1940 watapim nacerqani mayo killapa 19 punchawninpi Amiun llaqtapi, chayqa Libano nacionpim kachkan. Chaymantam Tripoli llaqtaman astakurqaniku. Tayta-mamayqa Jehova Diospa testigonmi karqaku, paykunaqa kuyakuywanmi uywawarqaku. Pichqam karqaniku, kimsa warmikuna iskay qarikuna, ñuqam sullka kaq karqani. Tayta-mamayqa manam qullqita maskaymanchu qukururqaku aswanqa bibliata ñawinchanankupaqmi, huñunakuyman rinankupaqmi hinaspa Diosmanta willakuspa hukkunata yanapanankupaqmi kallpanchakuqku.

Huñunakusqaykupim karqaku hanaq pachapaq akllasqa iñiqmasinchikkuna, hukninmi karqa Michel Aboud. Payqa wasikunapi huñunakuptiykum huk kaqnin qillqanchikmanta yachachiq. Payqa Jehova Diosmantam Nueva York llaqtapi yacharurqa, hinaspanmi watakuna pasayta Libano lawpiña willakurqa. Chaymantam Libano nacionman chayaramurqaku galaad escuelamanta Anne hinaspa Gwen Beavor sutiyuq warmi iñiqmasinchikkuna. Paykunawanqa allin amistadtam armarurqaniku. Watakuna pasaytam Annewan Estados Unidospi tuparurqaniku, chaymantañataq Gwenwan. Paymi casarakurusqa Wilfred Gooch sutiyuq  iñiqmasinchikwan, hinaspam Londrespi betel wasipi yanapakuchkasqaku.

Warmacha kaptiyqa Libano nacionpi testigokunaqa asllam karqaniku. Chaymantapas curakunam michakurqaku Diosmanta willakuyniykuta, chayna kaptinpas hinallam kallpanchakurqaniku willakunaykupaq. Kunankamam imakunawan sasachakusqaykumanta yuyachkaniraq.

Huk punchawmi paniy Sanawan altusniyuq wasikunapi Diosmanta willakuchkarqaniku. Hinaptinmi cura qunqayllamanta rikuriykamuspan paniyta tukuyta kamispan gradasmanta tanqaykurqa, hinaptinmi chaypi kaq runakuna policiata qayaramusqaku. Paykunaqa paniytam yanaparqaku, hinaspanmi chay curatapas comisariaman pasachirqaku. Chay curaqa kasqa pistolayuqmi, hinaptinmi policiakuna nirqaku: “¿Curachu kanki icha pistolawan runamasinta wañuchiqchu?”, nispa.

Huk kutipim karu llaqtachata rirqaniku Diosmanta willakuq. Chay llaqtachapi willakuchkaptiykum chaypi kaq runakunata cura umacharusqa, chaymi rumiwan chamqawaspanku papaypa umanta pakirurqaku, hinaptinmi kaqmanta llapallayku carroman pasarqaniku hukmanyasqa. Papaypa yawarninta mamay pichaspanmi nirqa: “Jehova Diosllayku, pampachaykuy kay runakunata, mana yachasqankuraykum kayta ruwawanku”, nispa.

Huk kutipim aylluykuta watukuq rirqaniku, hinaspam abueloypa wasinman chayaruptiyku huk cura chaypi kachkasqa. Chay curaqa yacharqam tayta-mamayqa Jehova Diospa testigon kasqankuta. Ñuqaqa suqta watallaypiraqmi kachkarqani. Chay curam tapuwarqa: “¿Imanasqataq manaraq bautizakunkichu?”, nispa. Ñuqañataqmi nirqani: “Warmachallaraqmi kani, bibliamanta allinta yacharuspayñam hinaspa iñiyniypi allinta takyaspayñam bautizakusaqqa”, nispay. Hinaptinmi chay curaqa abueloyta nirqa: “Kay warmaykiqa lisom”, nispa.

Wakin runakunallam Diosmanta willakunaykutaqa mana munaqkuchu. Libano lawpi runakunaqa yaqa llapallankum kanku llampu sunqu chaynataq qukuykuq. Diosmantapas uyarirqakum, achka runakunamantaqmi Diosmanta yachachirqaniku.

