1. ¿Imanasqam pacienciakuq runakunawan kayta munanki?

 LLAPANCHIKMI munanchik pacienciakuq runawan kaytaqa ¿aw? Mana piñakuspa unay suyaqkunawanqa admirakunchikmi. Imapipas pantaruptinchik pipas pacienciakuwaptinchikqa anchatam kusikunchik. Anchatataqmi agradecekunchik bibliamanta yachachiwaqninchiktapas. Payqa manam amiruwarqanchikchu yachachiwasqanchikta mana chaylla entiendeptinchikpas utaq yachachiwasqanchikta ruwayman mana chaylla churaptinchikpas. Chaymantapas, astawanqa Jehova Diostam agradecekunchik llapallanchikwan pacienciakuq kasqanmanta (Rom. 2:4).

2. ¿Imakuna kaptintaq pacienciakuq kayqa sasa kanman?

² Anchatam kusikunchik ñuqanchikwan pipas pacienciakuptinqa. Ichaqa, ñuqanchik piwanpas pacienciakunanchik kaptinqa sasachakunchikpaschá. Ichapas chaylla piñakunchik carrowan richkaptinchik carro montonakuruptin manaña avanzarisqanchikrayku, astawanraq apurawman chayayta munaspaqa. Ichapas chaylla piñakunchik pipas burlakuwaptinchik utaq munasqanchikman hina mana ruwaptin. Wakinpiqa piensanchikpaschá Diospa prometewasqanchik sumaq huertaqa llumpayta unamusqanta. ¿Chaynakuna pasasurqankichu? Hinaptinqa ¿munawaqchu astawan pacienciakuq kayta? Chaymi kay yachachikuypi yachasun pacienciakuq kaymanta hinaspa imanasqa ancha allin kasqanmanta. Yachasuntaqmi pacienciakuq kanapaq imakuna yanapawananchikmantapas.

3. Pacienciakuq runaqa, ¿imaynam hukkuna piñachiptinñapas utaq apurawña kaspanpas?

³ Yachaykusun pacienciakuq runa imayna kasqanmanta. Chayna runaqa manam chayllachu piñakun. Piñachiptinkuñapas utaq apurawña kaspanpas hawkallam. Manataqmi kutichikunchu mana  allinta ruwaptinkupas. Diospas pacienciakuq kasqanmantam Exodo libropi chayllaraq riman. Chaypim kaynata nin: “Ñuqa Jehova Diosqa kani llakipayarikuqmi, ñuqa Jehova Diosqa kani kuyapayakuqmi, mana chaylla piñakuqmi, imaña kaptinpas ancha kuyakuqmi, mana llullakuqmi”, nispa (Ex. 34:6).

4. ¿Imaynam pacienciakuq runaqa imapas suyasqan llumpayta unamuptinpas?

⁴ Chaymantapas, pacienciakuq runaqa hawkalla suyaytam yachan. Imapas suyasqan llumpayta unamuptinpas manam piñakunchu nitaq llumpaytaqa preocupakunchu (Mat. 18:26, 27). Ñuqanchikpas sapa kutim pacienciakunanchik kanqa. Pipas imatapas willakuwaptinchikqa sumaqtam uyariykuna, manam rimanachu willayta tukuwananchikkama (Job 36:2). Pacienciakunanchiktaqmi yachachisqanchik runa bibliapa ima nisqantapas mana chaylla entiendeptinqa, utaq mana allin ruwasqanta manaraq saqiptinqa.

5. Imatapas ruwananchik kaptinqa, ¿imaynatam pacienciakuq kachwan?

⁵ Pacienciakuq runaqa manam loco hinachu imatapas ruwan. Wakillanpim imatapas chaylla ruwana kanqa. Wakin ruwaykunam ichaqa sumaqta piensariykuspa ruwana. Chayna kaptinqa, pacienciakuq runaqa manam chayllachu ruwan nitaq apurawllamanñachu tukurun. Aswanqa imaynata ruwananpaqmi allinta tantiananpaq tiempochakun, hinaspam sumaq pacienciawan ruwayta qallaykun allinpuni lluqsinanpaq.

6. ¿Imatam pacienciakuq runaqa ruwan imapas llakichiptinqa?

