Amayá saqesunchu qallariypi kuyakuyninchiktaqa

“Kapusuqnikitayá takyachiy.” (APO. 3:11.)

1, 2. ¿Imaynam sientekurqanki Diosmanta lliw yachasqaykikuna cheqap kasqanta entienderuspayki?

¿YUYACHKANKICHU haykapitaq chayllaraq uyarirqanki kasukuqkunaman sumaq suyakuymanta Jehová Dios prometesqanta? Sichu huk religionpi karqanki, ¿imaynataq tarikurqanki Diospa munayninmanta Bibliawan willasuptiki, otaq sasa entiendenaman rikchakuq yachachikuykunata entiendechisuptiki? Ichapas cuentata qokurqanki engañasqa kasqaykimanta. Ichaqa, ¡maynatachá kusikurqanki cheqapmanta yacharuspaykiqa! Cristiano tayta-mamaykipa uywasqan kaspaykiqa, ¿yuyachkankichu imaynam sientekurqanki Jehová Diosmanta lliw yachasqayki cheqap kasqanta entienderuspayki, hinaspa paypa munasqanman hinaña kawsanaykipaq tantearuspaykipas? (Rom. 12:2.)

² Iñiqmasikikunaqa nisunkichá cheqap yachasqankumanta kusisqa kasqankuta, Jehová Dioswan allin kasqankumanta hinaspa llaqtanman pusamusqanmanta agradecekusqankutapas (Juan 6:44). Kusisqa kasqankum kallpancharqa  lliw runakunaman yachasqankumanta willakunankupaq. ¿Chaynachu qampas tarikurqanki?

3. ¿Imam pasachkarqa Jesuspa nisqanman hina Efeso llaqtapi congregacionwan?

³ Efeso llaqtapi congregacionman willasqanpim, Jesucristo qawachirqa allin kayniyoq kasqankumanta hinaspa Dios kuyayninku chiriyasqanmantapas. Nirqam: “Ñoqaqa yachanim tukuy rurasqaykitaqa, yachanitaqmi llumpa-llumpayta llamkaspa pacienciayoq kasqaykitapas chaynataq mana allin ruraqkunataqa mana aguantay atisqaykitapas. ‘Apostolmi kani’ niqkunatapas pruebaspam yacharurqanki llulla kasqankuta. Paykunaqa manam apostolkunachu karqa. Pacienciawanmi ñakarirqanki hinaspam ñoqarayku llumpa-llumpayta llamkarqanki mana pisipaspa. Ichaqa kaymi contraykipi kachkan: Manañam puntata hinañachu kuyawanki”, nispa (Apo. 2:2-4).

4. Efeso congregacionman Jesuspa nisqan, ¿imanasqam allinpuni kunan tiemponchikpaq?

⁴ Punta pachak watapi Efeso congregacionman chaynataq huk congregacionkunamanpas Jesuspa consejokuna qosqanqa, ancha allinmi karqa kunan tiempokunapi hanaq pachaman riy suyaqkunapaqpas 1914 watamanta sasachakuykunapi tarikusqankurayku (Apo. 1:10). Yaqapaschá kunan tiempopi cristianokunapas ‘manaña puntata hinañachu kuyanku’ Jehová Diosta hinaspa cheqap yachasqankutapas. Chaynaqa, ¿imaynatam kallpanchachwan qallariypi kuyayninchikta chaynataq tukuy sonqomanta Dios servisqanchiktapas? Cristiano kasqanchikmanta tukuy pasasqanchikta yuyarispa chaynataq chaykunapi yuyaymanaspapas, qatiqninpim kaykunamanta yachasunchik.

¿Imataq yanapasurqanki yachasqaykikuna cheqap kasqanmanta?

5, 6. a) ¿Imamantam sapakama seguro kananchik? b) ¿Imanasqataq creerqanki Jehová Diospa testigonkuna cheqapmanta yachachisqankuta? c) ¿Imataq cristianota yanapanman qallariypi hina kuyakuyniyoq kananpaq?

⁵ Vidanchikta Diosman manaraq qochkaspam, seguro kananchik paypa munasqanman hina ‘allin ruraymanta, imam agradonpaq kasqanmanta hinaspa imam allinpuni kasqanmantapas’ (Rom. 12:1, 2). Chaypaqqa, Bibliapa cheqap yachachisqantam entiendenanchik. Jehová Diospa testigonkunapa yachachisqan cheqap kasqanmanta, runakunapa imanasqa creesqankuqa manam chaynallachu. Wakinqa creerqaku Diospa sutinta Bibliapi leespanku otaq wañuqkunapa imayna kasqankumanta yachaspanku (Sal. 83:18, NM; Ecl. 9:5, 10). Hukkunañataq, Diospa llaqtanpi kuyanakuy kasqanta qawaspanku (Juan 13:34, 35). Wakinñataqmi, cristianokunata politicakunapi hinaspa guerrakunapipas mana chaqrukusqankuta  qawaspanku (Isa. 2:4; Juan 6:15; 17:14-16).

