imatam ruranqa wakchayayta chinkachinanpaq. ¿Imaynata?

Qollqe servichikuymanta yachaysapa warmim nin: “Wakchayaypi kaq nacionkuna yanapasqa kanankupaqqa ‘llakipayakuq runam kamachinan’”. Chaywanmi nichkarqa chay runaqa wakchayayta chinkachiy munaq hinaspa atiyniyoq kananmanta. Enteron pachapim wakchayayqa, chaymi chay kamachiqqa allpantinpi kamachinan, wakin nacionkunapa kapuqninku astawan kaptinpas wakinpañataqmi mana kanchu. Chaymantapas kikillankupaq munaqkunatam chinkachinan. ¿Maypitaq chayna gobiernaqta tarichwan?

Diosmi churinta kachamurqa allin noticiamanta wakchakunaman willananpaq chaymantam Jesusqa rollota kichaykuspam nirqa: ‘Señor Diospa Espiritunmi ñoqapi kachkan. Paymi aceitewan talliwaspan sapaqchawarqa. Wakchakunaman allin noticiata willanaypaq’, nispa (Lucas 4:16-18).

¿Mayqenkunataq chay allin noticiakunaqa?

Diosmi Churinta nombrarqa rey kananpaq, chaymi allin noticia. Achka razonkunaraykum Jesusqa allin kamachikuq: 1) lliw runakunata gobiernananpaq atiyniyoq; 2) wakchakunatam llakipayarqa, chaymi qatiqninkunata yachachirqa paykunata yanapanankupaq; 3) imatapas kikillankupaq munaqkunatam chinkachinqa. Kaykunamantam yachasun.

1. Lliw runakunata gobiernananpaq atiyniyoq Jesusmantam Diospa Palabran nin: ‘Qorqam atiyniyoq kananpaq [. . .] llapallan runakuna, nacionkuna, huk rikchaq rimayniyoqkunapas payta servinankupaq’, nispa (Daniel 7:14). ¡Mayna sumaqmi kanqa allpantinpi chullalla kamachikuq kaptinqa!, manañam allpapi ima kaqtapas qechunakunqakuñachu, aswanqa llapankupaqmi haypanqa imapas. Jesusmi kay Pachata kamachinanmanta nirqa: “Diosmi qowarqa tukuy atiyta hanaq pachapipas, kay pachapipas”, nispa (Mateo 28:18).

2. Wakchakunatam llakipayarqa kay pachapi predicaspan. Ejemplopaq, huk warmim sanoyayta munaspan doctorkunaman rispan qollqenta tukurqa, paymi Jesuspa pachanta llapchaykurqa sanoyayta piensaspan. Payqa 12 watañam flujowan onqospan anemia sutiyoq onqoywanpas karqa. Leypa nisqanman hina pipas chayna onqoqwan llapchachikuqqa millakuypaqmi kanan karqa. Jesusmi ichaqa payta llakipayaspan nirqa: “Mamáy, iñisqaykiraykum allinyarunki, kunanqa hawkallaña pasakuy, manañam kay onqoywanqa ñakarinkiñachu”, nispa (Marcos 5:25-34).

Jesuspa yachachisqanqa atiyniyoqmi runapa sonqonta cambiananpaq, chaynataq llakipayakuq kanankupaqpas. Imaynatam Diospa favorninta tariyman niq runaman Jesus imayna contestasqanpi piensay. Chay runaqa yacharqam runamasin kuyananta, ichaqa Jesustam tapurqa: “¿Pitaq runamasiyqa?”, nispa.

