1, 2. ¿Imaynatam apostol Pablo Diospa ancha kuyakuyninmanta agradecekusqanta qawachirqa?

APOSTOL Pablom Jesuspa qatiqninkunata qatikacharqa. Chay ruwasqankuna mana pampachanapaq hina kasqanmantam payqa yacharqa. Chaymi Pabloqa sunqumanta nirqa: “[Diospa] kuyakuynin qawachiwasqanqa manam yanqapaqchu”, nispa (leey 1 Corintios 15:9, 10).

² Wañukunanpaqña kachkaspanmi Pabloqa Timoteoman kaynata qillqarqa: “Agradecekunim atiy quwaqniy señorninchik Jesucristota, payqa allin runa kasqayta yachaspanmi Dios serviypi llamkayta quwarqa”, niqta (1 Tim. 1:12-14). ¿Imataq chay llamkayqa karqa? Pablom Efeso llaqtapi iñiqkunapi punta apaqkunata nirqa: “Vidaytaqa mana valorniyuqta hinam qawani ruwanayta hinaspa señor Jesusmanta llamkay chaskisqayta tukunayrayku, chay chaskisqay llamkayqa Diospa ancha kuyakuyninmanta  sumaq willakuykunata lliwta willakuyniymi”, nispa (Hech. 20:24).

3. ¿Ima kamachikuytam Pabloqa chaskirqa? (Qaway 22 kaq paginapi dibujota).

³ ¿Ima ‘sumaq willakuykunamantam’ Pabloqa willakurqa? ¿Imaynatam chay sumaq willakuykuna Jehova Diospa ancha kuyakuyninta qawachirqa? Pablom Efeso llaqtapi iñiqmasinkunaman nirqa: “Qamkunaqa uyarirqankichikmi yanapanaypaq llamkay chaskisqaymanta chaynapi Diospa favorninwan yanapachikunaykichikpaq”, nispa (Efes. 3:1, 2). Jesusmi Pablota kamachirqa huk law nacionniyuqkunamanpas Diospa munayninmanta willakunanpaq. Pablom willakunan karqa chay runakunapas Jesuswan kuska kamachiyta atinankumantaña (leey Efesios 3:5-8). Pabloqa kusikuywanmi willakurqa, chaytam ñuqanchikpas qatipakuchwan. Chaynata ruwaspanmi Pabloqa qawachirqa Diospa ancha kuyakuynin chaskisqanqa ‘mana yanqapaq’ kasqanta.

4, 5. ¿Imanasqam nichwan: ‘Diospa munaychakuyninmanta sumaq willakuyqa’ hina chaynallam ‘Diospa ancha kuyakuyninmanta sumaq willakuykunawanqa’, nispa?

⁴ Kay tukupay punchawkunapipas, Jehova Diosqa kamachiwanchikmi ‘Diospa munaychakuyninmanta kay sumaq willakuyta’ willakunanchikpaq. Chaytaqa ruwananchik ‘enterollan kay pachapi llapallan nacionpi runakuna yachanankupaqmi’ (Mat. 24:14). ‘Diospa munaychakuyninmanta kay sumaq willakuyqa’ hina chaynallam ‘Diospa ancha kuyakuyninmanta sumaq willakuykunawanqa’. ¿Imanasqataq chaynata ninchik? Jehova Diospa ancha kuyakuyninraykum Diospa munaychakuyninpi achka bendicionkunata chaskisun (Efes. 1:3). Pablom Diospa ancha kuyakuyninmanta agradecekusqanta qawachirqa kusisqallaña Diosmanta willakuspan. ¿Qatipakuchkanchikchu paypa ruwasqanta? (Leey Romanos 1:14-16).

⁵ Pasaq semanapim yacharqanchik pantaq runakuna kaspanchikpas Diospa ancha kuyakuyninwan imayna yanapachikunanchikmanta. Yacharqanchiktaqmi Diospa ancha kuyakuyninrayku achka bendicionkuna chaskisqanchikmanta. Chayraykum Jehova Diospa chiqap kuyakuyninmanta runakunaman willakunanchik hinaspa chay kuyakuyninwan yanapachikunankupaq imata ruwanankumantapas. ¿Imaynatam hukkunata yanapachwan Diospa ancha kuyakuyninmanta agradecekunankupaq?

6, 7. Jesuspa wañukusqanmanta runakunaman yachachispanchikqa, ¿imaynatam Diospa ancha kuyakuyninmanta willakuchkanchik?