⁶ Chaykunata hinaspa huk ruraykunatapas qawasqankuraykum achka cristianokunapa Dios kuyayninku qallarirqa. Tiempota qokuspa yuyariy imanasqam seguro karqanki cheqap tarisqaykimanta. Jehová Diosta imanasqa kuyasqayki hinaspa confiasqaykiqa manam chaynallachu huk iñiqmasikipawanqa, llapallanchikmi sapakama kanchik. Chaykunaqa hinallachá qampaqqa kunan tiempopipas allin kachkan qallariyninpi hina, cheqap kaqkunaqa manam cambianchu. Chaynaqa yuyariy, imanasqa creesqaykimanta hinaspa imayna tarikusqaykimantapas, kaykunam yanapasunki qallariypi hina kuyakuyniyoq kanaykipaq (leey Salmo 119:151, 152; 143:5).

Qallariypi kuyakuyninchikta wiñachisun

7. ¿Imanasqataq cristianoqa qallariypi kuyakuyninta kallpanchanan, hinaspa imataq yanapasunki chayta ruranaykipaq?

⁷ Vidanchikqa imakunapipas cambiarunchá Jehová Diosman qokusqanchik tiempomantaqa. Chaynataq tiempopa risqanman hinam, qallariypi kuyakuyninchiktapas kallpanchananchik karqa sasachakuykunata atipanapaq. Chaykunapim Jehová Diospa yanapakuyninta qawarqanchik (1 Cor. 10:13). Chaynatam watan-watan ancha allin experienciakunata tarinchik. ¿Imanasqa? Kaykunam qallariypi kuyakuyninchik yapakunanpaq yanapan. Chaymanta, yanapawanchiktaqmi imam Diospa agradonpaq kasqanmanta seguro kananchikpaqpas (Jos. 23:14; Sal. 34:8).

8. ¿Imatam Jehová Dios nirqa Moisesta, hinaspa imaynatam Diosta astawan reqsirqaku israelitakuna?

⁸ Ejemplopaq, piensarisunchik israelitakuna Egiptopi ñakarichisqa kachkaptinku horqonanpaq Jehová Diospa nisqanpi. Paymi Moisesta kaynata nirqa: “Ñoqam kasaq imapas rurasqa kananpaq”, nispa (Exo. 3:7, 8, 13, 14, NM). Kaywanqa Jehová Diosmi llaqtanta nichkarqa librananrayku imatapas rurananmanta. Egiptomanta librasqa kasqankumanta tukuy ima pasasqankunam israelitakunata qawachirqa Jehová Dios Tukuy Atiyniyoq, Juezninku, Llaqtan Pusaq, Libraq, Guerrakunapi Peleaq hinaspa Qokuq kasqantapas (Exo. 12:12; 13:21; 14:24-31; 16:4; Neh. 9:9-15).

9, 10. ¿Imakuna pasasqanchikmi Diosta astawan reqsichiwanchik, hinaspa imanasqam allin kanman yuyariyqa?

⁹ Arí, qampa pasasqaykiqa manam chaynallachu israelitakunapa pasasqanwanqa. Ichaqa vidaykipi tukuy imaymana pasasqaykiqa yanapasurqankichá Dios cuidasusqaykimanta entiendenaykipaq hinaspa iñiynikitapas kallpancharqachá. Ichapas Jehová Diosqa qampaq karqa imapas Qosuqniki, Consuelasuqniki otaq Yachachisuqnikipas (leey Isaias 30:20, 21). Ichapas sutillata musyakurqanki mañakusqaykimanta mayqanpas kutichisqa kasqanta. Otaq llumpay sasachakuypi tarikuspayki huk iñiqmasinchikpa yanapayninta chaskirqanki otaq Bibliata estudiaspaykipas sasachakuynikipaq yanapayta tarirqanki.

¹⁰ Imapas pasasqaykimanta willakuptikiqa wakinqa manapaschá admirakunqakuchu. Arí, manataqmá ima milagropas karqachu. Qampaqmi ichaqa ancha valorniyoq, chaykunam yuyachisunki necesitasqayki tiempopi Jehová Dios yanapasusqaykita. Piensariy hayka wataña Dios servisqaykita. ¿Yuyachkankichu Jehová Diospa imayna cuidasusqaykita? Chayna kaptinqa, yuyariy chay tiempokunata hinaspa imayna sientikusqaykitapas. Chaynatam kaqllamanta yuyarinki Dios kuyasqaykita. Lliw pasasqaykikunata chaninchay hinaspa yuyaymanay chaykunapi, chaymi yanapasunki Jehová Dios kuyasusqaykita mana qonqanaykipaq. Manam pipas chaytaqa qechusunkichu.

