Yanapasun congregacionmanta karunchakuruqkunata
Yanapasun congregacionmanta karunchakuruqkunata
‘Kusikusunchik chinkasqa ovejaytam tariramuni.’ (LUC. 15:6.)
1. ¿Imaynatam Jesucristo qawachirqa michisqan ovejankuna kuyasqanta?
JEHOVÁ DIOSPA piwi Churin Jesusmantam Biblia nin: “Ovejakunapa hatun michiqnin”, nispa (Heb. 13:20). Bibliapa willakusqanman hinam, Jesusqa kay Pachaman hamurqa hinaspam pimantapas allin Michiq kaspan, kallpanchakurqa ‘Israel castamanta chinkasqa ovejakunata’ maskananpaq (Mat. 2:1-6; 15:24). Chaymantapas, imaynam michiqkunapas ovejankurayku vidankutapas qonmanku karqa, chaynam Jesuspas vidanta qorqa ovejakuna hina llampu sonqoyoq runakunapaq (Juan 10:11, 15; 1 Juan 2:1, 2).
2. ¿Imanasqataq wakin iñiqmasinchikkuna congregacionmanta karunchakurunku?
2 Llakikunapaqmi ichaqa, wakin iñiqmasinchikkunam Jesucristopa wañukusqanpi iñichkaspankupas chaynataq Diosman qokuchkaspankupas congregacionmanta karunchakurunku. Ichapas hukmanyasqa kasqan, onqosqan otaq huk sasachakuykunapas, Diosta kusikuywan servisqanta chinkarachin hinaptin congregacionmanta karunchakurun. Ichaqa yuyarinanchikmi; Diospa kanchanpi otaq llaqtanpi kaqkunallam Davidpa qellqasqan Salmo 23 nisqanman hina kusisqa hinaspa hawkalla kanmanku. Chaypim David takispan nirqa: “Dios Taytalláy, qamllam kanki ñoqallaypa michiqnillayqa, manam imapas pisiwanqañachu”, nispa (Sal. 23:1). Arí, Diospa llaqtanpi kaqkunapaqqa manam imapas espiritualpiqa pisinchu, ichaqa manam chaynachu kanku congregacionmanta karunchakuqkunaqa. ¿Pitaq paykunata yanapanman? ¿Imayna yanapanatam necesitanku? ¿Imatam rurachwan congregacionman kutimunankupaq?
¿Pitaq paykunata yanapanman?
3. ¿Imatam rurana congregacionmanta karunchakuruqkunata yanapanapaq, hinaspa imaynatam Jesus rikchanachirqa?
3 Anchatam kallpanchakuna congregacionmanta karunchakuruqkunata yanapanapaqqa (Sal. 100:3). Jesusmi rikchanachispan kaynata nirqa: “Pachak ovejayoq runapa huknin ovejan chullaruptinqa ¿manachum isqon chunka isqonniyoq ovejata saqeykuspan tarimunankama orqokunapi maskamunqa? Payqariki isqon chunka isqonniyoq mana chullaruq ovejakunamantapas mastaqa kusikunqa tarisqan kaqwanmi. Hanaq pachapi kaq Taytaykichikpas manam munanchu hukllanpas kay uchuychakuna chinkananta”, nispa (Mat. 18:12-14). ¿Pitaq yanapanman congregacionmanta karunchakuqkunata?
4, 5. ¿Imaynatam ancianokuna qawananku Jehová Diospa ovejankunata?
4 Ancianokunaqa yanapanmankum congregacionmanta karunchakuqkunataqa, chaypaqqa yuyarinankum karunchakuqkunapas Diospa ovejankuna kasqankuta. Arí, paykunaqa Diospa kuyakuywan michisqan ancha valorniyoq ovejankunam (Sal. 79:13). Kay kuyasqan ovejankunaqa kuyakuywan cuidanatam necesitanku, chaymi ancianokunaqa kuyakuywan qawananku hinaspa paykunapi interesakunanku. Ancianokunapa watukusqankuqa allintam yanapanman, chaynapim congregacionman kutimunankupaq hinaspa iñiyninkupipas kallpanchasqa kanmanku (1 Cor. 8:1).
5 Diospa ovejankunata michiq ancianokunaqa, congregacionmanta karunchakuqkunatam maskananku hinaspa yanapanankupas. Apostol Pablom Efeso llaqtapi ancianokunata yuyarichirqa michiqkuna hina ima ruranankumanta, nirqam: ‘Oveja michiq hinayá cuidaychik llapallan iñiqkunata. Chuya espiritum qamkunata akllasurqankichik [. . .] Jesucristopa yawarninwan rantisqan iñiqkunata cuidanaykichikpaq’, nispa (Hech. 20:28). Chaynallataqmi apostol Pedropas ungido ancianokunata nirqa: ‘Makikichikpi kaq Diospa ovejankunatayá michiychik. Chaytaqa ruraychik Diospa munasqanman hinayá, amayá obligasqa hinachu nitaq qollqeraykuchu. Llamkaychikqa tukuy sonqoykichikwanyá. Amayá michiychikchu munaychakuq hinaqa, aswanqa ejemplonyá kaychik’, nispa (1 Ped. 5:1-3).