⁶ Kunan tiempopi achka runakunam huchallikusqankutapas manaña riqsikunkuchu. Chayraykum mana chaninchankuchu Jesuspa wañukusqanta. Chaymantapas achka runakunam musyakuchkanku imayna kawsakusqankuwan mana kusisqa kasqankumanta. Ichaqa Jehova Diospa testigonkunawan rimaspankum wakinkuqa entiendenku hucha ima kasqanmanta, imayna sasachasqanmanta hinaspa huchapa munaychakusqan kayninkuta imayna saqinankumanta. Allin sunquyuq runakuna kaspankuqa, agradecekunkum huchamantawan wañuymanta librawananchikpaq churinta Dios kay pachaman kachamusqanmanta. Yachankutaqmi Jehova Diosqa ancha kuyakuq kasqanrayku chayta ruwasqanmantapas (1 Juan 4:9, 10).

 ⁷ Qawasun imatam Pablo nirqa Jehova Diospa kuyasqan churinmanta, nirqam: “Runakunapa rantinpi churinpa precio pagasqanwanmi librasqa kanchik. Arí, Diospa ancha-ancha kuyakuyninraykum churinpa yawarninwan huchanchikmanta pampachasqa kanchik”, nispa (Efes. 1:7). Diosqa hatu-hatun kuyakuynintam qawachiwarqanchik churinta ñuqanchikrayku wañunanpaq kachamuspan. Jesuspa wañukusqanpi iñispanchikqa huchanchikmantam pampachasqa kasunchik hinaspapas conciencianchikmi chuya kanqa. Chayta yachasqanchikmi sunqunchikta tiyaykachin (Heb. 9:14). Chayqa sumaq willakuykunam. ¿Manachu lliw runakunaman willakuchwan?

8. ¿Imanasqataq Dioswan allinyanakunanchik?

⁸ Jesuspa wañukusqanpi mana iñiq runakunataqa enemigonta hinam Diosqa qawan. Chaywanpas paypa amistadnin kaytaqa atinmankum, chaytam paykunaman willakunanchik. Apostol Juanmi qillqarqa: “Churipi iñiqqa wiñay kawsayniyuqmi, churita mana kasukuqmi ichaqa mana kawsanqachu, aswanqa Diospa piñakuyninmi paypi hinalla kanqa”, niqta (Juan 3:36). Jesuspa wañukusqanrayku Dioswan allinyanakusqanchikmanta yachasqanchikmi kusichiwanchik. Pablom nirqa: “Ñawpaqtaqa mana allinkunallapi piensaspaykichikmi Diosmanta karunchasqa hinaspa paypa enemigon karqankichik. Chayna kachkaptikichikpas cuerpon entregaqpa wañukusqanwanmi Diosqa kikinwan allin kanaykichikpaq yanapasurqankichik”, nispa (Col. 1:21, 22).

9, 10. (1) ¿Imata ruwanankupaqmi Jesucristoqa hanaq pachapaq suyakuyniyuqkunata kamachirqa? (2) ¿Imaynatam ‘sapaq ovejakuna’ yanapachkanku hanaq pachapaq suyakuyniyuqkunata?

⁹ Jesucristom hanaq pachapaq suyakuyniyuqkunata ‘allinyanakuymanta willakunankupaq’ kamachirqa. Pablom nirqa: “Tukuy imam Diosmanta hamun. Diosmi kikinwan Cristontakama allinyanachiwanchik hinaspam ñuqaykuman quykuwanku allinyanakuymanta willakuyta, kay willakuyqa runakunata Dios qayasqanmanta willakuymi, qayanqa paywan runakuna Cristontakama allinyanakunankupaqmi, chaytaqa ruwan huchankumantapas runakunata cuentata mana mañaspanmi, chay allinyanakuymanta willakunaykupaqmi Diosqa kamachiwarqaku. Chayraykum Cristopa rantinpi Diosmanta willakuq kaniku, yaqa Diospas ñuqaykuwan runakunata qayachkanman hina. Cristopa rantinpi churasqa kaspaykum ruegakuniku: ‘Dioswan allinyanakuychik’”, nispa (2 Cor. 5:18-20).

¹⁰ ‘Sapaq ovejakunaqa’ anchatam kusikunku hanaq pachapaq suyakuyniyuqkunata yanapaspanku (Juan 10:16). Paykunaqa hanaq pachapaq suyakuyniyuqkunatam yanapanku Jesuspa rantinpi runakunaman willakuspanku. Enteron pachapi achkallaña runakunamanpas bibliapa chiqap yachachikuyninkunatam yachachinku. Chaymantapas yachachisqanku runakunatam yanapanku Dioswan allin amistad kanankupaq. Chaynata ruwaspankum ‘Diospa ancha kuyakuyninmanta’ runakunaman willakuchkanku.

