As tiempollapiñam allpa pachaqa suma-sumaq huerta kanqa

“Qamkunaqa kaynatayá mañakuychik: Hanaq pachapi Taytayku, sutiki yupaychasqa kachun, munaychakusqayki hamuchun. Munasqaykiyá rurasqa kachun kay pachapipas hanaq pachapi hina.” (Mateo 6:9, 10)

KAY ancha reqsisqa padrenuestro nisqa oracionpim kusikunapaq suyakuy kachkan runakunapaq.

Kaypim nichkan Diospa munaynin hanaq pachapi hina Allpa pachapipas, Gobiernonwan rurasqa kananmanta. Ichaqa, ¿yachankichu imataq Diospa munaynin Allpapaq kasqanta? Suma-sumaq huertam kanqa (Apocalipsis 21:1-5). Chaynaqa yachasunchikyá, Diospa Gobiernonmanta chaynataq kay Allpanchik suma-sumaq huerta kananmantapas.

Diospa Gobiernonmanta

Gobiernoqa kamachiqniyoqmi, leyniyoqmi hinaspa kamachinanpaq runayoqmi. ¿Chaynachu Diospa Gobiernonqa? Bibliapa nisqantayá qawasunchik.

¿Pikunataq kamachiqnin? Jehová Dios lliw kamachiq kachkaspanpas churin Jesucristotam Gobiernananpaq churan (Isaias 33:22; Mateo 28:18). Taytan kamachiptinmi Jesusqa akllan runakunata, “llapallan llaqtakunamanta, tukuy idioma rimaqkunamanta, ayllukunamanta hinaspa nacionkunamanta” paywan ‘kay pachata gobiernanankupaq’ (Apocalipsis 5:9, 10).

¿Imakunataq kamachikuyninkunaqa? Iskaypi rakisqam kamachikuyninkunaqa kachkan. Hukninmi yachachin imam ruranamanta. Jesusmi nirqa: “‘[Jehová, NM] Diosnikitam  kuyanki tukuy sonqoykiwan, tukuy vidaykiwan hinaspa tukuy yuyaynikiwan’. Kaymi punta kaq hatun kamachikuy. Qatiqninñataqmi: ‘Kuyankim runamasikita kikikita hina’”, nispa (Mateo 22:37-39).

Hukninñataqmi mana ruranapaq kaqmanta. Qawasunchikyá kay textopa nisqanta: “Amayá pantaychikchu, Diospa munaychakusqanmanqa manam yaykunqachu huchapakuypi puriqkunapas, taytacha-mamacha adoraqkunapas, casado kachkaspa hukwan kakuqkunapas nitaq qarimasinwan kaqkunapas nitaq suwakunapas, qollqella kuyaqkunapas, sinkakuqkunapas, cuento qepikunapas nitaq engañakuqkunapas” (1 Corintios 6:9, 10).

¿Pikunatataq kamachinqa? Jesusmi runankunata rikchanachin ovejaman: “Vozniyta uyarinqaku, chaynapim kanqa chulla kanchallaña hinaspa chulla michiqllaña”, nispa (Juan 10:16). Chay gobiernopa runankuna kanapaqqa, manam Jesuspim iñini niyllachu aswanqa kasukuymi. Jesusmi nirqa: ‘Manam, ‘¡Señorlláy, Señorlláy!’ nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam’, nispa (Mateo 7:21).

Chaymi, runankunapas Jesus hina Jehová Diospa sutinta hatunchanku hinaspa respetanku (Juan 17:26). Kasukunkutaqmi ‘Diospa munaychakusqanmanta kay allin noticiata’ runakunaman yachachispanku (Mateo 24:14; 28:19, 20). Chaynallataqmi kikinkupurapas kuyanakunku (Juan 13:35).

Kay pacha purmachiqkunata chinkachiq gobierno

Diospa Gobiernonqa ñam mana allin runakunata castigananpaq hichpaykamuchkanña. ¿Imaynanpitaq chaynata ninchik? Iskay waranqa wata ñawpaqtaraqmi Jesus nirqa ‘Diospa gobiernon hichpamuptin’ tukuy imakuna pasananmanta (Lucas 21:31). Kay revistapi yachamusqanchikman hinam chay tukuy imaqa pasachkanña allpantinpi.

¿Chaymantaqa imataq kanqa? Jesusmi nin: ‘Llumpa-llumpay ñakariy punchawkunam kanqa, manam chaynaqa Dios kay pachata unanchasqanmantapunipas kunankama karqachu, manataqmi chaynaqa kanqachu qepa punchawkunapipas’, nispa (Mateo 24:21). Jesusqa nichkarqa manam runakunapa guerranmantachu, Diospa piñakuynin punchawpi ‘kay pachata chinkachiqkunata [otaq purmachiqkunata] chinkachinanmantam’ (Apocalipsis 11:18). Kikillanpaq munaq mana allin runakunaqa ‘kay pachamanta chinkachisqam kanqaku’. Diospa munasqanman hina kawsaqkunam ichaqa ‘kay pachapi hinalla takyanqaku’ (Proverbios 2:21, 22).

