“Huk copachatawan tomaykusaq”

ALBERTOM 11 watanpi sinkakuyta qallaykurqa. * Amigonkunawan montepi huñunakuspam televisionpi reqsisqa runakunata qatipakuspanku pukllaqku. Chay runakunaqa manayá ciertopaqchu karqa, tomasqanku tragom ichaqa.

Tonym ichaqa 40 watanpi sinkakuyta qallaykurqa. Qallariypiqa huk-iskay copachallatam tutanpi tomarqa, chaymantañataq pichqa otaq soqta copataña, chaymantaqa manañam musyakurqachu sapa punchaw hayka tomasqantaqa.

Albertom sasachakuyninta atipananpaq kallpanchakurqa, Tonym ichaqa familianpawan amigonkunapa yanapakuyninta mana munarqachu. ¿Imapim tukurqa? Tonym pasaq watakunallapi wañukurqa carronta sinka manejasqanrayku, Albertom ichaqa kawsakuchkanraq pasasqankunata willakunanpaq.

Wakinqa piensankum sapallankupi tomaspanku pitapas mana imanasqankuta, ichaqa manam chaynachu, sinkasqankuqa ayllunkutawan hukkunatapas sasachakuypim churan. * Yaqa llapanpiqa sinkasqankuraykum nanay simiwan rimanku, maqanku, wañuchinku, carronkuwan chocanku hinaspa ima onqoykunawanpas tarikunku. Arí, sinkayqa runakunatam millonnintin qollqeta sapa wata gastachin, familiankutapas sasachakuypim tarichin.

Estados Unidos nacionpi Institutos Nacionales de la Salud nisqanman hinaqa, “manam llapallan sapa kuti tomaqkunachu chay viciowanqa kanku, manataqmi chay viciowan kaqkunapas sapa kutichu tomanku”. Manam llapallankuchu chay viciopiqa kanku, ichaqa mana musyakuspallam llumpayta tomayta qallaykunku. Hukkunaqa wakillanpi tomaspankupas, sinkanankukamam tomanku.

Hinaptinqa, ¿imaynatam yachachwan llumpaytaña tomarusqanchikta? ¿Imaynatam musyakuchwan manaña huk copatawan tomanapaq? (Proverbios 23:29, 30, 35.) Qatiqnin yachachikuykunam kaykunamanta rimachkanqa.

[Willakuykuna]