6. ¿Imanasqataq ancianokunaqa kunan tiempopi astawan yanapananku Diospa ovejankunata?
6 Ancianokunaqa ‘allin michiq’ Jesustam qatipakunanku (Juan 10:11). Payqa anchatam interesakurqa Diospa ovejankunapi. Chaymi ovejankunata cuiday ancha allin kasqanrayku Pedrota kaynata nirqa: ‘Ovejachaykunatayá nanachikuy’, nispa (leey Juan 21:15-17). Kunan tiempopim Diospa ovejachankunaqa astawan cuidanata necesitanku, Satanasmi llumpayta munachkan Diosta qepanchanankupaq. Payqa runakunapa pantaq kasqankuta hinaspa kay pachapi kaqkunatam servichikun pitapas huchallichinanpaq (1 Juan 2:15-17; 5:19). Iñiyninkupi chiriyaruqkunam astawan peligropi tarikunku, chaymi ‘chuya espiritupa munasqanman hina kawsanankupaq’ yanapakuyta necesitanku (Gal. 5:16-21, 25). Hinaptinqa, ¿imatam ancianokuna ruranmanku paykunata yanapanankupaq? Diostam mañakunanku chuya espiritunta qonanpaq chaynataq allintam Bibliatapas servichikunanku (Pro. 3:5, 6; Luc. 11:13; Heb. 4:12).
7. ¿Imatam ancianokuna ruranku Diospa ovejankunata cuidanankupaq?
7 Ñawpaq Israel llaqtapiqa, tawna hina hatun kaspitam servichikurqaku ovejakunata michinankupaq. Kanchanman haykuspanku otaq lloqsichispankum tawnapa ukunta pasachiqku, chaynatam yupaqku lliw kasqanta yachanankupaq (Lev. 27:32; Miq. 2:12; 7:14). Chaynallataqmi ancianokunapas congregacionpi Diospa ovejankunata allinta reqsinanku hinaspa imayna kasqankumantapas yachananku (tupachiy Proverbios 27:23). Chaymi ancianokunaqa Diospa ovejankunata watukunankupaq anchata kallpanchakunku, chaynapi karunchakuqkunata yanapanankupaq. Jehová Diosmi nirqa ovejankunata kikin maskananmanta hinaspa necesitasqankuman hina cuidananmantapas (Eze. 34:11). Chaymi anchata kusikun ancianokuna Payta qatipakuspanku karunchakuqkunata yanapaptinku.
8. ¿Imakunata ruraspankum ancianokunaqa Diospa ovejankunata yanapanmanku?
8 Iñiqmasinchik onqoruptinqa, huk ancianopa watukusqanqa anchatam kusichinman hinaspa kallpanchanmanpas. Chaynallataqmi iñiyninpi chiriyaruq cristianopas anchata kusikunman ancianokuna watukuspan yanapaptin. Ancianokunaqa leepunmankum Bibliapi wakin textokunata, yachachinmankum revistakunapi huk kaqnin yachachiyninta, willanmankutaqmi huñunakuypi ima yachasqankumanta chaynataq orakunmankum paywanpas. Ninmankutaqmi huñunakuyman riptin wawqe-paninchikkuna ancha kusikunankumantapas (2 Cor. 1:3-7; Sant. 5:13-15). Ancianokunapa watukusqan, telefonowan qayaykusqan otaq cartaykusqankuqa, chiriyaruq iñiqmasinchiktaqa anchatam yanapanman. Chayna rurasqankuqa ancianokunatapas anchatam kusichin.
Llapallanchikmi yanapachwan
9, 10. ¿Imanasqataq ninchikman manam ancianokunallachu congregacionmanta karunchakuqta yanapanan nispa?
9 Kay tiempokunaqa llumpay sasallañam hinaspa llapanchikmi ima rurayniyoqpas kachkanchik, ichapas chayrayku mana cuentata qokunchikchu congregacionmanta pipas karunchakusqanta (Heb. 2:1). Jehová Diosmi ichaqa chay pasasqanmantaqa yachan ovejankunapi interesakusqanrayku. Imaynam ñoqanchikpaqpas cuerponchikpa mayqan partenpas ancha valorniyoq, chaynam Diospaqpas ancha valorniyoq kanku sapakama ovejankunaqa. Chaymi, iñiqmasinchikkunapi llapallanchik cheqapta interesakunanchik hinaspa yanapanakunanchikpas (1 Cor. 12:25). ¿Chaynachu kanki iñiqmasikikunawan?