⁶ Pacienciakuq runaqa imapas pasaptinqa mana rimapakuspallam aguantan. Arí, pacienciakuq runaqa aguantaytam yachan. Imapas sunqunchikta llakichiwaptinchikqa kuyasqa amistadninchikmanmi willachwan, chayqa manam huchachu. Ichaqa, pacienciakuq runaqa imaña llakichiptinpas hinallam kallpanchakun Diosninchikta kusisqa servinanpaq (Col. 1:11). Arí, Diosta serviqkunaqa kimsa parrafomanta rimamusqanchikman hinam pacienciakuq kananchik. ¿Imanasqa? Chaymantayá qatiqninpi yachaykusun.

7. Santiago 5:7, 8 nisqanman hinaqa, ¿imanasqam pacienciakuq kananchik? (Qaway dibujokunatapas).

⁷ Pacienciakuq kaspaqa salvasqam kasun. Ñawpaq tiempopi Diosta serviqkuna hinam ñuqanchikpas pacienciawan suyananchik imapas prometewasqanchikkunata Dios cumplinankama (Heb. 6:11, 12). Bibliapim tupachiwanchik chakrapi llamkakuq runawan (leey Santiago 5:7, 8). Chakrapi llamkakuqqa anchata kallpanchakuspam tarpun hinaspa parqun, ichaqa manam yachanchu haykapipuni cosechanantaqa. Chaywanpas, cosechananmanta mana iskayrayaspam pacienciawan suyan. Chaynallataqmi ñuqanchikpas ‘mana yachanchikchu imay punchaw señorninchik hamunanta’. Chaywanpas hinallam kallpanchakunchik Jehova Diospaq llamkaypi (Mat. 24:42). Arí, pacienciawanmi suyachkanchik. Manam iskayrayanchikchu tiempollanpi imapas prometewasqanchikta Diosninchik cumplinantaqa. Mana pacienciakuq kaspam ichaqa suyayta amiruchwan, hinaspam pisi-pisimanta Diospa llaqtanmanta karunchakuruchwan. Chaymantapas, mana pacienciayuq kaspaqa kunan tiempopi kusirikuykunallatam maskachwan. Pacienciakuq kaspam ichaqa tukupaykama aguantasqanchikrayku salvasqa kasun (Miq. 7:7; Mat. 24:13).

8. Pacienciakuq kaspaqa, ¿imaynam hukkunawanpas kasun? (Rimarimuytaq Colosenses 3:12, 13 nisqanmantapas).

⁸ Pacienciakuq kaspaqa hukkunawanpas allinllam apanakusun. Imata willakuwaptinchikpas sumaqtam uyarikusun (Sant. 1:19). Chaymantapas, pacienciayuq kaspaqa apurawña kaspapas utaq pi piñarikuwaptinchikpas manam loco hinachu imatapas ruwasun, nitaq nanay simiwanchu pitapas qaqchasun. Pi insultawaptinchikpas manam chayllaqa piñakusunchu nitaq kutichikusunchu, aswanqa hinallam mana amiruspa pampachanakusun. Tukuy chaykunata ruwaspaqa piwanpas hawkallam kawsakusun (leey Colosenses 3:12, 13).

9. ¿Imaynatam pacienciayuq kayqa yanapawanchik imapipas allinta tantiakunapaq? (Rimarimuytaq Proverbios 21:5 nisqanmantapas).

⁹ Pacienciakuq kaspaqa allintataqmi imapaqpas tantiakusun. Manam loco hinachu mana piensarispa ruwasun, aswanqa tiempochakusunmi “¿kaytachu icha waktachu ruwayman? ¿Mayqintaq allin kanman?” nispa allinta tantiarinapaq (leey Proverbios 21:5). Ichapas llamkayninchik mana kasqanrayku ima llamkaytañapas chaskikuchwan, huñunakuyman wakinpi mana rinanchik kaptinpas utaq as horallataña Diosmanta willakunanchik kaptinpas. Pacienciakuq runa kaspam ichaqa sumaqta piensarisun maypi llamkanamanta, hayka hora llamkanamanta, hinaspa Diosninchikwan chaynataq familianchikwan llamkayninchikrayku imayna kanamanta. Chaykunapi pacienciawan piensaspaqa allintam tantiakusun.

10. ¿Imatam ruwachwan aswan pacienciakuq kanapaq?

