1, 2. (1) Uvas chakrayuq runamanta Jesuspa willasqanta willamuy. (2) ¿Imatam Jesuspa tupanachisqan yachachiwanchik qukuykuq hinaspa ancha kuyakuq kaymanta?

HUK runapam uvas chakran karqa. Paymi tutapaylla plazaman rirqa peonkunata maskamunanpaq. Peonkunawanmi rimanakurqaku haykata pagananpaq, hinaptinmi chakranman rirqaku. Chay uvas chakrayuq runaqa astawan peonkunata necesitaspanmi chay punchawqa achka kutita plazaman kutirqa. Lliw peonkunatam hina chaynallata pagananpaq nirqa. Tutaykuptinñataqmi lliw peonninkunata huñurqa pagananpaq. Wakinkum llamkarqaku tukuy punchaw, wakinñataqmi huk horalla. Ichaqa chay uvas chakrayuq runam llapankuman hina chaynallata pagarqa. Hinaptinmi tukuy punchaw llamkaq runakunaqa chakrayuqpa contranpi rimayta qallaykurqaku. Chaymi uvas chakrayuq runaqa paykunata yuyarichirqa hayka pagananpaq rimanakusqankumanta hinaspapas nirqam kapuqninkunawanqa  munasqanman hina ruwananmanta. Hinaspam tapurqa: “¿Envidiakunkichu allin runa kasqaymanta?”, nispa (Mat. 20:1-15).

² Jesusmi kayta willarqa ‘Diospa ancha kuyakuyninmanta’ yachachinanpaq (leey 2 Corintios 6:1) ^[1] (qaway 21 kaq paginapi willakuyta). Wakiqninchikqa piensachwanpaschá tukuy punchaw llamkaq runakuna aswan achka qullqi chaskinankumanta. Ichaqa uvas chakrayuq runam ancha kuyakuq kasqanrayku tukuy punchaw mana llamkaq runakunamanpas hina chaynallata pagarqa. Huk yachaysapa runam nirqa bibliapi ‘Diospa ancha kuyakuynin’ ninanqa “mana imatapas ruwaspa nitaq mana imallapaq imapas chaskisqanchikta” utaq “mana kallpanchakuspa nitaq llamkaspa huk runa imatapas chaskisqanta”.

3, 4. (1) ¿Imanasqam Jehova Dios ancha kuyakuyninta runakunaman qawachirqa? (2) ¿Imaynatam chayta ruwarqa?

³ Bibliam nin Diospa ancha kuyakuyninqa “mana imallapaq” chaskisqanchik regalo kasqanta (Efes. 3:7). Diosta tukuy imapipas mana kasukuyta atiptinchikpas, payqa ancha kuyakuynintam qawachiwanchik. Kamachiq Salomonmi nirqa: ‘Kay pachapiqa manam hukllapas kanchu allin ruwaq runaqa. Manam kanchu allinllata ruwaspa mana huchallikuq runaqa’, nispa (Ecl. 7:20). Achka watakuna qipatam apostol Pablopas nirqa: “Llapallankumiki huchallikurunku hinaspam Diospa kanchayninta mana haypankuchu”, nispa. Nirqataqmi: “Huchapa pagonqariki wañuymi”, nispa (Rom. 3:23; 6:23a).

⁴ Jehova Diosqa ancha-anchatam runakunata kuyan. Chaymi sapallan churinta kachamurqa ñuqanchikrayku wañunanpaq. Chaywanmi ancha kuyawasqanchikta qawachiwarqanchik (Juan 3:16). Pablom nirqa Jesusqa ‘ñakarispa wañusqanrayku ancha riqsisqaña hinaspa hatunchasqaña’ kasqanmanta. Nirqataqmi: “Runakunata Dios anchata kuyasqanraykum Jesusqa llapallanpa rantinpi wañunan karqa”, nispa (Heb. 2:9). Hinaptinqa, Jehova Diospa regalonmi ‘señorninchik Cristo Jesusrayku wiñaypaq kawsakuyqa’ (Rom. 6:23b).

