Brasil nacionmanta huk taytam nin: “Familiawan Diosta Yupaychasqayku Tutapiqa mana musyayllam horaqa pasarun”, nispa. Japón nacionmanta huk taytapas nintaqmi 10 watanpi kaq qari churin imay hora kasqanta mana musyakuspalla hinalla estudiay munasqanmanta. ¿Imanasqa? Kikin taytam nin: “Kallpanchasqa tarikuspanmi ancha kusisqa tarikun”, nispa.

Chayna kaptinpas, manam lliw warmakunachu kallpanchasqa tarikunku. Wakinkuqa manam kusisqachu tarikunku familiawan estudiaspankuqa. ¿Imanasqa? Qellapakusqankuraykum. Togo nacionmanta huk taytam nin: “Jehova Diosta yupaychayqa manam qellapakunapaq hinachu kanan”, nispa. Qellapakunapaq hinaqa kanman ichapas mana kallpanchaq tayta yachachisqanrayku. Chaywanpas, achka familiakunam musyakurqaku familiawan estudiayqa, samana punchawmanta Isaiaspa nisqanman hina ‘kusikunapaq’ kasqanta (Is. 58:13, 14).

Cristiano tayta-mamakunaqa yachankum llapanku hawka tarikuptillanku familiawan estudiayqa kusikunapaq hina kananmanta. Kimsa warmi churiyoq hinaspa huk qari churiyoq kaq Ralf sutiyoq taytam nin familiawan estudiasqankupi llapanku rimarisqankumanta. Ichaqa, manam lliwchu atencionwan uyariyta munanqaku. Huk mamam nin: “Kusikunapaq hina familiapi estudiay kananta munaspaypas, manam wakinpiqa chayna kananpaq ruwayta atinichu”, nispa. ¿Imaynatam tayta-mamakuna chay sasachakuyta atipanmanku?

Alemania nacionmanta iskay churiyoq huk taytam nin: “Tayta-mamakunaqa entiendeqmi kananchik”, nispa. Iskay warmi wawayoq Nataliañataqmi nin: “Familiaypi imayna estudiayniyku sapa kuti hina kaqlla kananmantaqa, imayna tarikusqaykuman hina cambiayniykum ancha allin”, nispa. Achka familiakunam  estudiasqanku horata achkaman rakinku. Brasil nacionmanta iskay warmayoq Cleiton sutiyoq taytam nin: “Estudiasqayku horata rakiyniykum aswan kusikunapaq hinaspa llapayku rimarinaykupaq yanapawanku”, nispa. Churi-wawakuna mana chaynalla watayoq kasqankurayku horata rakiyqa yanapakunmi sapakamapa imayna tarikusqankuta uyarinapaq. Tayta-mamakunaqa tanteanmankum sapakama ima necesitasqankupi hinaspankum chayman hina yachachikuyta akllaspanku yachachinanku.

¿Imatam wakin familiakuna ruwanku estudiayninku mana chaynalla kananpaq? Wakinkuqa Jehova Diospaq takispankum qallarinku. México nacionmanta Juan sutiyoq taytam nin: “Chayna takispa qallariyniykum yanapawanku estudiayniyku ancha kusikunapaq hina kananpaq hinaspapas yuyayniykutam kicharin yachanaykupaq”, nispa. Paypa familianmi chay tutapaq yachachikuywan tupaq takikunata akllan.

Wakin familiakunaqa kuskankum Bibliata leenku. Estudiayninku aswan allin kananpaqmi Bibliapa nisqanta leenankupaq tupachinakunku. Japón nacionmanta huk taytam nin chayna ruwayninku qallariypi paypaq hukman rikchakusqanmanta. Iskay warmankum ichaqa anchata gustanku tayta-mamanku paykunawan chayna ruwasqankuta. Wakin familiakunañataqmi Bibliapi kaq willakuykunata dramata hinaraq ruwanku. Sudáfrica lawmanta iskay churiyoq Rogermi nin: “Warmachakunaqa Bibliapa wakin willakuyninkunata tayta-mamakuna mana musyasqanchiktam astawan musyanku”, nispa.