10 Iñiyninkupi chiriyaruqkunata ancianokuna puntata maskananku hinaspa yanapananku kaptinpas, manam paykunallachu interesakunankuqa. Llapallanchikmi ancianokunata yanapachwan, karunchakuq iñiqmasinchikkunata kallpanchaspa chaynapi congregacionman kaqllamanta hamunankupaq. ¿Imaynatam chayta rurachwan?
11, 12. Congregacionmanta karunchakuqkunata yanapanapaq, ¿ima ruranapaqmi ancianokuna niwanchikman?
11 Iñiyninpi chiriyaruq cristiano yanapasqa kayta munaptinqa, yaqapaschá ancianokunaqa experienciayoq cristianota ninmanku watukuspan Bibliamanta huk kaqnin qellqata estudianankupaq. Chaytaqa ruranku Diosta ‘puntata hina’ kuyananpaqmi (Apo. 2:1, 4). Paytaqa, congregacionmanta karunchakusqan tiempopi mana estudiasqan qellqakunata estudiaymi anchata kallpanchanqa.
12 Paykunata watukunaykipaq ancianokuna nisuptikiqa, Jehová Diosta mañakuy yanapasunaykipaq hinaspa kallpanchakusqaykita bendecinanpaqpas. “Tayta Diospa makinmanyá churay imapas ruray munasqaykikunataqa. Paymi qespichinqa tukuy imapas ruranaykipaq piensasqaykikunataqa.” (Pro. 16:3.) Piensay Bibliapa textonkunapi hinaspa kallpanchaq yachachikuykunapi, chaykunawan iñiqmasikita kallpanchanaykipaq. Yuyaymanay apostol Pablopa allin ejemplonpi (leey Romanos 1:11, 12). Payqa Roma nacionpi cristianokunawanmi tupaykuyta munarqa chuya espiritupa qokuyninta qonanpaq, chaynapi aswan qaqa hina sayanankupaq. Confiarqataqmi paypas kallpanchasqa kananmanta. ¿Manachu ñoqanchikpas chayna kananchik congregacionmanta karunchakuqkunata yanapanapaq?
13. ¿Imamantam rimawaq congregacionmanta karunchakuq iñiqmasinchikwan?
13 Congregacionmanta karunchakuqwan estudiaspaqa allinmi kanman Jehová Diosta imayna reqsisqanmanta tapuyqa. Rimaychik Diosta servispa tukuy pasasqaykichikmanta, yuyarichiytaq huñunakuykunapi, asambleakunapi chaynataq predicacionpi kaspa kusisqa kasqaykichikmanta. Willariytaq Jehová Diosta servispa kusisqa kasqaykimanta (Sant. 4:8). Chaynataq willay serviqninkunaman Jehová Dios tukuy ima qosqanmanta agradecisqa kasqaykita, aswanqa sasachakuypi kaptinchik suyakuyta hinaspa consuelota qowasqanchikmanta (Rom. 15:4; 2 Cor. 1:3, 4).
14, 15. Iñiyninkupi chiriyaruqkunata, ¿ima bendicionkuna chaskisqankumanta yuyarichiytaq allin kanman?
14 Paytaqa yanapanmanmi congregacionmanta manaraq karunchakuchkaspa ima bendicionkuna chaskisqanmanta yuyarichiypas. Yuyarichichwanmi Bibliamanta chaynataq Diospa munayninmanta ñawpaqpi yachasqantapas (Pro. 4:18). Diospa espiritunman hina kawsaptinqa manachá llumpay sasachu karqa tentacionkunata aguantayqa (Gal. 5:22-26). Chaynapim Diosmanpas allin concienciayoq orakurqa, chaynataq ‘mana entiendey atina hawkayaytapas’ tarirqa hinaspa manataq llumpaytaqa ‘preocupakurqachu nitaq llakikurqachu’ (Fili. 4:6, 7). Iñiqmasikiwan rimaspaqa kaykunamanta yuyariy hinaspa sonqomantapuni interesakuy, aswanqa kallpanchay congregacionman kutimunanpaq (leey Filipenses 2:4).