5, 6. (1) ¿Imapim tukunchik huchapa munaychakusqan kasqanchikrayku? (2) ¿Imaynatam yanapachikusun Diospa ancha kuyakuynin kawsakuyninchikpi munaychakunanpaq?

⁵ ¿Imanasqam huchallikunchik hinaspa wañunchik? Bibliam nin Adanpa huchallikusqanrayku ‘wañuy munaychakuwasqanchikmanta’. Adanpa mirayninkuna kasqanchikraykum llapallanchik huchapa munaychakusqan kanchik hinaspam wañunchik (Rom. 5:12, 14, 17). Chayna kaptinpas, tanteakuchwanmi kawsakuyninchikpi huchallikuyqa mana munaychakuwananchikpaq. ¿Imaynatam chaytaqa ruwachwan? Cristopa wañukusqanpi iñispam. Chaywanqa saqisunchikmi Diospa ancha kuyakuynin kawsakuyninchikpi munaychakunanpaq. Bibliam nin: “Hucha astawan qawachisqa kasqanpim Diosqa ancha kuyakuyninta runakunaman astawan qawachin. ¿Imapaq? Huchapa chaynataq wañuypa munaychakusqanman hina Diospa ancha kuyakuyninpas munaychakunanpaqmi, chaynapi runakuna mana huchayuqña Diospaq kanankupaq, chayqa runakuna wiñay kawsayta señorninchik Jesucristontakama chaskinankupaqmi”, nispa (Rom. 5:20, 21).

⁶ Pantaq runakuna kaspanchikpas, manam saqinanchikchu huchallikuy munaychakuwananchiktaqa. Chaymi mana allinta ruwaruspaqa, Jehova Diosta mañakunchik  pampachawananchikpaq. Apostol Pablom nirqa: “Huchaqa manam munaychakusunaykichikchu, qamkunaqa manam leypiñachu kachkankichik, aswanqa Diospa ancha kuyakuyninpiñam”, nispa (Rom. 6:14). Diospa ancha kuyakuynin kawsakuyninchikpi munaychakunanpaq saqispanchikqa ¿imaynatam yanapachikusun? Pablom nirqa ‘runakunapa mana allin munayninkunata hinaspa imapas mana allin kaqkunata’ qipanchananchikpaq hinaspapas yanapawasunmi kay tiempopi “allin yuyaywan ruwanapaq, allin ruwaq kanapaq hinaspa Diosta tukuy sunquwan servinapaq” (Tito 2:11, 12).

7, 8. ¿Ima ninantaq Diospa ancha kuyakuyninqa “tukuy imapim” qawakun nisqanqa? (Qaway 16 kaq paginapi fotota).

⁷ Apostol Pedrom nirqa: “Llapallaykichik yanapanakuychik, chaytaqa ruwaychik Diospa ancha kuyakuyninta chaskiq allin sirviente hinayá. Diospa ancha kuyakuyninqa tukuy imapim qawakun”, nispa (1 Ped. 4:10). ¿Ima ninantaq “Diospa ancha kuyakuyninqa tukuy imapim qawakun” nisqanqa? Ima sasachakuypi tarikuptinchikpas, Diosqa kallpatam quwasun (1 Ped. 1:6). Necesitasqanchikman hinataqmi imatapas quwasun sasachakuyninchikkunata atipanapaq.

⁸ Qawasqanchikman hinam, Jehova Diosqa ancha kuyakuyninta tukuy imapi qawachiwanchik. Apostol Juanmi qillqarqa: “Diospa ancha kuyasqan pay kasqanraykum llapallanchik Diospa ancha kuyakuyninta achkanpi paymanta chaskinchik”, nispa (Juan 1:16). Dios kuyakuyninta tukuy imapi qawachiwasqanchikraykum, achka bendicionkunata chaskinchik. Wakinmantayá yachasun.

