ÑAWPAQ tiempopiqa casarakuyta munaq qarim warmipa ayllunman paganan karqa animalkunawan, qullqiwan utaq llamkapuspanpas. Chaynatam ruwarqa Jacobpas Raquelwan casarakuyta munaspan. Paymi Raquelpa taytanwan rimarqa churinrayku qanchis wata llamkapunanpaq (Gen. 29:17, 18, 20). ¿Imakunaraykutaq pagananku karqa?

Chaykunamanta allinta yachaq Carol Mayers sutiyuq warmim nin: “Ñawpaq tiempopiqa chakrapi llamkaspankum kawsakuqku, chaypim warmi churipas tayta-mamanta yanapaq. Chayraykum paykunata manaña yanapayta atisqanrayku casaraqnin qariqa tayta-mamanman paganan karqa”, nispa. Pagaqkutaqmi warmipa ayllunwan qaripa ayllun riqsinakuspanku sasachakuy tiempopi kuyakuywan yanapanankupaqpas. Chaymantapas, warmipa ayllunman qari pagasqanwanmi hukkuna yachaqku chay warmiqa casarakunanpaq rimapayasqaña kasqanta.

“Pagarqaku” nispanchikqa manam warmikunata rantisqankumantachu nichkanchik. Huk libropim nin: “Casarakuyta munaq qariqa warmipa ayllunmanqa imatapas quq utaq pagaq manam warmita rantisqanraykuchu, aswanqa warmipa ayllun allin kananta munasqanraykum”, nispa. *

Kunan tiempopipas wakin nacionkunapiqa hinallaraqmi casarakuyta munaq qariqa warmipa ayllunman pagan utaq imatapas qun. Jehova Diosta yupaychaq tayta-mamaqa, manam llumpaytaqa imatapas mañakunankuchu, chaywanmi riqsichikunqaku Diosman sunqu runakuna kasqankuta (Filip. 4:5; 1 Cor. 10:32, 33). Riqsichikunqakutaqmi mana ‘qullqilla kuyaq’ kasqankutapas (2 Tim. 3:2). Chaymantapas, imatapas llumpayta mana mañakuptinkuqa casarakuyta munaq qariqa apurawmanmi casarakunqa. Hinaspapas precursor kaspanqa hinallam Diospa munayninta tukuy tiemponwan ruwanqa.

Wakin nacionkunapiqa autoridadkunam kamachinku casarakuy munaq qariqa haykata pagananpaq. Chayna kaptinqa Jehova Diosta yupaychaqkunaqa autoridadkunapa kamachisqantam kasukunanku. Jehova Diosmi kamachin autoridadkunata kasukunapaq, ichaqa paypa munasqanman hina kaptillanmi (Rom. 13:1; Hech. 5:29).