Escuelallapiraq kachkaptiymi Venezuelamanta kaq iñiqmasinchik Libanoman hamurqa. Paymi Wafa sutiyuq paniywan riqsinakuyta qallaykuspan casarakururqa, hinaspam Venezuelaman ripukurqaku. Chaymantam paniy Wafa qillqamuwaspanku niwaqku: “Anchatam llakikuykichik, kayman hampukuychik”, nispa. Hinaptinmi Venezuelaman pasakurqaniku.

 1953 watapim Venezuelaman chayarurqaniku, hinaspam Caracas llaqtapi presidentepa palacionpa hichpanpi yacharqaniku. Ñuqaqa warmachallaraqmi karqani, chaymi presidente carronwan pasaptin admirakuywan qawaq kani. Tayta-mamayqa Venezuelapiqa manam costumbrarqakuchu chaypi runakunapa rimayninku, mikuyninku utaq imapas llaqtaykupi hina mana kasqankurayku. Costumbrachkaptinkuñam hatun llaki qatiruwarqaku.

Papayqa kallpanpiraqmi karqa, payqa manam haykapipas unquqchu. Qunqayllamanta unquyta qallaykuptinmi doctorman pusarqaniku. Payñataqmi niykurqa cancerwan unqusqanmanta, hinaptinmi operaruptinku semanallamanta wañukurqa.

Ñuqaqa 13 watallaypiraqmi kachkarqani, llumpay llakisqam tarikurqaniku, manam imanakuytapas atirqanikuchu. Mamaypas llumpaytam papaymanta waqallarqa, ichaqa Jehova Diospa yanapakuyninwanmi payta hinalla yupaycharqaniku. Colegioytam 16 wataypi tukururqani, hinaspaymi piensarqani aylluyta imaynata yanapaypi.

Venezuelamanta kaq Ruben Araujo sutiyuq iñiqmasinchikmi galaad escuelaman rirqa. Payqa kutiramuspanmi paniy Sanawan casarakururqa, hinaspam Estados Unidos nacionman ripukuspanku Nueva York llaqtapi yacharqaku. Aylluymi munarqa universidadpi estudianayta. Chaymi Nueva Yorkman pasakurqani, hinaspam paniy Sanapa wasinpi karqani. Paykunaqa Jehova Diospi hapipakunaypaqmi yachachiwarqaku. Ñuqaykuwanmi huñunakuqku Milton Henschel hinaspa Frederick Franz sutiyuq iñiqmasinchikkuna, paykunaqa betel wasipim yanapakurqaku.

Huk wataña universidadpi kachkaspaymi yuyaymanayta qallaykurqani. Tantiakunaymi karqa universidadpi hinalla kanaypaq utaq Jehova Diospa munayninta ruwanaypaq. Chaypaqqa yanapawarqa Willakuq qillqapi ñawinchasqaykunam. Chaymantapas, qawarqanitaqmi precursor kaq chaynataq betel wasipi yanapakuq iñiqmasinchikkunaqa kusisqallaña kawsakusqankuta. Ñuqapas munarqanim paykuna hina kusisqa kawsakuyta, ichaqa manaraqmi bautizasqaraqchu karqani. Chaymi bautizakunaypaq tantiakururqani, hinaspam 1957 watapi marzo killapa 30 punchawninpi bautizakururqani.

Bautizakuruspaymi anchata munarqani precursor kayta, ichaqa universidadpi kasqayraykum precursor kanaypaq tiempoy mana haypawarqachu. Chaymi mamayman cartata apachirqani universidadmanta lluqsikuspay Venezuelaman kutispa precursor kay munasqayta.

 1957 watapim Venezuelaman kutirqani. Aylluyqa qullqimantam sasachakuchkasqa, chaymi sapa punchaw bancopi llamkapakuyta qallaykurqani. Ichaqa astawanqa munarqani precursor kaytam, chaymi tukuy punchaw llamkapakuspaypas precursor kayta qallaykurqani. Chaywanqa ancha kusisqam karqani.

