Gran Bretañamanta wakin willakuykunam yanapasunki haykapipas mana suyayta amirunaykipaq. Chaymantapas, ‘lamar qochaman tantata wischuchkaq hinayá aypuy tantaykita’ nispa Bibliapa nisqanta imayna ruwanaykipaqmi yachanki, yachankitaqmi manaraq Diosmanta yachaqkunata imayna yanapanaykipaqpas (Ecl. 11:1).

Ama haykapipas saqeychu hinalla aguantasqaykitaqa. Cheqap yachachikuykunapim suni takyanayki hinaspapas Jehova Diospim allinta hapipakunayki (Deut. 10:20). Chaytam ruwarqa Georgina sutiyoq cristiana. Kyriacos sutiyoq qosanmi llumpayta piñakururqa Jehova Diospa testigonkunawan 1970 kaq watapi Bibliata estudiayta qallaykuptin. Kyriacos qosanmi Georginata Biblia estudiasqanta saqenanpaq nirqa, manataqmi munaqchu wasinman testigokuna yaykunankutapas hinaspanmi tarisqan qellqanchikkunatapas chinkachiq.

Qosanmi astawanña piñakururqa Georgina huñunakuykunaman riyta qallaykuptin. Huk kutipim Salonman rirqa chaqwata ruwananpaq. Chaypi huk cristianam musyakururqa chay runa griego rimayta astawan yachasqanta, chaymi telefonontakama huk congregacionmanta griego rimayniyoq cristianota qayarqa yanapaykunankupaq. Kyriacosqa anchatam admirakurqa chay cristiano kuyakuywan rimapayasqanmanta, chaymi Bibliatapas huk-iskay killakuna estudiayta qallaykurqa. Ichaqa qonqayllamantam estudiasqanta saqerurqa.

Georginaqa kimsa watam qosanpa harkakusqanta hinalla aguantarqa. Arí, Kyriacos qosanqa nirqam bautizakuruptin saqerunanmanta, chaymi Georginaqa bautizakusqan punchawpi Jehova Diosta mañakurqa qosan mana saqenanpaq. Ichaqa iñiqmasinkuna Georginata Asambleaman pusanankupaq wasinman chayaruptinkum, Kyriacosqa nirqa: “Qamkunayá puntata riychik. Ñoqaykuqa carroykupim qatisqaykiku”, nispa. Uyarinanpaqmi chawpi punchawkama Asambleapi qeparqa, ¡hinaspanmi señoranpa bautizakusqantapas qawarqa!

Chaymantapacham Kyriacosqa manaña llumpaytaqa harkakurqañachu, hinaspanmi imayna kasqanpipas cambiarqa. Tiempopa risqanman hinam payqa bautizakururqa. ¿Hayka tiempotaq pasarqa qallariyllapi testigokunawan rimasqanmanta? ¡Yaqa 40 watakunam! Kyriacosmi nin: “Anchatam kusikuni señoray iñiyninpi suni takyasqanmanta”, nispa. Georginañataqmi nin: “Qosay llumpayta harkakuptinpas, manam haykapipas Jehova Dios serviyniytaqa saqeyta munarqanichu. Tukuy chay watakunaqa Jehova Diostam sapa kuti mañakurqani hinaspapas manam haykapipas amirqanichu suyaytaqa”, nispa.

Imayna kayninchikpas allintam yanapawachwan mana iñiq qosata otaq señorata yanapanapaqqa. Apostol Pedrom señorakunata nirqa: “Qamkunapas qosaykichiktayá kasuychik, chaynapim Diospa palabranpi mana iñiq qosakunapas mana rimapayachkasqalla allin kawsasqaykichikwan iñikunqaku”, nispa (1 Ped. 3:1). Christine sutiyoq iñiqmasinchikmi chay kamachikuyta kasukurqa achka watakuna pasaruptinpas. John sutiyoq qosanmanmi allin ruwaykunawan sumaq kayninkunata qawachirqa. Christine 20 wata masnin Jehova Diospa testigon hina bautizakuptinmi, qosanqa Diospi iñiyta mana munaqchu. Ichaqa religionniyoq kayta mana munaspanpas, musyakurqam señoranpa iñiyninqa paypaq aswan allin kasqanta. Johnmi nin: “Musyakurqanim señorayta kusichisqanta. Imapas tanteananpaqmi aswan kallpanchasqaña tarikurqa, chayqa ñoqatapas yanapawarqam sasachakuykunata atipanaypaq”, nispa.