9. (1) ¿Imaynatam yanapachikunchik Diospa ancha kuyakuyninwan? (2) ¿Imaynatam agradecekusqanchikta qawachisun?

⁹ Jehova Diosqa huchanchikkunatam pampachan. Jehova Diosqa ancha kuyakuynintam qawachiwanchik huchanchikta pampachaspan. Ichaqa sunqumanta wanakuptinchikmi pampachawanchik hinaspa mana allin kaqkunata manaña ruwaptinchikmi (leey 1 Juan 1:8, 9). Pablom hanaq pachapaq suyakuyniyuq iñiqmasinkunata yachachirqa imaynatam Jehova Dios huchakunata pampachasqanmanta. Diosmanta rimaspanmi nirqa: “Diosmi libraykuwanchik tutayaypi munaychakuqmanta hinaspam kuyasqan churinpa munaychakuyninpiña kananchikpaq churaykuwanchik. Churintakamam preciowan librasqa karqanchik. Arí, huchanchikmantam pampachasqa karqanchik”, nispa (Col. 1:13, 14). Ñuqanchikrayku Diospa ruwasqanta agradecekuspanchikqa, paytam hatunchasun. Jehova Diosqa huchanchikkunamantam pampachawanchik, chayraykum achka bendicionkunatapas chaskisun.

10. ¿Imapaqmi yanapawanchik Diospa ancha kuyakuyninqa?

¹⁰ Atichwanmi Jehova Dioswan hawka kayta hinaspa amistadnin kaytapas. Pantaq kasqanchikraykum nacesqanchikmantapacha Diospa enemigon kanchik. Chayna kaptinpas apostol Pablom nirqa: “Enemigon kachkaspanchikraqmi Dioswan allinyanakurunchik churinpa wañukusqanwan”, nispa (Rom. 5:10). Ñuqanchikrayku Jesuspa wañusqanwanmi Dioswan allinyanakuyta atinchik. Chaynapim atichwan Jehova Dioswan hawka hinaspa paypa amistadnin kaytapas. Ichaqa, ¿imapitaq kayqa tupan Diospa ancha kuyakuyninwanqa? Pablom hanaq pachapaq suyakuyniyuqkunata kaynata yachachirqa:  “Kunanqa iñisqanchikraykum Diospaqqa mana huchayuqña kanchik, chayraykuyá señorninchik Jesucristontakama Dioswan hawkayaypi hinalla kasunchik. Jesucristowantaqmi iñiyniyuq kasqanchikrayku Diospa ancha kuyakuyninta hayparunchik, hinaspam kunanqa Diospa kuyasqanña kachkanchik”, nispa (Rom. 5:1, 2). Anchatam agradecekunanchik Jehova Dioswan hawka hinaspa paypa amistadnin kasqanchikmanta.

11. ¿Imaynatam hanaq pachapaq suyakuyniyuqkuna ‘sapaq ovejakunata’ allin ruwaymanña pusamuchkanku?

¹¹ Atichwanmi Diospa qayllanpi allin ruwaq kaytaqa. Diosmanta willakuq Danielmi qillqarqa tukupay punchawkunapi hanaq pachapaq suyakuyniyuqkuna ‘achkallaña runakunata allin ruwaymanña’ pusamunankumanta (leey Daniel 12:3). ¿Imaynatam chayta ruwachkanku? Diospa munaychakuyninmanta willaspankum hinaspa kamachikuyninkunamanta millonnintin ‘sapaq ovejakunaman’ yachachispankum (Juan 10:16). Chaynatam hanaq pachapaq suyakuyniyuqkunaqa yanapachkanku Diospa qayllanpi allin ruwaqkuna kanankupaq. Chayna kayninkuqa atikun Jehova Diospa ancha kuyakuyninraykullam. Pablom yachachirqa: “Diosqa librawananchikpaq Cristo Jesuspa pagasqanwanmi allin ruwaqta hinaña paykunata qawan, chayqa ancha kuyakuyninta Dios qawachisqanrayku mana imallapaq qusqan regalom”, nispa (Rom. 3:23, 24).