¹⁰ Jehova Diostayá mañakusun aswan pacienciakuq kanapaq. Pipas Diospa atiynin yanapaptinqa pacienciakuqmi (Gal. 5:22, 23). Chayraykum Jehova Diostaqa mañakuchwan atiyninwan yanapawaptinchik pacienciakuq kanapaq. Sichu imapas kasqanrayku sasachakuchkanki pacienciakuq kayta hinaspaqa, Jehova Diosta mañakuy atiyninwan yanapaykusunaykipaq (Luc. 11:9, 13). Mañakuspaykiqa Jehova Diostam niwaq imamantapas pay hina piensaq kanaykipaq. Chaymantam kikikipas sapa punchaw kallpanchakuwaq pacienciakuq kanaykipaq. Pacienciakuq kanapaq Diosta hinalla mañakuspaqa hinaspa chayna kanapaq kikinchikpas kallpanchakuspaqa, pisi-pisimantam pacienciakuq runaña kasunchik.

11, 12. ¿Imatam Jehova Diosqa ruwarqa pacienciakuq kasqanrayku?

¹¹ Bibliapi rikuriq pacienciakuq runakunapiyá yuyaymanasun. Bibliata leespaqa yachanchikmi achka pacienciakuq runakunamanta.  Ima ruwasqankupi yuyaymanaspaqa paykuna hinam ñuqanchikpas pacienciakuq kayta yachasun. Paykunamantam yachaykunanchik kanqa. Ichaqa puntataqa yachaykusun pimantapas aswan pacienciakuqmantam, payqa Jehova Diosmi.

¹² Eden huertapim Satanasqa Jehova Diosmanta llullata rimarqa, hinaspam hukkunatapas iskayrayachirqa Diosqa allin kamachiq hinaspa kuyakuq kasqanmanta. Satanasta chay ruwasqanmanta chaylla chinkarachinanmantaqa, Diosqa pacienciakurqam, controlakurqam. Payqa yacharqam allin kamachiq kasqanmanta yachanankupaqqa tiempo pasananta. Chaymi kay pachata satanas kamachinankama hinalla aguantachkan sutinmanta llullakuna rimasqankuta. Chaymantapas, Jehova Dios pacienciakuq kasqanraykum wara-waranqantin runakuna payta riqsirunku, hinaspam kallpanchakuchkanku wiñay kawsayta chaskinankupaq (2 Ped. 3:9, 15). Ñuqanchikwan Dios pacienciakusqanrayku allin kaqkuna pasakusqanta sapa kuti yuyarispaqa, manam amirusunchu mana allinkuna chinkachinan tiempo suyaytaqa.

13. ¿Imaynatam Jesusqa taytanpa pacienciakuq kasqanta qatipakurqa? (Qaway fototapas).

¹³ Jesuspas taytanta qatipakuspanmi pacienciakuq karqa, chayna kasqanmi yachakurqa kay allpa pachapi kaptin. Escribakunawan fariseokunaqa iskay uyakunam karqaku. Paykunam Jesuspa umanta nanachiq, paykunawanqa Jesusqa sasachakurqachá pacienciakuq kayta (Juan 8:25-27). Chaywanpas Jesusqa taytan hinam mana chaylla piñakuq karqa. Kamiptinkupas, insultaptinkupas enemigontaqa manam kutipakurqachu (1 Ped. 2:23). Aswanqa mana rimapakuspam paykunata pacienciawan aguantarqa. Chaychá ñuqanchiktapas bibliapi kaynata niwanchik: “Jesuspiyá sumaqta hinaspa allinta yuyaymanaychik [...], payqa huchasapa runakunapa tukuy ima kamisqantam aguantarqa”, nispa (Heb. 12:2, 3). Ñuqanchikpas, ima sasachakuyña  chayamuwaptinchikpas Diospa yanapakuyninwanqa pacienciawanmi aguantayta atisun.

14. ¿Imatam yachanchik Abrahan pacienciakuq kasqanmanta? (Rimarimuytaq Hebreos 6:15 nisqanmantapas, qawaytaq dibujotawan fototapas).