Contestananpaqmi huk rikchanachiyta willarqa. Jerusalenmanta Jerico llaqtaman ripuchkaptin ‘wañuy’ patapiña salteasqa runata Samaria lawmanta huk runa imayna yanapasqanmanta. Huk sacerdotem payta rikuruspan  ladonta pasarurqa, chaynataqmi Leviy castamanta runapas pasarqa. Ichaqa ‘Chaynintataqmi richkarqa Samaria lawmanta kaq runapas, paymi ichaqa asuykuspan llakipayaykurqa’. Heridanta limpiaruspanmi samapakuna wasinman apaspan encargarqa. Chaymantam Jesusqa tapuqnin runata nirqa: “¿Chay kimsan runamantaqa mayqannintaq salteasqapa runamasinqa?”, nispa. Payñataqmi nirqa: “Salteasqa runamanta kuyapayarikuqmi”, nispa. Hinaptinmi Jesusqa nirqa: “Qampas chaynatayá ruramuy”, nispan (Lucas 10:25-37).

Jehová Diospa testigonkunaqa Jesuspa yachachisqanta yachaspankum kallpanchakunku wakchakunata yanapanankupaq. Ejemplopaq, huk libropim Rusia nacionpi yaqa 50 wata qepata onqoywan carcelpi ñakarisqanmantam huk warmi nirqa: “Onqoptiymi Jehová Diospa testigonkuna enfermera hina cuidawarqaku. ¡Mayna allintamá yanapawarqaku!”, nirqataqmi: “Jehová Diospa testigonkunaqa lliw runakunatam yanapanku may nacionniyoq otaq ima religionniyoq kaptinkupas”, nispa.

Ecuador nacionpi qollqemanta llumpayta sasachakuptinkum Ancón llaqtapi Jehová Diospa wakin testigonkuna mana qollqeyoq nitaq llamkayniyoq rikurirqaku. Hinaptinmi huk Testigokuna tantearqaku qollqeta imayna huñunankupaq, chaypaqmi mikuyta rurarqaku hinaspa rantikurqaku lamar qochamanta tutapay hamuq challwirukunaman (waqtanpi fotota qaway). Llapankum congregacionpi kaqkuna yanapakurqaku, warmachakunapas. Chawpi tuta pasaytam yanuyta qallaykurqaku, las cuatro achikyaytaqa listoñam karqa llamkaqkuna botenkuwan kutimuptinku. Chay qollqe huñusqankutam rakirqaku necesitasqankuman hina.

Kay ejemplokunam qawachin runakuna llakipayakuq kanankupaq Jesuspa yachachisqan atiyniyoq kasqanmanta.

3. Runapa imayna kasqanta cambiananpaq atiyniyoq, lliwmi reqsikunchik kikillanchikpaq imatapas munasqanchikta. Chaymantam Biblia nin ‘hucha’ nispa. Apostol Pablopas kaynatam qellqarqa: “Chaynaqa allin rurayta munaptiypas mana allinllamá ñoqapi kachkan”, hinaspam nirqa: “¿pitaq libraykuwanqa?”, nispa (Romanos 7:21-25). Chaytaqa, runakunata huchankumanta Cristorayku Dios librananmantam Pabloqa nichkarqa. Hucharaykumá runaqa kikillanpaq munaq. Ichaqa, ¿imaynataq chaymanta librasqa kasun?

Jesucristo bautizakuruptinmi chaypi kaq runakunaman Juan bautista nirqa: “Qawaychik, paymi Diosmanta Hamuq Carneroqa, wañuspanmi runakunapa huchanta pampachanqa”, nispa (Juan 1:29). Hichpaykamuchkanñam huchankumanta librasqa hinaspa manaña kikillankupaq munaq runakuna Allpantinpi kawsanankupaq (Isaias 11:9). Chaynatam Jesusqa wakchayayta chinkachinqa.

¡Maynatam kusichiwanchik manaña wakchayaypi kawsanamanta yachayqa! Diospa Palabranmi prometewanchik: “Sapakamam uvas plantankupa”, “higos sachankupa llantuyninpi tiyakunqaku. Manaña pipapas manchachisqanmi hawkaña kakunqaku”, nispa (Miqueas 4:4). Kay sumaq rimaykunam qawachin llapanchikpaq allin llamkay, hawkayay hinaspa mana wakchayay tiempo chayamuptin Jehová Dios hatunchasqa kananmanta.