Ancha allintaqmi familiapi estudianapaq ima llamkaypipas llapanku llamkayninku, ichapas kanman Noeypa buque ruwasqanta hinaspa Salomonpa templo ruwasqanta taksachallata ruway. Chay llamkaykunata ruwayqa ancha kusikunapaqmi kanman. Asia lawpim pichqa watachayoq warmacha, tayta-maman hinaspa abuelan ruwarurqaku apostol Pablopa viajasqanmanta pukllanata. Wakin familiakunañataqmi Exodo libropi kaq willakuykunamanta pukllanakunata ruwarurqaku. Togo nacionmanta 19 watanpi Donald sutiyoq mozom nin: “Familiawan estudiasqaykupi mana chaynallata ruwasqaykum, ancha kusisqata tarichiwanku”, nispa. ¿Atiwaqchikchu imatapas ruwayta chaynapi familiapi estudiaynikichik aswan allin kananpaq?

Familiawan estudiayninchikpi mana chaynallata ruway hinaspa entiendeq kay ancha allin kaptinpas, yachachikuywan astawan yanapachikunapaqmi llapallanku preparakunanku. Wakinpiqa familiawan estudiasqankupim mozo-sipaskunaqa pisiparunmanku. Chaymi yachachiqqa imata estudianankupaq allinta tanteanan hinaspam allinta preparakunanpaq tiempochakunan. Huk taytam nin: “Preparakuptiyqa llapankum allintapuni yanapachikunku”, nispa. Alemania nacionmanta huk taytam familianman willan qatiqnin semanakunapi imamanta estudianankupaq. Benín nacionpi soqta warmayoq huk familiam estudiananku horapi wakinpiqa videota qawanku. Hinaspapas llapanku preparakunankupaqmi ñawpaqmantaraq tayta qon achka tapukuykunata. Arí, allinta preparakuptinkuqa familiapi estudiayninkuqa ancha allinmi kanqa.

Ima estudianankumanta ñawpaqmantaraq llapallanku yachaspankuqa chay punchawkunapim chaymanta rimanmanku astawan yachayta munanankupaq. Sapakama ruwayniyoq kaspankuqa familiawan estudiayninkupim llapallanku yanapakunqaku.

Achka familiakunam mana atinkuchu sapa semana estudiayta.

Achka tayta-mamakunam familiankuta uywanankupaq achka hora llamkananku. México nacionmanta huk taytam wasinmanta lloqsin soqta hora tempranota, kutiykunñataqmi pusaq hora tutataña. Arí, wakinpiqa Familiawan Diosta Yupaychanapaq Tutatam huk punchawpaq cambiana kanqa, Dios serviyninchikpi imapas apakusqanrayku.

Chayna kaptinpas, tanteasqanchik punchawpi ruwanapaqmi kallpanchakunanchik. Togo nacionmanta 11 watanpi Loïs sutiyoq warmacham kaynata nin: “Wakinpi imapas pasakusqanrayku imam horata mana qallarispaykupas manam haykapipas familiawan estudiaytaqa saqenikuchu”, nispa. Sapa semana familiawan estudiayninchik kananpaqmi, allin kanman semanapa qallariynin punchawpi ruway, chaynapi ima pasakuptinpas chay semanallapi ruwanapaq.

Familiawan estudiayqa Diosta yupaychanapaqmi. Kallpanchakuy llapallan familiayki sapa semana ‘ofrendawan hina’ Jehova Diosta alabanankupaq (Os. 14:2). Kallpanchakuytaq familiawan estudianapaq tuta ancha kusikunapaq hina kananpaq, ‘Diospa kusikuyninqa amparawaqninchik wasi hinamá’ (Neh. 8:9, 10).