¹⁴ ¿Imataq yanapawasun mana allinkunata Diospa chinkachinan tiempota pacienciawan suyanapaq? Ichapas ninchik: “Ñuqaqa piensarqanim kay tiempoqa Diospa piñakuynin chayamunantaña, ichaqa manaraqmi chayamunraqchu. Kaynallaqa manapaschusmi rikusaqchu”, nispa. Chaynata piensaspaqa, Abrahantayá yuyarisun. “Qanmantam runakuna miranqa”, nispa Abrahanta Dios prometeptinqa payqa 75 watanpiñam kachkarqa, manataqmi churinpas karqaraqchu (Gen. 12:1-4). Diospa chayna prometesqanta ¿Abrahan rikunmanchu karqa? Arí, ichaqa wakillantam. Eufrates mayuta chimpasqanmantapacham 25 wata suyanan karqa churin Isaac nacenanpaq. Chaymanta 60 wata pasaytañam willkan Esaupas hinaspa Jacobpas chayraq nacerqa (leey Hebreos 6:15). Arí, Abrahanqa manamá rikurqachu mirayninkuna hatun nacion rikuriruspa Diospa prometesqan allpapi yachasqankutaqa. Chayta mana rikuspapas Abrahanqa Jehova Dioswanmi anchata kuyachikurqa (Sant. 2:23). ¡Mayna kusisqachá Abrahanqa tarikunqa kawsarimuspaqa! Chay tiempoqa yachanqam Diospi iñiyniyuq hinaspa pacienciakuq kasqanrayku lliw nacionkuna payrayku bendecisqa kasqanmanta (Gen. 22:18). ¿Imatam Abrahanmanta yachanchik? Manapaschá rikusunchu Diospa wakin prometewasqanchikkuna kunan tiempopi imayna cumplikunantaqa. Ichaqa, Abrahan hina pacienciakuq kaptinchikqa kunanpas Jehova Diosqa bendeciwasunmi, astawanraq musuq allpa pachapiqa (Mar. 10:29, 30).

15. ¿Pikunamantam sapallanchikpi estudiachwan?

¹⁵ Bibliaqa willawanchiktaqmi Diosta serviq achka runakuna pacienciakuq kasqankumanta  (Sant. 5:10). Paykunamanta yachayninchikqa allintam yanapawasun. b Davidqa warmachallaraq kachkaspanmi Israel nacionpa kamachiqnin kananpaq akllasqa karqa. Ichaqa unay wataraqmi suyanan karqa kamachiyta qallarinanpaqqa. Simeonpas chaynataq Anapas unay watam Diosta servispa suyananku karqa Diospa churin Cristota rikunankupaq (Luc. 2:25, 36-38). Paykunamanta yachaspaykiqa tapukuy: “¿Imataq pacienciakuq runa kananpaq yanaparqa? ¿Imanasqam pacienciakuq kayninqa ancha allin karqa? ¿Imaynatam qatipakuyman?”, nispa. Mana pacienciayuq kaqkunamantapas yachachwantaqmi imayna mana kanapaq (1 Sam. 13:8-14). Tapukuchwanmi: “¿Imanasqataq mana pacienciakuq karqa? ¿Imapim tukurqa mana pacienciakuq kasqanrayku?”, nispa.

16. Willarimuy pacienciakuq kayqa imanasqa allinninchikpaq kasqanmanta.

¹⁶ Pacienciakuq kayqa allinninchikpaq kasqantayá yuyarisun. Pacienciakuq kaspaqa kusisqam chaynataq hawkallam kawsakusun, chaymi sanoy-sanoylla kasunchik. Pacienciakuq kaspaqa hukkunawanpas allinllam apanakusun, iñiqmasinchikkunawanpas huk sunqullam kasun. Pipas piñachiwaptinchik mana chaylla piñakuspaqa manam hatun sasachakuymanqa chayasunchu (Sal. 37:8, Prov. 14:29). Chaymantapas, pacienciayuq kaspaqa Jehova Diostam qatipakuchkanchik hinaspam astawan asuykuchkanchik. Chaymi imamantapas aswan allinqa.

17. ¿Imayna kanapaqmi kallpanchakunanchik?

¹⁷ Yachamusqanchikman hinam pacienciakuq runataqa lliw allinpaq qawanku. Chaymantapas allinninchikpaqmi. Wakinpi pacienciakunapaq sasachakuptinchikpas Jehova Diosqa hinallam yanapawasun pacienciakuq kanapaq. Musuq allpa pacha chayamunanta pacienciawan suyasqanchiktam Jehova Diosqa kusisqa qawamuchkan. Payqa ‘yanapawananchikta suyanakamam imaña kaptinpas hinalla kuyawasun’ (Sal. 33:22). Chaynaqa, pachawan churakuchkaq hinayá sapakama kallpanchakusun pacienciakuq kanapaq.