Ancha allinmi imayna kasqanchikta qawakuyqa

11, 12. Cristianopa cheqap yachachikuykunata kuyasqan chiriyaruptinqa, ¿imanasqataq chayna kanman, hinaspa ima consejotam Jesus qorqa?

¹¹ Diosta hinaspa cheqap yachachikuyta kuyasqayki chiriyaruptinqa, manam piensanaykichu Dios cambiarusqantaqa. Payqa manam  cambianchu (Mal. 3:6; Sant. 1:17). Payqa puntata hinam kunanpas qanmanta interesakun. Hinaptinqa, ¿imataq cambiarunman karqa Dioswan allin amistadnikita? Ichapas sasachakuykuna hinaspa llakikuykuna kaptin, manaña sonqomanta orakunkiñachu nitaq Bibliata estudiaspapas yuyaymanankiñachu. Manapaschá predicacionmanpas anchataqa lloqsinkiñachu nitaq lliw huñunakuymanpas rinkiñachu (2 Cor. 13:5).

¹² Ichapas chayqa mana pasasunkichu, pasasuptikiqa ¿imanasqataq chayna tarikunki? Ichapas, sanolla kawsakuyta munasqayki otaq aylluykita atiendey munasqaykipas hukmanyarachin rikchan-rikchanlla Diospa munayninta kay tukupay tiempopi ruranaykita. Jesusmi qatiqninkunata nirqa: “Allintayá qawakuychik, yanqañataqmi viciokunapi, machakuykunapi hinaspa kay pachapi imapas kaqkunapi afanakuchkaqta qonqayllamanta chay punchawkuna tariramusunkichikman. Kay pachapi llapallan runakunataqa toqlla hinam qonqayllamanta hapiramunqa. Listolla kaspayá tukuy tiempopi Diosta mañakuychik tukuy kaykuna hamuqmanta lluptinaykichikpaq”, nispa (Luc. 21:34-36).

13. ¿Imawanmi Santiago tupachirqa Diospa Palabranta?

¹³ Santiagom iñiqmasinkunaman qellqaspa kallpancharqa, Bibliawan yanapachikuspa imayna kasqankuta qawakunankupaq. Paymi nirqa: “Qamkunaqa uyarisqaykichikman hinayá ruraychik, uyariqlla kaspaqa kikikichiktam engañakuchkankichik. Uyarichkaspan mana kasukuq runaqa espejopi uyan qawakuqmanmi rikchakun. Imaynam kasqanta qawakuruspanmi pasakuspanñataq chaylla qonqarun imaynam kasqanta. Ichaqa librawaqninchik alli-allin leypi yuyaymanaqqa hinaspa mana qonqaspa kasukuqqa mayna kusisqam kanqa tukuy ima rurasqanpi”, nispa (Sant. 1:22-25).

14, 15. a) ¿Imaynatam Biblia yanapawanchikman espiritualpi puntarinapaq? b) ¿Imakunapim allinta yuyaymananchikman?

¹⁴ Huk runaqa espejotam servichikunman imayna kasqanta qawakunanpaq, chaynapi allichakunanpaqpas. Ejemplopaq, huk runa corbatan tikrasqa kasqanta qawakuspanqa allichanqachá, chaynataq huk warmipas chukchan mana ñaqchasqa kasqanta qawakuspanqa allichakunqachá. Chaynallataqmi Bibliapas qawachiwanchik imayna kasqanchikta. Bibliapa nisqanman hina imayna kasqanchikta qawakuspanchikmi, espejota hina servichikuchkanchik. Ichaqa, ¿imapaqmi espejota servichikuchwan mana allin kasqanchikta qawakuspa mana allichakunapaqqa? Chaynallataqmi ñoqanchikpas, ‘alli-allin leyninpi’ imapas Diospa niwasqanchikta kasukunanchik. Sichu Jehová Diosta chaynataq cheqap yachachikuytapas qallariypi hina manaña kuyaspanchikqa, kay tapukuykunata rurakusun: “¿Ima sasachakuykunatam pasachkani, hinaspa imaynam chaykunawan kachkani? ¿Imaynam ñawpaqpi karqani? ¿Imapim cambiaruni?”, nispa. Kayna tapukusqanchikwan pantasqanchikta musyakuspaqa, amayá qonqarusunchu. Kallpanchakusunyá chaylla allichanapaq (Heb. 12:12, 13).

¹⁵ Kaynata tapukuspa yuyaymanasqanchikqa yanapawasuntaqmi espiritualpi puntarispa cristiano kasqanchikpi imakunatapas  haypananchikpaq. Chuya espiritunwan Dios yanapaptinmi apostol Pablo consejarqa illaqmasin Timoteota aswan allinta Diosmanta yachachinanpaq, nirqam: “Chaytaqa sonqoykipiyá allinta takyachiy, chaynapim llapallanku qawanqaku imaynam aswan-aswan ñawpaqman risqaykita”, nispa. Ñoqanchikpas Bibliawan yanapachikuspam yuyaymanananchik, chaynapi imakunapi cambianapaqpas (1 Tim. 4:15).

