Nicolastawan Celinetam Francia betelmanta nirqaku huklawpiña servinankupaq. Cambiakusqanku imayna kasqanmantam ninku: “Qallariypiqa kusisqam huñunakuykunaman rirqaniku, chaymantam ichaqa amistadniykuta yuyarispayku llakikuyta qallaykurqaniku. Chayllaraq riqsisqayku iñiqmasiykuwanqa manaraqmi allin amistadchu karqaniku”, nispa. a Chaynaqa, ¿imam yanapasunkiman hinalla kusisqa servinaykipaq? ¿Imaynatam yanapachwan congregacionninchikman cambiakamuqkunata? ¿Imanasqam allinninchikpaq kanman huklaw congregacionman cambiakuyqa? ¿Imaynatam chaypi kaq iñiqmasinchikkunata yanapachwan?

¿IMATAM RUWAWAQ KUSISQA SERVINAYKIPAQ?

1. Diospiyá hapipakuy (Sal. 37:5). Japon nacionmanta Kazumim congregacionninpi 20 wata karqa. Ichaqa huklawpiña llamkananpaq qusanta niykuptinkum congregacionmanta cambiakurqa. ¿Imatam ruwarqa ‘Jehova Diospa makinpi vidanta saqinanpaq’? Paymi willakun: “Sapallay hina tarikusqaymanta hinaspa imakuna manchakusqaymantam mana pakaykuspa Diosman willakurqani, hinaptinmi payqa kallpanchaykuwarqa”, nispa.

Ima plantapas allin wiñananpaqqa yanapan yakum hinaspa wanum. ¿Imam ñuqanchiktapas yanapawasun iñiyninchik wiñananpaq utaq Diospi astawan hapipakunapaq? Kaqmanta rimaykusun Nicolasmanta. Paymi yuyaymanarqa Abrahan, Jesus hinaspa Pablo Diospa munayninta ruwananpaq ima ruwasqanpi. Chaymi yanaparqa paytapas Dios yanapananmanta mana iskayrayananpaq. Qampas bibliata astawan estudianaykipaq tiempochakuspaykiqa vidaykipi ima cambiopas kaptinqa manam hukmanyankichu. Yachasqaykikunamanta  hukkunaman willaspaykitaqmi paykunata kallpanchanki.

2. Amayá iñiqkunataqa tupachiychu (Ecl. 7:10). Benin nacionniyuq Yoelmi Estados Unidosman cambiakuruspan chaylla cuentata qukururqa iñiqmasinchikkuna sapaq costumbreyuq kasqankumanta. Paymi nin: “Vidaymanta tukuy imata sapakama yachay munasqankutam piensarqani”, nispa. Chaynaman mana costumbrasqa kasqanraykum hukman tarikuspa iñiqmasinkunawanqa manaña anchatachu hukllawakuq. Iñiqmasinchikkunata astawan riqsispanmi ichaqa manaña chaynatachu piensaq. Paymi nin: “Cuentatam qukururqani enteron pachapi chaynalla kasqanchikta, ruwasqanchikpiwan rimasqallanchikpim manaqa chaynallachu kanchik. Chaymi imayna kasqankuman hina llapankuta kuyana”, nispa. Chaynaqa, amayá iñiqmasinchikkunataqa tupachisunchu. Precursora iñiqmasinchik Anam nirqa: “Huklawmanqa cambiakurqani manam imapas chaynalla kananta piensaspaychu, aswanqa huk iñiqmasinchikkunata riqsinaypaqmi hinaspa huk ruwaykunata yachanaypaqmi”, nispa.

Huklawman cambiakuq punta apaqkunapas cuentatam qukunmanku imatapas mana chaynallata ruwasqankuta. Manam chayllachu ninmanku “kaypiqa manam allintachu ruwachkanku” nispaqa. Aswanqa chaylawpi imayna kawsakusqankutam allintaraq yachananku chayman hina imatapas consejanankupaq (Ecl. 3:​1, 7b). Imatapas cambianankupaq ninankumanta aswan allinqa kanman ruwasqankuwan hukkunata yachachiyninkum (2 Cor. 1:24).

3. Iñiqkunawan kuska kay (Filip. 1:27). Huklawman cambiakuspa tukuy ima ruwayniyuq kaspapas chayasqanchikmantapacham huñunakuyman rinanchik. Riptinchikqa iñiqmasinchikkunam riqsiwaspanchik imapipas yanapayta atiwasun. Lucindam iskay wawankunapiwan Sudafrica nacionpi hatun llaqtaman cambiakurqaku, paymi nin: “Amistadniykum niwarqaku chayaruspayku iñiqmasinchikkunawan kuska willakunaykupaq hinaspa huñunakuykunapi rimarinaykupaq. Chaytamá ruwarqaniku. Chaymantapas, Diosmanta willakuq lluqsinaykupaqmi wasiykupi huñunakuyta qallaykurqaniku”, nispa.

Chayllaraq riqsisqayki iñiqmasikikunawan “huk sunqulla” imatapas ruwaspaykiqa qampas chaynataq paykunapas iñiynikichikpim ‘allin takyasqa kankichik’. Punta apaqkunam Anata nirqaku lliw iñiqmasinkunawan Diosmanta willakuq lluqsinanpaq. Paymi nin: “Chayllam cuentata qukururqani chay ruwayqa iñiqmasinchikkunata riqsinaypaq yanapawasqanta”, nispa. Chaymantapas, huñunakunanchik wasita limpiaypi utaq ima ruwaypipas yanapakuptikiqa cuentatam qukunqaku paykunawan huk sunqulla Dios serviy munasqaykita. Tukuy chaykunata ruwaspaykiqa paykunawan amistad kaspaykim Diosta kusisqa servinki.