Christineqa manam haykapipas qosantaqa religionninman iñikunanpaqqa hikutarqachu. Johnmi nin: “Christineqa puntamantaraqmi musyakurqa iñikunaypaq hikutawaptinqa mana munanaymanta, chaymi pacienciakuspan pisi-pisillamanta yachanaypaq saqewarqa”, nispa. Willakuq otaq ¡Rikchariy!, qellqakunapi Johnta gustasqan yachachikuykuna rikuriptinqa Christineqa qawachispanmi niq: “Yaqachusmi kay yachachikuyta munawaq leeyta”, nispa.

Llamkasqanmanta jubilakuruspanmi, Johnqa huertanta allichaq. Mana ancha ruwayniyoq kasqanraykum imanasqa kawsasqanmanta astawan yuyaymanayta qallaykurqa. Paymi tapukuq: “¿Qonqayllamantachu rikurirqanchik icha unanchasqachu karqanchik?”, nispa. Huk punchawmi huk iñiqmasinchik tapurqa sichu munanman Biblia estudiayta. Paymi nin: “Diospi iñiyta qallaykuchkasqayraykum, watukamuwananpaq nirqani”, nispa.

¡Mayna allinmá karqa Christine suyasqanpi mana amirusqanqa! 20 watapunim Jehova Diosta mañakurqa qosanpaq, hinaspanmi Christineqa cheqap yachachikuykunata qosan chaskikuspan bautizakusqanta qawarqa. Kunanqa Jehova Diostam iskayninku kusisqa servichkanku. Johnmi willakun: “Iskay kaqkunam Jehova Diosmanta yachanaypaq yanapawarqa. Huk kaqninmi karqa kuyapayakuywan Testigokuna rimapayawasqanku. Yanapawarqataqmi, Jehova Diospa testigonwan casarasqa kasqay, señorayqa confiakunapaqmi hinaspa llampu sonqoyoqmi”, nispa. Christineqa 1 Pedro 3:1 nisqantam kasukurqa hinaspanmi qawarqa allinpi tukusqanta.

¿Imataq pasan Biblia yachachisqanchikmanta huk kaqnin estudiayta manaña munaptinqa? Rey Salomonmi qellqarqa: “Tutapaymanta muhuykita tarpuy. Ama pisipaspayki chisinkuytapas tarpuy. Manam yachankichu mayqen tarpusqaykim wiñamunanta. Manataqmi yachankichu iskayninku igualla wiñamunanta”, nispa (Ecl. 11:6). Wakinpiqa achka watakunam pasanman runakunapa sonqonpi cheqap yachachikuykuna wiñananpaq hinaspa Diosman asuykuy ancha allin kasqanta entiendenanpaqpas (Sant. 4:8). Chayrayku ichapas tiempopa risqanman hina uyariwaq kusikunapaq willakuyta.

Chaynam pasarqa Alice sutiyoq iñiqmasinchikta, payqa India nacionmantam Inglaterra nacionman ripukurqa, hinaptinmi 1974 kaq watapi Biblia estudiayta qallaykurqa. Hindi rimaytam rimaq, ichaqa ingles rimaytam astawan yachayta munarqa. Achka watakunam Bibliata estudiarqa hinaspapas ingles rimaypi huñunakuykunamanmi rirqa. Bibliamanta yachasqankuna cheqap kasqanta musyakuspanpas, manam kaqpaqpas hapirqachu. Chaymantapas, anchatam munarqa qollqeyoq kayta hinaspa fiestakunaman riytapas. Chaymi tiempopa risqanman hina estudiasqanta saqerurqa.

