¡IMA SUMAQMI CHAYQA! Jehova Diosqa munachkanmi wiña-wiñaypaq kay pachapi kawsakunanchikta. Ichaqa achka runakunapaqmi chayqa yanqa willakuylla. Wakinqa ninkum wañuqlla kasqanchikrayku wiñaypaq kawsakuytaqa mana atisqanchikta, wakinñataqmi ninku hanaq pachapi wiñaypaq kawsakunanchikmanta. Qamqa, ¿ima niwaqtaq?

Chayta yachaykunaykipaq kay tapukuykunamantaraq bibliawan allinta yachaykusun: ¿Hayka wata kawsakunapaqtaq Diosqa unanchawarqanchik? ¿Imapaqtaq Diosqa kay pachatawan runakunatapas unancharqa? ¿Imanasqataq wañunchik?

Runakunataqa manam animalchakunata hinachu Diosqa unanchawarqanchik, chaymi mana chaynallachu animalkunawanqa kanchik. Bibliapa nisqanman hinaqa ñuqallanchikmi Diospa rikchayninman hina unanchasqaqa kanchik (Genesis 1:26, 27). Chaymi Diospa imayna kasqanman hina kuyakuq kayta atinchik chaynataq allin kaqta ruwayta munanchik.

Chaymantapas Diosmi yuyayta quwanchik, chaynapi allin kaqtapas utaq mana allin kaqtapas akllakunapaq, chaynataq Diospa kuyasqan kayta maskanapaq. Chaymi anchata kusikunchik Diospa unanchasqankunata qawaspa, takikunata uyarispa utaq imata ruwaspapas. Chaymantapas Diosta yupaychanapaq unanchasqa kasqanchikraykum mana chaynallachu kanchik animalkunawanqa.

Sichum as watakunalla kawsananchikpaq Dios unanchawaptinchikqa, ¿imanasqataq imakunatapas ruway atiqta hinaspa maynatañapas yachay atiqta unanchawarqanchik? Wiña-wiñaypaq kusisqa kawsakunanchikta munasqanraykum.

Wakin runakunaqa ninkum kay pachapiqa akllasqa kanallanchikpaq unanchasqa kasqanchikta, chaynapi akllasqakunalla Dioswan hanaq pachapi wiñaypaq kawsakunankupaq. Ichaqa, akllasqa kanallanchikpaq kay pachapi kaptinchikqa, ¿Dioschiki huchayuq kanman kay pachapi tukuy mana allinkunamantaqa aw? Ichaqa manam chaynachu, Diosqa allin kaqkunallata ruwaqmi. Bibliapim  nin: ‘Ruwayninkunapas allinpunim. Payqa chiqap Diosmi, paypiqa manam ima mana allinpas kanchu, payqa derechonpim imatapas ruwan’, nispa (Deuteronomio 32:4).

Bibliapiqa nichkanmi imapaq kay pachata Dios unanchasqanmanta. Ninmi: ‘Hanaq pachaqa Jehova Diospam, kay pachatañataqmi runakunaman qurqa’, nispa (Salmo 115:16). Diosqa kay pachatam suma-sumaqta unancharqa runakuna wiña-wiñaypaq kusisqa kawsakunanchikpaq (Genesis 2:8, 9).

‘Hanaq pachaqa Jehova Diospam, kay pachatañataqmi runakunaman qurqa’ (Salmo 115:16).

Bibliapiqa nichkantaqmi imapaq Dios unanchawasqanchikmantapas. Adantawan Evata unancharuspanmi Dios nirqa: “Kay pachaman huntaychik, hinaspa munaychakuychik [...] tukuy rikchaq animalkunapipas”, nispa (Genesis 1:28). Paykunaqa kay pachata sumaqta huertayachispankum churi-wawankunawan kay pachapi wiñaypaq kawsakunanku karqa, manam hanaq pachapichu.

Bibliapiqa willakuntaqmi hanaq pachapi angelkunamanta huk kaqnin angel, Diospa contranpi hatarirusqanmanta. Chayraykum chay angelqa satanaswan sutichasqa karqa.

Satanasqa Adantawan Evatam pantarachirqa Diospa contranpi hatarinankupaq. Nirqam Diosqa allinninkuta mana munaspan munasqankuman hina kawsakunankuta mana saqisqanta. Paykunañataqmi satanasta kasukuspanku Diosta qipancharurqaku. Chaymi Diospa nisqanman hina yuyaqyaruspanku wañururqaku, manañam wiñaypaq kawsakuytaqa atirqakuchu (Genesis 2:17; 3:1-6; 5:5).

Chaymantapacham runakunaqa wañuqlla kanchik. Chaymi bibliapi nin: “Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa lliw huchallikurusqankurayku”, nispa (Romanos 5:12). Chaynaqa, manam Dios munasqanraykuchu runakunaqa wañunchik, aswanqa Adanmantawan Evamanta huchata chaskisqanchikraykum.

Eden huertapi chaykuna karuptinpas Diosqa hinallam munayninta kay pachapi ruwanqa. Diosqa kuyakuq hinaspa allin ruwaq kasqanraykum wañuymantawan huchamanta librawanchik. Chaymanta rimaspanmi apostol Pablo nirqa: “Huchapa pagonqariki wañuymi, Diospa regalonmi ichaqa señorninchik Cristo Jesusrayku wiñaypaq kawsakuy”, nispa (Romanos 6:23). Anchata kuyawasqanchikraykum Diosqa ‘sapallan churin [Jesusta] qumurqa haykam paypi iñiqqa mana wañuchisqa kananchikpaq, aswanqa wiñay kawsayniyuq kananchikpaq’ (Juan 3:16). Jesus vidanta qusqanraykum wiñaypaq kawsakuyta atichwan. a

Ñam Diospa nisqanman hina kay pachaqa huertayachisqaña kanqa. Chay sumaq kawsakuyta haypanaykipaqqa Jesuspa nisqantam kasukunayki. Paymi nirqa: “Kichki punkuntayá yaykuychikqa, hatun punkuqa hinaspa hatun ñanqa wañuymanmi apakun, achkallañam chaynintaqa yaykuchkanku, kichki punkuwan kichki ñanmi ichaqa kawsayman apakun, chaytaqa asllam tarinku”, nispa (Mateo 7:13, 14). Chaynaqa, qanmantam kanqa wiñaypaq kawsakuynikiqa.