¿Jehová Diosqa derechonpichu kachkan kaynata rurananpaq? Arí. Piensariy, qam kawaq iskay-kimsa altosniyoq wasipa dueñon. Hinaspa arriendakuwaq, hinaptin chaypi yachapakuqkuna kanman wakinqa respetakuq hinaspa arriendotapas pagakuq, wakinñataq chaqwalla ruraq mana reqsikuq arriendotapas mana pagakuq. Rimapayaptikipas manataq cambianchu. ¿Derechoykipichu kawaq chay runata wasikimanta qarqonaykipaq?

Jehová Diosmi Allpa pachata unancharqa chaynataq tukuy imatapas, chaymi Paylla tantean pikunalla allpapi yachananta (Apocalipsis 4:11). Jehová Diosmi tantearun kamachikuyninkunata mana kasukuq hinaspa runamasintapas mana respetaqkunata chinkachinanpaq (Salmo 37:9-11).

Allpa pachata suma-sumaq huertaman tikrachiq Gobierno

Kamachinanpaq Diospa nombrasqan Jesucristom runakunata gobiernanqa. Chaytam Jesus nirqa: ‘Tukuy imapa mosoqyanan tiempo’, nispan (Mateo 19:28). Chay Gobiernopiqa ¿imaynataq kawsakuy kanqa? Qawasunyá Bibliapa willakusqanta:

Salmo 46:9: ‘[Diosmi] guerrakunata tanichinqa. Kay pachapa cantonkama’.

 Isaias 35:1: “Chunniq sitiom kusikunqa. Chaki allpam anchata kusikunqa. Purun waytakuna hinam waytanqa”.

Isaias 65:21-23: “Akllakusqaykunaqa llamkasqankunapa ruruntam horqonqa. Llamkanqakupas manañam yanqapaqchu. Churinkupas manañam nacenqaku desgraciapaqchu”.

Juan 5:28, 29: “Huk punchawmi Diospa Churinpa qayasqanta uyarispanku llapallan wañuqkuna kawsarimunqaku”.

Apocalipsis 21:4: “Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas”.

Imaynanpitaq creechwan

¿Creenkichu Bibliapa nisqanpi? Bibliaqa willakurqañam achkaq runakuna mana creenanmanta. “Qepa punchawkunatam hamunqa burlakuqkuna [. . .]. Paykunam ninqaku: Cristom hamunanpaq prometekurqa ¿maytaq hamunchu? Abuelonchikkunapa wañukusqanmantaraqmi tukuy imapas hina kaqlla kachkan, chaynaqa kachkan kay pachata unanchay qallarisqanmantaraqmi”, nispa (2 Pedro 3:3, 4). Chayna piensaq runakunaqa engañakuchkankum. Qatiqninpim Bibliapa nisqanman hina yachasunchik tawa willakuymanta:

(1) Ñawpa tiempopipas Diosqa mana allin runakunatam Allpa pachamanta chinkachirqaña. Chaymi karqa Noeypa tiemponpi Sinchi para (2 Pedro 3:5-7).

(2) Ñawpa tiempomantaraqmi Bibliaqa willakurqa kay tiemponchikpi imakuna pasananmanta.

(3) Manam ‘tukuy imapas hina kaqllachu kachkan,[. . .] kay pachata unanchay qallarisqanmantaqa’. Chaytaqa musyanchik runakuna mana allinllapiña kawsasqankuwanmi hinaspa Allpa pachatapas qachachasqankuwanmi.

(4) Diospa Gobiernonmanta ‘kay allin noticiam’ willakuchkan Allpantinpi, chaymi qawachin ‘kay tiempo tukunanta’ (Mateo 24:14).

¿Munawaqchu astawan yachayta Bibliapa willakusqanmanta? Jehová Diospa testigonkunawan Bibliata estudiay. Chaywanmi yachanki Diospa Gobiernonpi wiñaypaq kawsanaykipaq (Juan 17:3). Kusikunapaq allin tiempom hichpaykamuchkanña. Allpa pachaqa ñam suma-sumaq huertaña kanqa. ¿Qamqa yaqachum chaypi kanki?

[5 kaq paginapi suti rikuylla kaq willakuy]

Tukuy imapas hina kaqllam kachkan, niqkunaqa engañakuchkankum

[6 kaq paginapi dibujo]

Qampas yaqachum ¿kaypi kanki?