Yaqa 30 wata qepatam Aliceqa Bibliamanta yachachiqnin Stella cristianaman qellqarqa. Chaypim nirqa: “Anchatachá kusikunki 1974 watapi Bibliamanta yachachisqayki, kimsa punchaw asambleapi bautizakusqanmanta. Qanmi vidaypi anchata yanaparuwarqanki. Cheqap yachachikuykunatam yachachiwarqanki, Diosman qokunaypaq manaraq atichkaspaypas chay yachachikuykunataqa yuyayniypiwan sonqoypim waqaycharqani”, nispa.

¿Imataq pasarurqa? Alicem willakun 1997 watapi qosan wañukuptin llumpay llakisqa tarikusqanmanta. Chaymi Diosta mañakurqa, hinaptinmi yaqa 10 minuto qepallanman panjabí rimayniyoq iskay testigokuna punkunta takaykuspanku saqerqaku ¿Ima suyakuymi kan kuyasqa ayllunchikkuna wañukuptin? niq tratadota. Mañakusqanta Dios uyarisqanta musyakuspanmi Jehova Diospa testigonkunata maskananpaq tantearurqa. ¿Maypitaq tarinman karqa? Alicem panjabí rimayniyoq congregacionpa direccionninta mawka cuadernopi tarirurqa, chay direcciontaqa Stellam qorqa. Salonman riptinmi iñiqmasinchikkuna kuyakuyllawanña chaskiykurqaku. Paymi nin: “Kuyakuyninkuta qawachiwasqankuwanmi manaña llumpaytaqa llakikurqanichu”, nispa.

Aliceqa lliw huñunakuykunamanmi rirqa, hinaspam kaqmanta Biblia estudiayta qallaykurqa, panjabí rimaytawan qellqaytapas allintam yacharurqa. Aliceqa 2003 watapim bautizakururqa. Stellaman carta qellqasqanmi kaynata tukun: “Anchatam agradecekuyki 29 wata ñawpaqtaraq cheqap yachachikuykunata sonqoypi tarpusqaykimanta hinaspa ñoqapaq allin ejemplo kasqaykimantapas”, nispa.

“Anchatam agradecekuyki ñawpaqtaraq cheqap 29 wata yachachikuykunata sonqoypi tarpusqaykimanta hinaspa ñoqapaq allin ejemplo kasqaykimantapas” (Alice)

¿Imatam yachachiwanchik kay willakuykunaqa? Ichapas unaytaña qamqa suyachkanki Diosta pipas servinanpaq. Ichaqa pipas Diosta kuyaptinqa chaynataq humilde hinaspa Bibliamanta yachayta munaptinqa, Jehova Diosqa saqenqam cheqap yachachikuykuna sonqonpi wiñananta. Yuyariy, tupanachisqanpi Jesus kay nisqanta: “Chay tarpusqan muhuñataqmi wiñamun, tarpuqmi ichaqa mana yachanchu imaynam wiñasqanta, chaytaqa allpam kikillanmanta wiñachimun. Ñawin puntata wiñamuspanmi hatunyaspan espigamun” (Mar. 4:27, 28). Muhuqa ‘kikillanmantam’ wiñamun hinaspapas wiñasqanqa pisi-pisimantam. Chaynaqa, hinallayá achkanpi cheqap yachachikuyta tarpuy, chaynata ruwaspaqa yaqapaschá achkata cosechanki.

Amataq qonqaychu Diosta mañakuyqa ancha allin kasqanta. Rimamusqanchik Georgina hinaspa Christine iñiqmasinchikkunam mana pisipaspa Diosta mañakurqaku. Sichu qam ‘tukuy tiempo Diosta mañakunki’ hinaspa suyayta mana aminkichu, hinaspaqa ichapas ‘punchawkuna pasaruptin’ kaqmanta tariruwaq lamar qochaman wischusqayki “tantata” (Rom. 12:12; Ecl. 11:1).