11, 12. ¿Imanasqam Jehova Diosta mañakuy atisqankumanta runakunapa yachayninqa allinninkupaq?

¹¹ Achka runakunam Diosta mañakunku chaywan allinlla tarikunankupaq. Ichaqa iskayrayankum Dios uyarisqanmanta. Chaymi yachachinanchik mañakusqanchikta Jehova Dios uyarisqanmanta. Davidpas takispanmi  Jehova Diosta kaynata nirqa: ‘Qamqa pipapas mañakusqanta uyariykuqmi kanki. Llapallan runakunam qanmanqa asuykamusunki. Mana allin ruwasqaykum ñuqaykutaqa venceruwanku. Ichaqa mana kasukusqaykutam qamqa pampachaykuwankiku’, nispa (Sal. 65:2, 3).

¹² Jesusmi qatiqninkunata nirqa: “Imatapas taytayta mañakuptikichikqa sutiypim qusunkichik”, nispa (Juan 16:23). Kaywanmi Jesusqa nichkarqa Jehova Diospa munasqanman hina imatapas mañakunanchikmanta. Jehova Diosmanta rimaspanmi Juan qillqarqa: “Ñuqanchikqa manam iskayrayanchikchu munasqanman hina mañakuptinchik Dios uyariwasqanchikmantaqa”, niqta (1 Juan 5:14). Kusikuywanmi runakunaman yachachinchik, Diosta mañakuyqa allin tarikunallapaq mana kasqanmanta. Aswanmi yachachinchik mañakuspanku ‘ancha kuyawaqninchik Diospa kamachinanpaq tiyananman’ asuykuy atinankumanta (Heb. 4:16). Runakunamanqa yachachinanchikmi imaynata, pita hinaspa imakunamanta mañakunankupaq. Chaynata ruwaspanchikqa, paykunatam yanapasun Diospa amistadnin kanankupaq hinaspa imakunawan ñakarispankupas kallpanchakuyta tarinankupaq (Sal. 4:1; 145:18).

13, 14. (1) ¿Ima sumaq kaqkunatam hanaq pachapaq suyakuyniyuqkunaqa hamuq tiempopi chaskinqaku? (2) ¿Imakunatam ruwanqaku hanaq pachaman riqkuna kay pachapi runakunapaq?

¹³ Hamuq tiempopim Jehova Diosqa astawanraq ancha kuyakuyninta qawachiwasun. ¿Imaynatam chayta ruwanqa? Hanaq pachapi 144.000 Jesuswan kamachiqkunaman sumaq bendicionta quspanmi. ¿Ima bendiciontataq qunqa? Pablom kaynata yachachirqa: “Ancha llakipayakuq Diosmi llumpayta kuyawaspanchik kawsariykachiwanchik hinaspam Cristowan hukllawaykuwanchik, chaytam ruwarqa mana kasukusqanchikrayku wañusqaña kachkaptinchikpas. Qamkunaqa Diospa ancha kuyakuyninraykum salvasqa karqankichik. Diosqa kawsarichiwaspanchikmi hanaq pachapi tiyaykachiwanchik hinaspam Cristo Jesuswan hukllawaykuwanchik, chaynapi hamuq tiempopi hatu-hatun favorninta kuyakuyninpi qawachiwananchikpaq, ñuqanchikqa kanchik Cristopa qatiqninkunam”, nispa (Efes. 2:4-7).

¹⁴ Hanaq pachapaq suyakuyniyuqkuna Jesuswan kuska kamachimuptinku ima admirakuypaq kaqkunata paykunaman Jehova Dios qunanmantaqa manam yachachwanchu (Luc. 22:28-30; Filip. 3:20, 21; 1 Juan 3:2). Jehova Diosqa astawanraqmi paykunaman “hatu-hatun favorninta kuyakuyninpi” qawachinqa. Paykunam “musuq Jerusalen” hinaspa Jesucristopa ‘novian’ kanqaku (Apoc. 3:12; 17:14; 21:2, 9, 10). Hinaspam “nacionkuna hampikunankupaq”Jesuswan kuska llamkanqaku. Kaywanqa nichkanmi lliw runakunata huchamantawan wañuymanta libranankupaq chaynataq mana pantaq runaña kanankupaq yanapanankumantapas (leey Apocalipsis 22:1, 2, 17).

15, 16. ¿Imaynatam Jehova Diosqa ‘sapaq ovejakunamanpas’ ancha kuyakuyninta hamuq tiempopi qawachinqa?

