Diospa Munaychakuyninmanta Jesuspa yachachisqan

‘Llaqtakunapi chaynataq llaqtachakunapipas Diospa munaychakuyninmanta willakustinmi purirqa.’ (LUCAS 8:1.)

JESUSMI nirqa: “Runaqa riman sonqonpi huntallaña kaqkunamantam”, nispa (Mateo 12:34). Arí, imapas aswan munasqanchikkunamantam rimayta munanchik. Chaymi Jesus predicaspanqa, astawan rimarqa Diospa Munaychakuyninmanta.

¿Imataq Diospa Munaychakuyninqa? Diospa churasqan Gobiernom, hinaspa huk reymi kamachiqninqa. Chay gobiernomantam Jesusqa astawan predicarqa, chaytam qawachin 110 kutikama Jesusmanta rimaq tawa librokunapi rikurisqan. ¿Imaynatam astawan yachachwan kay Gobiernomantawan imakuna rurananmantapas? Yachachwanmi Jesuspa rurasqankunamantawan yachachisqankunamanta yachaspa.

¿Pitaq Diospa Munaychakuyninpi reyqa? Jesusmi nirqa payta rey kanapaq Diospuni akllarusqanta. Manam hukkunachu akllarurqa, aswanqa kikin Diosmi.

Jesusqa yacharqam, Bibliapa willakusqanman hina prometesqa Mesias wiñaypaq kamachikuq kananmanta (2 Samuel 7:12-14; Daniel 7:13, 14; Mateo 26:63, 64). Chaymi Mesias kasqanmanta reqsichikuspan, qawachirqa Diospa nombrasqan Rey kasqanta (Juan 4:25, 26). Chayraykum achka kutikunapi nirqa “Munaychakuyniyqa” nispa (Juan 18:36).

Jesusqa rimarqataqmi akllasqa runakunapas paywan kuska kamachimunankumanta (Lucas 22:28-30). Paykunamanta rimaspanmi nirqa aslla kasqankuta. Hinaspam nirqa: “Taytaykichikmi munaychakusqanta qoykusunkichik”, nispa (Lucas 12:32). Bibliapa tukuyninpi kaq librom willakun llapanpiqa 144.000 runakuna chaypaq akllasqa kasqankuta (Apocalipsis 5:9, 10; 14:1).

¿Maypitaq kachkan? Romamanta Poncio Pilato kamachikuqwan rimaspanmi Jesusqa nirqa: “Munaychakuyniyqa manam kay pachamantachu”, nispa (Juan 18:36). Hinaptinqa, Diospa Munaychakuyninqa manam runakunapa yanapakuyninwan kay pachapichu kanqa. Aswanqa hanaq pachapim, Jesusmi achka kutipi nirqa ‘Diospa munaychakuynin’ otaq hanaq pachamanta kamachikuy nispa (Mateo 4:17; 5:3, 10, 19, 20). *

Jesusqa kay pachapi ima rurananta tukuruspanqa, hanaq pachaman rinantam yacharqa. Chaypim akllasqa kaqkunapaq ‘lugarta  allichamunan’ karqa, chaynapi Jesuswan kuska kanankupaq (Juan 14:2, 3).

¿Imapaqmi kanqa? Qatiqninkunata imayna orakunankupaq yachachispanmi, Jesusqa nirqa: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mateo 6:9, 10). Diospa munayninqa ñam hanaq pachapiqa rurakuchkanña, kay Pachapipas Diospa Munaychakuynintakamam rurakunqa. Chaypaqqa enteron pachapim mana allinkunata chinkachinan.

¿Imakunatam kay Pachapi ruranqa? Jesusmi nirqa Diospa Munaychakuynin lliw mana allinkunata chinkachinanmanta. ¿Imaynatam chinkachinqa? Enteron Pachapi lliw mana allin ruraqkunata wañuchispan (Mateo 25:31-34, 46). Hinaptinmi manaña kanqañachu tukuy ima ñakariykuna. Jesuspa nisqanman hinaqa, enteron pachapim kanqa llampu sonqoyoq, allin ruraq, llakipayakuq hinaspa hawkalla kawsakuq runakunalla (Mateo 5:5-9).