15 Anciano kaspaykiqa, ¿imatam rurawaq iñiyninpi chiriyaruq casarasqa kaqkunata watukuspa? Ichapas yuyarichiwaq Diospa Palabranmanta yachaspanku ñawpaqpi imayna tarikusqankumanta. ¡Mayna admirakuypaqmi karqa cheqapmanta yachasqankuqa! ¡Kaywanmi kusisqa karqaku, librakurqakutaqmi pantay yachaykunamantapas! (Juan 8:32.) ¿Manachu sonqonkupas kusikurqa Jehová Diosmanta, kuyakuyninmanta hinaspa admirakuypaq hamuq tiempopi ruranamanta yachaptinku? (Tupachiy Lucas 24:32.) Yuyarichiytaq Diosman qokuq cristianokunaqa, Dioswan allin amistad kasqanchikmanta chaynataq mañakunanchikpaq favorecesqa kasqanchikmantapas. Chaynataq kallpanchay Diosmanta ‘ancha allin noticia’ uyarisqanta kaqllamanta kasukunanpaq (1 Tim. 1:11).
Kuyasqaykita hinalla qawachiy
16. Congregacionmanta karunchakuruq yanapay ancha allin kasqanmanta willamuy.
16 ¿Allinchu kanman kay consejokuna kasukuyqa? ¡Allinpunim! 12 watanpi predicayta qallariq mozom, 15 watanpi congregacionmanta karunchakururqa. Ichaqa, tiempopa risqanman hinam congregacionman kutimurqa, hinaspam 30 wata masninña precursor hina servichkan. Congregacionman kutimunanpaqqa achkanpim huk anciano yanaparqa. ¡Anchatam agradecekurqa yanapasqanmanta!
17, 18. ¿Imaynam kananchik congregacionmanta karunchakuqkunata yanapanapaq?
17 Congregacionmanta karunchakuqkunata kuyasqanchikmi kallpanchawanchik paykunata yanapanapaq. Jesusmi qatiqninkunata nirqa: “Mosoq kamachikuytam qoykichik, kuyanakuychikyá. Imaynam ñoqa kuyaykichik chaynayá qamkunapas kuyanakuychik. Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:34, 35). Arí, kuyanakusqanchikmi qawachin cheqap cristianokuna kasqanchikta. Chaynaqa, ¿manachu chaynata kuyananchik congregacionmanta karunchakuqkunata? ¡Kuyananchikmi! Ichaqa manam chayllatachu rurananchik yanapanapaqqa, hukkunatapas rurananchikmi.
18 ¿Imayna kananchikmantam rimachkanchik? Kuyapayakuq kaspanchikpas, llakipayakuq, sumaq sonqo, hawkalla hinaspa pacienciakuqmi kananchik. Chaymantapas pampachaqmi kananchik. Pablom kaynata qellqarqa: “Chaynaqa mosoq pachawan pachakuchkaq hinayá allinkunata ruraspa reqsichikuychik llakipayakuspa, sumaq sonqo kaspa, humillakuspa, llampu sonqo kaspa hinaspa pacienciakuspa. Pipapas quejan kaptinqa aguantanakuspayá pampachanakuykuychik, chaynataqa rurankichik qamkunatapas Señor [Jehová] pampachaykususqaykichikman hinam. Tukuymanta llalliqtaqa kuyanakuychikyá, kuyanakuyllam tukuy imatapas sumaqtaqa allinyanachin”, nispa (Col. 3:12-14).
19. ¿Imanasqataq congregacionmanta karunchakuqkunata yanapayqa ancha allin?
19 Qatiqnin estudiopim yachasunchik imanasqa wakin iñiqmasinchik congregacionmanta karunchakusqankuta, yachasuntaqmi paykuna kaqllamanta kutimuptin allin chaskisqa kanankumantapas. Kay estudio hinaspa qatiqnin estudiopas qawachinmi, karunchakuruq ovejachata yanapay ancha allin kasqanta. Kay pachapi runakunaqa apu kayllatam maskachkanku, ichaqa kay pachapi llapallan qorimantapas huk runallapa vidanmi aswan valorniyoqqa. Chayna kasqantam Jesus qawachirqa chinkasqa ovejawan rikchanachisqanpi (Mat. 18:12-14). Kaytaqa amayá haykapipas qonqaychu, chaynataq hinallayá kallpanchakuy Jehová Diospa chinkasqa ovejankunata yanapanaykipaq.
¿Ima niwaqtaq?
• ¿Imatam ancianokuna rurananku congregacionmanta karunchakuqkunapaq?
• ¿Imaynatam llapallanchik yanapanchikman congregacionman manaña hamuqkunata?
• ¿Imayna kaspanchikmi yanapasun congregacionmanta karunchakuqkunata?
[Kay yachachikuypa tapukuyninkuna]
[13 kaq paginapi dibujo]
Ancianokunaqa kallpanchakunkum congregacionmanta karunchakuqkunata kuyakuywan yanapanankupaq