¹⁵ Efesios 2:7 nin Jehova Dios ancha kuyakuyninta “hamuq tiempopi” qawachinanmanta. Chay tiempopi kay pachapi kawsaq runakunaqa Diospa ‘hatu-hatun favornintam kuyakuyninpi’ chaskinqaku (Luc. 18:29, 30). Jehova Diosqa ancha kuyakuynintam astawanraq kay pachapi qawachinqa wañuqkunata kawsarichispan (Job 14:13-15; Juan 5:28, 29). ¿Pikunatataq kawsarichinqa? Jesuspa tiemponmanta ñawpaqtaraq Diosman sunqu wañukuqkunatam. Kawsarichinqataqmi tukupay  punchawkunapi wañuq ‘sapaq ovejakunatapas’. Paykunam llapanku kawsarimuspanku hinalla Jehova Diosta yupaychanqaku.

¹⁶ Jehova Diosqa kawsarichinqataqmi manaraq payta riqsichkaspanku wara-waranqantin wañuq runakunatapas. Juanmi qillqarqa: “Chaymantapas rikurqanim riqsisqa hinaspa mana riqsisqa ñawpaq wañusqakunata, paykunaqa kamachinapaq tiyanapa ñawpaqninpim sayachkasqaku, hinaptinmi wankusqa qillqakuna kichakururqa. Huk wankusqa qillqapas kichakururqataqmi, chay qillqaqa kawsakuyta tarinapaq wankusqa qillqam. Wañusqakunaqa juzgasqam karqaku imapas ruwasqankuman hina, chaynataq wankusqa qillqakunapa nisqanman hina. Hinaptinmi lamar quchaqa chaypi kaq wañusqakunata qumurqa, wañuypas hinaspa sepulturapas qumurqam chaypi kaq wañusqakunata, hinaptinmi chay wañusqakunaqa ruwasqankuman hina sapakama juzgasqa karqaku”, niqta (Apoc. 20:12, 13). Kawsarimuq runakunaqa Jehova Diostam kamachiqninkuta hina riqsiyta atinqaku. Chaymantapas bibliapa nisqanman hina hinaspa “wankusqa qillqakunapi” musuq kamachikuyman hinam kawsananku kanqa. Kay musuq kamachikuykunapas Jehova Diospa ancha kuyakuynintam qawachinqa.

17. ¿Imatam yuyarinanchik runakunaman Diosmanta willakuspanchikqa?

¹⁷ Diospa piñakuynin punchawqa kayllapiñam kachkan. Chaymi kunanqa astawanraq Diospa munaychakuyninmanta “sumaq willakuykunata”  willakunanchik (Mar. 13:10). Haykapipas yuyarinanchikmi Jehova Diosmanta willakuyninchikqa payta hatunchanapaq kasqanmanta. ¿Imaynatam hatunchanchik? Musuq pachapi sumaq kawsakuymanta runakunaman willaspanchikmi, paykunamanmi ninanchik tukuy chaykunata Jehova Dios ancha kuyawasqanchikraykulla quwananchikmanta.

18, 19. ¿Imaynatam hatunchasunchik Jehova Diospa ancha kuyakuyninta?

¹⁸ Runakunaman Diosmanta willaspanchikqa yachachichwantaqmi kay pachata Jesucristo kamachimuspan imakuna ruwananmanta. Chay tiempopim runakunaqa Jesuspa wañusqanwan tukuy imapi yanapachikunqaku hinaspam pisi-pisimanta mana pantaq runakunaña kanqaku. Bibliam nin: “Unanchasqakuna huchapa hinaspa wañuypa sirvienten kasqankumanta librasqa kanankuta, chaynapi Diospa churinkuna hina libreña kanankupaq, chayna librasqa kasqankuqa suma-sumaqmi kanqa”, nispa (Rom. 8:21). Tukuy chaykunaqa atikunqa Jehova Dios anchata kuyawasqanchikraykullam.

¹⁹ Ancha kusisqam tarikunchik Apocalipsis 21:4, 5 nisqanpi sumaq willakuyta runakunaman willakuspanchik. Chaypim nin: “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam”, nispa. Hanaq pachapi tiyananmantam Jehova Diosqa nin: “Ñuqam tukuy imata musuqyachichkani”, nispa. Nintaqmi: “Kayta qillqay nisqaykunaqa mana iskayrayanapaqmi hinaspapas manam llullachu”, nispa. Chaynaqa kusikuywanyá kay sumaq willakuykunamanta runakunaman willakusun, chaynata ruwaspanchikqa Diospa ancha kuyakuynintam hatunchasunchik.