Santa cenata Jesus qallarichiptin 70 qatiqninkuna paywan mana kasqankuraykuqa manam nichwanchu Jesusta saqirusqankutaqa utaq paypa chaskisqan manaña kasqankutaqa. Chay kutipiqa apostolninkunallawanmi kayta munarqa.

12 apostolninkunapas chaynataq 70 qatiqninkunapas Jesuspa chaskisqanmi karqaku. Payqa llapallan qatiqninkunamantam 12 qarikunata akllarqa. Paykunatam suticharqa “apostolkuna” nispa (Luc. 6:​12-16). Jesusqa Galileapim kachkarqa 12 apostolninkunata huñusqan kutipiqa, ‘paykunatam kacharqa Diospa gobiernonmanta willakunankupaq hinaspa runakunata sanoyachimunankupaq’ (Luc. 9:​1-6). Chaymantañataqmi Judeapi kachkaspan “70 runakunata akllarqa, hinaspam iska-iskaytakama ñawpachirqa” (Luc. 9:51; 10:1). Chaymi may llaqtapipas Diosmanta willakusqankupiqa Jesuspa qatiqninkunaqa karqa.

Jesuspa qatiqnin kanankupaq tantiakuq judiokunaqa sapa watam pascua fiestataqa ruwaqku. Chaytaqa yaqapaschá familiankuwan kuska ruwaqku (Ex. 12:​6-11, 17-20). Jesusqa manaraq wañukuchkaspanmi Jerusalenman apostolninkunapiwan rirqa. Ichaqa manamá Judeapi, Galileapi hinaspa Pereapi lliw qatiqninkunatachu nirqa paywan kuska pascuata ruwanankupaqqa. Yaqachusmi chay kutipiqa apostolninkunallawan kayta munarqa. Chayraykum nirqa: “Kay pascua mikuyta qamkunawan mikuykuytam anchallataña munarqani manaraq ñakarichkaspay”, nispa (Luc. 22:15).

¿Imanasqataq Jesusqa paykunallawan kayta munarqa? Ñamá “llapa runakunapa huchanta pampachaq Diospa malta carneronqa” wañukunanpaqña kachkarqa (Juan 1:29). Jesusqa Jerusalenpimá wañukunan karqa. Chaypim ñawpaqmantaraq Diospaq animalkunata kañaqku. Pascuapi malta carnerota mikusqankum Israel runakunata yuyarichiq Egipto nacionmanta Diospa librasqanta. Jesuspa wañukusqanwanmi ichaqa llapallanchik huchamantawan wañuymanta librasqa kananchik karqa (1 Cor. 5:​7, 8). Jesus wañukusqanraykum 12 apostolkunaqa iñiqkunapa cimienton hina kananku karqa (Efes. 2:​20-22). Apocalipsis qillqapim willawanchik Jerusalen chuya llaqtapa murallankuna ‘12 rumikunawan cimientasqa’ kasqanmanta, chay rumikunapim qillqasqa kachkan “malta carneropa 12 apostolninkunapa sutin” (Apoc. 21:​10-14). Arí, Diospa munaynin cumplikunanpaqmi 12 apostolkunaqa astawan yanapakunanku karqa. Chayraykuchá Jesusqa ultimo pascua ruwasqanpi hinaspa chay ratollanman santa cenata qallarichisqanpi apostolninkuna paywan kananta munarqa.

70 qatiqninkunawan wakin qatiqninkunaqa manam chay kutipiqa Jesuswan kuskachu karqaku. Chaywanpas llapallan qatiqninkunatam santa cenata qallarichisqanqa yanapanan karqa. ¿Imanasqa? Llapallan hanaq pachapaq kaqkunam Jesuswan kamachinankupaq contrato ruwasqanpa parten kananku karqa, chay contratomantam Jesus rimarqa apostolninkunawan huñunakusqan tuta (Luc. 22:​29, 30).