12. ¿Ima ruwaytam atinchik Diospa ancha kuyakuyninrayku?

¹² Diosman asuykuytaqa atichwanmi mañakuspanchik. Diospa ancha kuyakuyninraykum, payta mañakuytaqa atinchik. Pablom nirqa Jehova Diospa tiyananqa ‘ancha kuyawaqninchik Diospa kamachinanpaq tiyanan’ kasqanta hinaspam kallpanchawanchik “mana recelaspa” chay tiyananman  asuykunanchikpaq (Heb. 4:16a). Haykapipas Jehova Dios mañakuytaqa atichwanmi Jesuspa sutinpi. Kayqa ancha kusikunapaqmi. Pablom nirqa: “Paynintakamam mana manchakuspa rimachwan hinaspapas paypi iñisqanchikraykum mana recelaspa Diosman asuykuchwan”, nispa (Efes. 3:12).

13. ¿Imaynatam Diosqa ancha kuyakuyninpi “necesitasqanchik tiempopi” yanapawanchik?

¹³ Atichwanmi yanapakuy chaskiyta tiempollanpi. Pablom kallpanchawanchik munasqanchik horapi Jehova Diosta mañakunapaq, “chaynapi yanapakuyta necesitasqanchik tiempopi llakipayasqa hinaspa kuyapayasqa kananchikpaq” (Heb. 4:16b). Imapas sasachakuyninchik kaptinqa Jehova Diospa yanapakuynintam mañakuchwan. Payqa mañakusqanchiktam uyarin, chayta mana ruwanan kaptinpas. Achka kutipim iñiqmasinchikkunata servichikun yanapawananchikpaq. Mañakusqanchikkunata uyarisqanraykum ‘mana manchakuspa kaynata nichwan: “Manam manchakusaqchu, Jehova Diosmi ñuqapa yanapawaqniyqa, ¿imanawanmantaq runaqa?”’, nispa (Heb. 13:6).

14. ¿Imatawanmi chaskinchik Jehova Dios anchata kuyawasqanchikrayku?

¹⁴ Atichwanmi kallpanchasqa kaytaqa. Jehova Diosqa anchata kuyawasqanchikraykum llumpay hukmanyasqa tarikuptinchikqa kallpanchawanchik (Sal. 51:17). Tesalonica llaqtapi iñiqkuna ñakarichisqa kaptinkum, paykunaman Pablo kaynata qillqarqa: “Taytanchik Diosqa kuyawanchikmi, hinaspam ancha kuyakuyninta quwaspanchik wiñaypaq consuelawanchik chaynataq prometewanchik suma-sumaq kaqta quwananchikpaq. Mañakuchkanikum paypas hinaspa señorninchik Jesucristopas consuelasunaykichikpaq hinaspa allinta takyachisunaykichikpaq”, niqta (2 Tes. 2:16, 17). ¡Anchatam kallpanchawanchik Jehova Dios anchata kuyawasqanchikrayku waqaychawasqanchikmanta yachayqa!

15. ¿Ima suyakuyniyuq kaytam atinchik Jehova Dios anchata kuyawasqanchikrayku?

¹⁵ Atichwanmi hamuq tiempopi wiñaypaq kawsakuyta. Huchallikuq runakuna kasqanchikraykum, Jehova Dios mana yanapawaptinchikqa mana atichwanchu ima suyakuyniyuq kaytapas (leey Salmo 49:7, 8). Ichaqa paymi sumaq suyakuyta quwanchik. ¿Mayqantaq chayqa? Jesusmi nirqa: “Taytayqariki munan churinta llapallan riqsiqkuna hinaspa paypi iñiqkuna wiñay kawsayniyuq kanankutam”, nispa (Juan 6:40). Jehova Dios anchata kuyawasqanchikraykum hamuq tiempopi wiñaypaq kawsakuyta atisunchik. Pablom nirqa: “Diosmi ancha kuyakuyninta qawachiwarqanchik, chaywanmi tukuy rikchaq runakuna salvakunqaku”, nispa (Tito 2:11).

