Revistanchikta leeqkunam tapukunku

¿Amirunapaq hinachu kanqa Paraisopi wiñay kawsayqa?

▪ Bibliam niwanchik kay pacha Paraiso kaptin wiñay kawsanapaq (Salmo 37:29; Lucas 23:43). Ichaqa, ¿amirunapaqchu kanman Paraisopi wiñaypaq kawsakuyqa?

Allinmi chayna tapukuyqa. Yachaysapa runakunam yacharunku, aburrisqallaña kaqkunaqa tarikunku: llumpay preocupasqa, llakisqa hinaspa ima peligrokunapipas. Imapaq kawsasqankuta mana yachaq otaq sapa punchaw rurasqankuta amiruqkunataqa manam imapas qokunchu. Ichaqa, ¿amirunapaq hinachu kanqa Paraisopi kawsakuyqa? ¿Sapa punchawchu hina kaqllata rurasun?

Puntataqa kaypim piensana: Jehová Diosmi Bibliapi nichkan wiñay kawsayta qowananchikpaq (Juan 3:16; 2 Timoteo 3:16). Payqa sinchi kuyakuqmi (1 Juan 4:8). Chaymi llumpayta kuyawaspanchik tukuy rikchaq allinkunata qowanchik (Santiago 1:17).

Unanchawaqninchikqa yachanmi allin rurayniyoq kaspa kusisqa kananchikta (Salmo 139:14-16; Eclesiastes 3:12). Paraisopi ima rurasqankupas llapankupa allinninkupaqmi kanqa, manam maquinapa partenkuna hinachu sientekunqaku (Isaias 65:22-24). ¿Amiruwaqchu sumaq ruraykunapi tukuy tiempoykita servichikuspayki?

Chaymantapas, Paraisopi wiñay kawsaytaqa manam lliwmanchu Diosqa qonqa. Churin Jesusta qatipakuqkunallam Paraisopiqa kawsanqaku (Juan 17:3). Kay Pachapi kaspanmi Jesusqa Taytanpa munayninta kusisqa rurarqa. Rimaspa chaynataq ruraspanmi qatiqninkunata yachachirqa ima chaskiymantapas qospa ‘aswan kusisqa’ kanamanta (Hechos 20:35). Paraisopiqa lliw runakunam iskay hatun kamachikuyta kasukuspa Diostawan runamasinkuta kuyanqaku (Mateo 22:36-40). ¿Munawaqchu llamkasqankuwan kusikuq hinaspa kuyakuq runakunawan kawsakuyta? ¿Aburrikuwaqchu chayna amistadkunawan kawsakuspa?

¿Imatawanmi Paraisopi kawsaspa yachasun? Sapa punchawmi imatapas yachana kanqa Diosmanta. Paypa unanchasqankunamantam yachaysapa runakuna achkataña yacharunku (Romanos 1:20). Chayna kaptinpas pisichallam runakunapa yachasqanqa. Yaqa 3.000 wata masnin ñawpaqtaraqmi Diospa unanchasqankunapi piensaspa, Diosman sonqo Jobqa allinta cuentata qokurqa. Nirqam: “Rurasqankunapa wakillanmi. Kay uyarisqanchikqariki upallalla rimarisqapa aschallanmi. Hinaptinqa ¿pitaq entiendenman nisyullay-nisyuta qapariptinqa?”, nispa (Job 26:14).

Wiñaypaq kawsaspapas, manam haykapipas yachayta atisunchu Paymanta hinaspa rurasqankunamanta. Bibliam yachachin, wiñaypaq kawsay munasqanchikta sonqonchikpi Diospa churasqanta. Nintaqmi: “Runaqa manam entiendeyta atinmanchu qallariyninmanta tukuyninkama Diospa rurasqantaqa”, nispa (Eclesiastes 3:10, 11). ¿Amiruwaqchu Unanchaqninchikmanta manaraq yachasqaykikunata astawan yachaspa?

Kunanpas runamasinchikpaq allinkuna ruraypi hinaspa Diosta hatunchaypi ocupasqallaña kaqkunapaqqa manam imapas kanchu aburrisqa kanankupaqqa. Segurom kachkanchik tiemponchikta chaynata servichikuspaqa manam haykapipas aburrikusunchu wiñaypaq kawsaspapas.

[23 kaq paginapi reqsikusqanchikmanta]

Globo terráqueo: cortesía de Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)