Llapallankutaqmi sumaqllaña huertapi kawsakunqaku, Jesusmi nirqa Diospa Munaychakuynin enteron Pachata sumaqyachinanmanta. Huk kutipim Jesuspa waqtanpi warkusqa runa payta mañakurqa munaychakuyninpi kaspan yuyarinanmanta. Jesusñataqmi nirqa paywan paraisopi kananmanta (Lucas 23:42, 43). Arí, Diospa Munaychakuyninmi kay pachata Eden huertata hina sumaq paraisoman tikranqa.

¿Imakunatawantaq runakunapaq ruranqa? Jesusqa manam rimayllachu-rimarqa Diospa Munaychakuynin imakuna rurananmantaqa, rurasqankunawanpas qawachirqam. Ejemplopaq, imaymana onqoykunatam hampirqa, kaymi qawachin rey hina imakuna rurananmanta. Bibliapa  nisqanman hinapas, “Jesusmi purirqa lliw Galilea law llaqtakunapi, huñunakunanku wasikunapi Diospa munaychakusqanmanta allin noticiata willakustin hinaspa tukuy rikchaq onqoyniyoqkunata sanoyachistin” (Mateo 4:23).

Jesusmi huk kutipi nacesqanmantapuni ñawsa runata qawarichirqa (Juan 9:1-7, 32, 33). Huk kutipiñataq millakuypaq leprawan onqoq runata llapchaykuspallan hampirurqa (Marcos 1:40-42). “Sasa rimaq mana uyarikuq runata” aparamuptinkuñataqmi, Jesusqa uyarichirqa hinaspa rimachirqapas (Marcos 7:31-37).

Diospa churasqan Rey Jesuspaqqa, manam sasachu karqa wañuqkunata kawsarichiypas. Bibliaqa willawanchikmi 3 runakunata kawsarichisqanmanta: viudapa sapallan qari wawanta, 12 watanpi kaq sipaschata hinaspa amigon Lazarotapas (Lucas 7:11-15; 8:41-55; Juan 11:38-44).

Jesusqa apostol Juanmanmi revelarqa Diospa Munaychakuyninpi runakuna imayna kanankumanta, nirqam: “Diosqa runakunawanñam yachachkan. Paykunam kanqa runankuna, Diosñataqmi kanqa paykunapa Diosnin. Diosmi pichanqa paykunapa weqenta, manañam kanqachu wañuypas [. . .], waqaypas nitaq nanaypas. Ñawpaq kaqkunaqa pasarunñam”, nispa (Apocalipsis 1:1; 21:3, 4). Piensariy, mayna sumaqchá kanqa mana ñakarispa, mana wañuspa nitaq mana nanaykunawan kawsayqa. Chay punchaw chayaramuptinqa, Jesuspa yachachiwasqanchikman hinam Diospa munaynin rurasqa kanqa kay Pachapipas hanaq pachapi hina.

¿Haykapitaq hamunan karqa? Jesuspa yachachisqanman hinaqa kamachiyninmi qallarinan karqa ima tiempomantapas aswan sasa tiempopa qallarisqanpi. ¿Haykapitaq chay tiempoqa qallaykurqa? Chaymanta musyakunapaqmi Jesusqa imakuna pasananmanta willakurqa: enteron pachapim hatun sasachakuykuna kanan karqa, guerrakuna, muchuykuna, terremotokuna, onqoykuna hinaspa miranantaqmi karqa tukuy mana allin ruraykunapas (Mateo 24:3, 7-12; Lucas 21:10, 11). Jesuspa kay willakusqankuna hinaspa hukkunapas astawanmi qawakurqa 1914 watamantapacha, kay watapim enteron pachapi punta kaq Hatun Guerra apakurqa. ¿Imatam kay qawachiwanchik? Qawachiwanchikmi, Jesusqa hanaq pachapi Reyña kasqanta. Hinaptinqa pisi tiempollañam kachkan Diospa Munaychakuynin kay Pachaman hamunanpaq. *

Chaynaqa, ¿imaynam tarikusunchik Diospa Munaychakuynin chayaramuptin? Chayqa kanqa Jesuspa yachachisqankunata sapakama imayna kasukusqanchikmantam.

[Willakuykuna]