16. ¿Imatam ruwarqaku Jesuspa tiemponpi wakin iñiqkunaqa?

¹⁶ Yachamusqanchikman hinam Jehova Diospa ancha kuyakuyninrayku achka yanapakuykunata chaskinchik. Ichaqa manam Dios ancha kuyakuq kasqanraykuqa imapas munasqanchiktaqa ruwananchikchu nitaq huchallikunanchikchu. Jesuspa tiemponpi wakin iñiqkunaqa ‘Diosninchikpa ancha kuyakuynintam tikrarurqaku mana pinqakuspa mana allinkuna ruwaykunamanña’ (Jud. 4). Yaqachusmi kay mana kasukuq iñiqkunaqa piensarqaku ima huchatapas ruwaptinku Jehova Dios haykapipas pampachaykunanta. Hikutarqakutaqmi wakin iñiqmasinkunatapas  paykuna hina huchallikunankupaq. Kunan pipas chayta ruwaqqa ‘ancha kuyawaqninchik Diospa espirituntam mana respetachkanchu’ (Heb. 10:29).

17. ¿Imata ruwanapaqmi Pedro qillqarqa?

¹⁷ Kunan tiempopipas satanasqa wakin iñiqmasinchikkunatam pantarachin huchallikuptinku Jehova Dios chaylla pampachaykunanta piensachispan. Jehova Diosqa sunqumanta wanakuq huchallikuqkunataqa pampachanmi. Ichaqa Diosqa munantaqmi mana allin ruwaykunata qipanchananchikpaq kallpanchakunanchikta. Apostol Pedrowanmi kaynata qillqachirqa: “Qawan-qawanllayá kaychik mana kasukuq runakuna mana allin ruwasqankuwan mana pantarachisunaykichikpaq, chaynapi kallpanchakusqaykichikpi mana pisiparunaykichikpaq. Aswanqa hinallayá Diospa ancha kuyakuyninta chaskiychik, hinaspapas hinallayá señorninchik hinaspa salvaqninchik Jesucristomantapas yachaychik”, niqta (2 Ped. 3:17, 18).

18. Jehova Dios ancha kuyakuyninta qawachiwasqanchikrayku, ¿imakunatam hukkunawan ruwananchik?

¹⁸ Jehova Diospa ancha kuyakuyninmanta agradecekuspanchikqa, tukuy ima quwasqanchikkunatam servichikusun payta hatunchanapaq hinaspa hukkunatapas yanapanapaq. ¿Imaynatam chayta ruwachwan? Pablom nirqa: “Diosqa sapakamamanmi atiyta quwanchik sapakama ruwayniyuq kanapaq, [...] chaynallataqyá hukkunata servinapaq kaqta chaskispapas hukkunata servisunchik, [...] pipas yachachinanpaq kaqta chaskiqpas yachachichunyá, [...] llakipayakuq kaqpas tukuy sunqumantayá llakipayachun”, nispa (Rom. 12:6-8). ¿Ima ninantaq kayna nisqanqa? Jehova Dios ancha kuyakuyninta qawachiwasqanchikraykum, kallpanchakunanchik paymanta willakunapaq, bibliamanta hukkunaman yachachinapaq, iñiqmasinchikkunata kallpanchanapaq hinaspa hukkunatapas pampachanapaq.

19. ¿Imamantam qatiqnin yachachikuypi yachasun?

¹⁹ Jehova Diosqa ancha kuyakuyninpim achka bendicionkunata quwanchik, chayraykum kallpanchakunanchik ‘Diospa ancha kuyakuyninmanta sumaq willakuykunata lliwta willakunanchikpaq’ (Hech. 20:24). Qatiqnin yachachikuypim kaymanta yachasunchik.