Chaymanta watakuna pasaytam Sylvia sutiyuq iñiqmasinchik Alemania nacionmanta tayta-mamanpiwan Venezuelaman astakaramurqaku. Ñuqaqa Sylviawanmi casarakururqani, hinaptinmi churiykuna karqa Michael hinaspa Samira. Chaymantapas tantiarurqanikum mamayta wasiypi uywanaykupaq, ichaqa precursor kayniytam saqirurqani, wakin killapiqa precursor kanaykupaqmi kallpanchakuq kaniku.

Qallariypi willakusqaymantayá willasqaykichik. Chay tiempopaqqa warmachaykunam escuelapiraq kachkarqaku. Ñuqaqa bancopi llamkasqayraykum riqsisqa runa karqani, munarqanitaqmi Diosmanta willakuq kasqaywan riqsichikuytapas. Chaypim anchata yuyaymanarqani, hinaspaymi warmichay Sylviawan rimanakurqani bancopi manaña llamkanaypaq. Manam imamantapas debekurqanikuchu, chaymi piensarqaniku bancomanta pagawasqanku qullqichaykuqa achka killakuna haypawanankupi.

Bancopi llamkayniyta saqinaypaqqa sasatam tantiakurqani, ichaqa warmichaywan mamaymi kallpanchawarqa. Llamkayta saqiruspayqa munarqanim kaqmanta precursor kayta, chaywanmi ancha kusisqa tarikurqani.

Chaymantam warmichay Sylvia wiksayuq kasqanta yacharurqaniku. Manañam piensarqanikuchu warmachayku kanantaqa. Kusisqam karqaniku, ichaqa hinallataqmi piensarqani precursor kayta munasqaypi. Nikurqanim: “Atisaqraqchu precursor kayta imaynaya”, nispa.

Gabriel sutiyuq warmachaykum 1985 watapa abril killanpi nacerurqa. Bancopi llamkayniyta saqiruspaymi 1985 watapa junio killanpi precursor kayta qallaykurqani. Chaymanta watakuna pasaytam betel wasipi cuentallikuqkunamanta huknin kanaypaq niykuwarqaku. Wasiymantaqa betel wasiqa karupiraqmi karqa, chaymi semanapi iskay kutita utaq kimsa kutita riq kani.

La Victoria llaqtamanmi astakurqaniku chaypi betel wasi kasqanrayku, chaypaqqa llapallaykum yanapakurqaniku. Baha sutiyuq paniymi niwarqa mamaykuta cuidananpaq. Huknin churiyqa casarasqañam karqa. Samirawan Gabrielmi ichaqa ñuqaykuwan rirqaku. Paykunaqa Caracaspi warmamasinkumantam llakikuqku. Warmichaypas costumbrananmi karqa taksalla llaqtapi. Llapallaykum anchata kallpanchanakurqaniku mana hukmanyarunaykupaq.

Watakuna pasaytam Gabrielqa casarakururqa, Samirapas huklawpiñam yacharqa. Ñuqatawan warmichay Sylviatañataqmi niykuwarqaku betel wasipiña yachanaykupaq. Kunankamam chaypi kachkaniku. Mike sutiyuq mayor churiymi Monicawan casarakururqa. Mikeqa punta apaqmi, payqa warmichanpiwanmi precursor kanku. Gabrielñataqmi Ambrawan casarakururqa, Gabrielpas punta apaqmi. Paykunaqa Italiapim kachkanku. Samirañataqmi betel wasipi llamkaqkunata wasillanmanta ima ruwaypipas yanapakuchkan.

Jehova Diospa munayninta ruwanaypaq tantiakusqaymantaqa manam ñakakunichu. Paytam anchata agradecekuni munayninta ruwanaypaq yanapaykuwasqanmanta. Watakuna pasasqanman hinam paypi hapipakuspay imapaqpas tantiakurqani. Diospa munayninman hina tantiakuptinchikqa paymi hawkayayninta quwanchik, chay hawkayayninta quwasqanchiktaqa manam runakunaqa entiendeyta atinkuchu (Filip. 4:6, 7). Sylviawan ñuqaqa ancha kusisqam kachkaniku betel wasipi yanapakusqaykuwan. Imapaqpas tantiakunaykupaqqa Jehova Diostam mañakurqaniku, chaywanmi ancha kusisqa tarikuniku.