PASAQ watakunata Indonesia nacionpi Sangir Besar islaman rispaykiqa playapim tupawaq karqa kimsa warmi iñiqmasinchikkunawan. Chay islapiqa chay iñiqmasinchikkunataqa riqsinku bibliamanta yachachisqankuwanmi, ichaqa playapiqa manam Diosmantachu willakuqku. Chaynaqa, ¿imatataq ruwaqku?

Paykunaqa lamar qucha patanman rispankum pelota sayay rumikunata hurquqku, hinaspam hanayniqchaman apaspanku sillapi tiyaykuspa martillowan ñutupaqku yaqa runtu sayay taksachakunallata. Chaymantam, chay takapasqanku rumita baldekunaman hinaruspa wasinkuman apaqku escalerakunata subisparaq, hinaspam chay ñutupasqanku rumita costalpi huñuqku. Chay huñusqanku rumitam camionkuna hamuspa rantiq. Chay ñutusqa rumikunataqa carreterakunata ruwanankupaqmi servichikuqku.

Chay rumita huñuq iñiqmasinchikkunamanta hukninmi Hulda. Payqa mas tiempom llamkaq rumikuna huñuypi. Rumikunata rantikusqan qullqichawanmi familianta yanapaq. Chaymantapas munarqam tablet rantiyta, chaynapi JW Library^® nisqanpi yachachikuykunata chaylla tarinanpaq. Huldaqa yacharqam chaypi videokunaqa hinaspa yachachikuykunaqa Diosmanta aswan allin willakuq kananpaq hinaspa bibliatapas aswan allinta entiendenanpaq yanapananmanta.

Killa partenmi rumikuna huñuypi sapa temprano llamkarqa iskay hora mastaraq. Chay ñutusqan rumitam taksa camion huntata huñururqa. Chay rantikusqanwanmi tabletta rantirurqa.

Huldam nirqa: “Achka rumita ñutusqayraykum llumpay pisipasqa hinaspa nanapay-nanapay tarikurqani. Tabletta rantiruspaymi ichaqa kusikuymanta nanayniytapas qunqarusqani. Cuentatam qukururqani chay tabletwan aswan allinta Diosmanta willakunaymanta chaynataq huñunakuypaqpas aswan allinta preparakunaymanta”, nispa. Chaymantapas Huldaqa willakurqam coronavirus unquy qallaykuptin chay tabletninqa huñunakuyta uyarinanpaq chaynataq Diosmanta willakunanpaqpas allinta yanapasqanmanta. ¡Anchatam kusikunchik iñiqmasinchik Hulda munasqan tabletchata rantirusqanmanta!