MOISESPA chaskisqan kamachikuypiqa nirqam jurayqa wakinpi allin kasqanmanta. Ichaqa Jesuspa tiemponpi judiokunaqa imatapas ruwanankupaqmi juraqku. Chayta ruwaspankum qawachiqku imapas rimasqankuqa chiqap kasqanta. Jesusqa iskay kutikamam nirqa chay ruwayqa mana allin kasqanta, chaymantam nirqa: “‘Arí’ nispaqa chayman hinayá ruway, ‘manam’ nispapas manam nisqaykiman hinayá ruway”, nispa (Mat. 5:33-37; 23:16-22).

Judiokunapa Talmud qillqankumanta rimaspanmi huk qillqa nin judiokunaqa imapas rimasqankuta creenankupaq jurasqankumanta. Talmud qillqam nin imakuna jurasqankuta ruwanankumanta hinaspa imakuna mana ruwanankumantapas.

Manam Jesusllachu nirqa chayta ruwasqanku mana allin kasqantaqa. Flavio Josefo sutiyuq runam judiokunamanta rakikuspa huk religionniyuq runakunamanta nirqa: “Paykunaqa manam jurankuchu, llulla rimaymantapas aswan mana allin kasqanrayku. Paykunaqa ninkum imatapas ruwananpaq Diospa sutinpi juraqkunaqa, ña llullakusqankutaña”, nispa. Judiokunapa tiemponpi Eclesiástico utaq Sabiduría de Jesús Ben Sirá sutiyuq qillqam nin: ‘Chay juraymanta wañuykuq runaqa hatun mana allinpa huntasqanmi kachkan’, nispa (23:11). Chaynaqa, Jesusqa yanqapas-yanqa jurasqanku mana allin kasqantam nirqa. Sapa kuti chiqapta rimaspanchikqa, manam wakinkuna creewananchikpaqqa jurananchikraqchu.