16. Bibliata servichikuspa imayna kasqanchikta qawakuspaqa, ¿imatam mana ruranachu?

¹⁶ Imayna kasqaykita qawakuspaqa yaqapaschá imapipas mana allin rurasqaykita musyakunki, ichaqa amayá chaywanqa hukmanyaychu. Chaytaqa ruranchik imakunapipas pantasqanchikta musyakuspa allin kaqtaña ruranapaqmi. Satanasqa munanmi imapipas pantasqanchikwan mana imapaq valeq kasqanchik piensananchikta. Ñawpaq tiempopipas huk runam nirqa Diosta servinanchikpaq kallpanchakusqanchikta Dios mana allin qawasqanta (Job 15:15, 16; 22:3). Chayqa llullam, Jesuspas chayna kasqantam qawachirqa. Jehová Diosqa serviqninkunapa rurasqankutaqa chaninchanmi (leey Mateo 10:29-31). Pantaq kasqaykimanta yachasqaykim, astawan kallpanchasunayki humilde kaspa Jehová Diospa yanapakuyninwan imapipas allinyanaykipaq (2 Cor. 12:7-10). Yuyaq kasqayki otaq onqosqayki harkasuptikiqa, imapas ruray atisqaykipi tanteakuy, ichaqa ama kuyakuynikita chiriyachiychu.

Imamantapas agradecekunapaqqa kachkanmi

17, 18. ¿Ima bendicionkunam kanqa qallariypi kuyakuyninkuta astawan allinyachiqkunapaq?

¹⁷ Diosta qallariypi kuyasqayki aswan allin kaptinqa bendicionkunatam chaskinki. Diostam astawan reqsinki hinaspa agradecesqataq kanki yanapasusqaykimanta (leey Proverbios 2:1-9; 3:5, 6). Salmos librom niwanchik Jehová Diospa kamachisqankunata respetaqkunaqa “hatun premioyoqmi” kanqaku, hinaspa nintaqmi “kamachikuyninkunaqa mayna sumaqllaña confiakunapaqmi” hinaspa ‘mana yachaqman yachay qoykuqraqmi’, nispa. Chaymantapas ninmi: “¡Mayna kusisqam Tayta Diospa munallasqanman hina kawsaqkunaqa!”, nispa (Sal. 19:7, 11; 119:1).

¹⁸ Arí, imamantapas agradecekunanchikqa kachkanmi. Ejemplopaq, yachanchikmi imanasqa sasachakuykuna kasqanmanta hinaspa Jehová Dios espiritualpi yanapawasqanchiktapas. Chaynataq, pay munaptinmi llaqtanpi kachkanchik hinaspa paypa Testigonpas kanchik. Piensariy bendicionkuna chaskisqaykipi. Llapallanta yupaptikiqa achkallañachá kachkan. Allinmi kanman wakin kutikunapi chay ruraynikiqa, chaynapim Bibliapa nisqanman hina ‘kapusuqnikita takyachinki’ (Apo. 3:11).

19. Jehová Dioswan amistadninchikpi yuyaymanaspapas, ¿imatam rurananchik iñiyninchikpi allin kanapaq?

¹⁹ Tiempopa risqanman hina iñiyniki yapakusqanpi yuyaymanasqaykim yanapasunki ‘kapusuqnikita [allinta] takyachinaykipaq’. Ichaqa manam chayllatachu ruranayki. Kay revistaqa achka kutipim niwanchik Jehová Dioswan amistadninchik allin kananpaqqa, kaykunatapas ruranamanta: orakuna, kusisqa predicana, huñunakuykunaman rina hinaspa chaypipas rimanataqmi. Kaykunata ruraspaqa, qallariypi kuyakuynikitam astawan kallpanchanki (Efe. 5:10; 1 Ped. 3:15; Jud. 20, 21).

¿Imatam kutichiwaq?

• ¿Imaynatam yanapawasun Jehová Diosta imanasqa kuyasqanchikmanta yuyaymanay?

• ¿Imamantam seguro kasunchik Jehová Dios kunankama yanapawasqanchikpi yuyaymanaspaqa?

• Imayna kasqanchikmanta yuyaymanayninchik, ¿imatam qawachiwasun Dios kuyasqanchikmanta?

[Kay yachachikuypa tapukuyninkuna]

[29 kaq paginapi dibujo]

¿Imanasqataq creerqanki cheqap yachay tarisqaykimanta?

[31 kaq paginapi dibujo]

¿Musyakunkichu imapipas cambianaykita?