4. Amistadkunatayá armay (2 Cor. 6:​11-13). Chaypaqqa hukkuna imayna tarikusqankupim  piensanayki. Chaynaqa, huñunakuy manaraq qallarichkaptin utaq tukuruptinyá iñiqkunawan parlay hinaspa paykunata riqsiy. Sapakamapa sutinta yachanaykipaqyá kallpanchakuy. Paykunawan kuyakuq kaptikiqa hinaspa sapakamapa sutinta yuyaptikiqa amistadniki kaytam munanqaku.

Amayá pinqakuychu imayna kasqaykita hinaspa maymanta kasqaykita willakuytaqa. Lucinda hinam ruwawaq, paymi nin: “Kikiykumantam iñiqmasinchikkunata wasiykuman invitaq kaniku. Chayraykum achka iñiqmasinchikkunawan amistad kaniku”, nispa.

“SUMAQLLATAYÁ CHASKIYKANAKUYCHIK”

Wakin iñiqmasinchikkunaqa pinqakunkum huk iñiqmasinchikkunapa huñunakusqankuman yaykuytaqa. Chaynaqa, ¿imaynatam yanapachwan pipas congregacionninchikman cambiakaramuptinqa? Apostol Pablom nirqa: “Sumaqllatayá chaskiykanakuychik imaynam Cristopas sumaqllataña chaskiykuwasqanchikman hina”, nispa (Rom. 15:7). Punta apaqkunapas Jesusta qatipakuspankum kusisqa chaskiykunmanku (qaway “ Huklaw congregacionman imayna cambiakunamanta” niqta). Uchuypas-hatunpas lliwmi congregacionman cambiakamuqkunataqa yanapanmanku kusisqa tarikunankupaq.

Cambiakamuqkuna kusisqa tarikunankupaqqa wasinchikmanmi invitachwan utaqmi imapipas yanapanapaq nichwan. Huk iñiqmasinchikmi congregacionninman chayllaraq cambiakamuq iñiqmasinchikman riqsichirqa chay llaqtata hinaspa maymanpas ima carrowan rina kasqanta. Chayna yanapaykusqanmantam iñiqmasinchikqa anchata agradecekurqa.

CAMBIAKUYQA ALLINNINCHIKPAQMI KANMAN

Huklaw congregacionman cambiakunaykita piensaspaykiqa ichapas manchakunki utaq preocupakunki. ¿Imatam ruwawaq? Kaypi piensariy: Aqarway urukunaqa pawarinankupaqqa qarachankuta saqispam lluqsinanku, utaq cambianankum. Chaynam ñuqanchikpas Jehova Diosta astawan servinapaqqa preocupacionninchikkunata saqinanchik. Nicolaswan Celinem nin: “Huklawman cambiakuruspaykum tukuy rikchaq runakunata riqsirqaniku, hinaspapas Jehova Diospa  imayna kasqantam astawanraq qatipakurqaniku”, nispa. Qallariypi rimamusqanchik Yan-Carlospas ninmi: “Huklaw congregacionman cambiakusqaykum warmaykuta yanaparqa Diosta astawan servinankupaq. Killakuna pasayllatam warmi warmaykuta aprobarurqaku huñunakuykunapi demostracionkunata ruwananpaq. Qari warmaykutañataqmi aprobarurqaku Diosmanta willakuqña kananpaq”, nispa.

¿Kay yachachikuyqa yanapasunkimanchu huklawman cambiakuyta mana atiptikipas? Arí, kay yachachikuypi consejokunata kasukuspaykiqa huklaw congregacionman cambiakuchkawaqpas hinam maymi kasqallaykipi Diosta aswan kusisqa servinki. Chaynaqa, Jehova Diospiyá hapipakuy, lliw iñiqmasinchikkunawan Diosmanta willakunaykipaq kallpanchakuy hinaspa paykunawan allin amistadta armay. Yachasqayki lawpi chayllaraq testigo kaqkunata utaq huklawmanta cambiakamuqkunata yanapaspaykiqa Dioswan kuyachikuspaykim aswan kusisqa servinki. Kuyanakuspamiki Jesuspa chiqap qatiqninkuna kasqanchiktaqa qawachinchik (Juan 13:35). Hukkunata yanapayqa ‘animalta nakapuspa Diosman quy hinam’ (Heb. 13:16).

Achka iñiqmasinchikkunam sasa kaptinpas huklaw congregacionman cambiakuruspanku Diosta kusisqa servichkanku. Anam nin: “Huklaw congregacionman cambiakusqaymi yanapawarqa sunquyta kicharispa tukuy rikchaq iñiqmasinchikkunata riqsinaypaq”, nispa. Kazumipa nisqanman hinataqmi huklawman cambiakuptikiqa aswan sutillaraq kanqa Dios yanapasusqayki. Yoelñataqmi nin: “Kunanqa aswan achka amistadniyuqmi kani, hinaspapas manañam llakisqañachu tarikuni. Kaypi kusisqallaña servisqayraykum huklawman cambiakuspayqa anchata llakikuyman”, nispa.