QAYNA watakunallam yaqa 50 watayoqña casarasqa Roald hinaspa Elsebeth sutiyoq iñiqmasinchikkuna Bergen llaqtapi yacharqaku, chaypiqa achka kapuqniyoqmi karqaku. Isabel hinaspa Fabian sutiyoq wawa-churinkupiwan kuskam paykunaqa Diosta serviqku. Roaldqa ancianom karqa, Elsebethñataq precursora. Isabelwan Fabianpas Diosmanta willakuypiqa kallpanchakuqkum.

Kay familiam tantearurqa karu llaqtachapi semanantin predicanankupaq. Chaymi 2009 wata septiembre killapi Roald, Elsebeth chaynataq 18 watanpi kaq Fabianpiwan kuska illarqaku Nordkinn lawpi Finnmark llaqtapi kaq Kjøllefjord sutiyoq llaqtachaman, chaypim karumanta hamuq huk iñiqmasinkunapiwan predicarqaku. Roaldmi nin: “Qallariy punchawkunaqa kusisqam sientekurqani chay semana predicanaypaq imam ruwanaykunata imayna saqenaypaq tanteasqaywanqa”, nispa. Ichaqa, ¿imam pasarurqa?

Kikin Roaldmi willakun: “Finnmark llaqtapi precursor kaq Mariom qonqaymanta tapuwarqaku Lakselv llaqtapi 23 predicaqkunata yanapaq rinaykumanta”, nispa. Chayna tapusqanta uyariruspanmi Roaldqa admirakurqa. Roaldqa nintaqmi: “Elsebethwanqa ñam piensarqaniku pisilla kaq predicaqkunapa kasqanpi yanapakunaykupaq. Ichaqa churi-wawaykuta manaña uywanayku kaptinñam”, nispa. Chay punchawkunallapim ichaqa Roald musyarurqa chay karu llaqtapi runakuna Diosmanta yachay munasqankuta. Paykunaqa chaylla yanapanatam munarqaku. Roaldmi nin: “Mariopa tapuwasqanwanmi puñuytapas mana atirqanichu”, nispa. Marioqa Roaldtawan familiantam carronpi aparqa karu-karuta Kjøllefjord sur lawkama (240 km.), Lakselv llaqtapi iñiqmasinchikkunata Roald reqsinanta munaspan.

Andreas sutiyoq huk kaqnin ancianom Huñunakunanku Salonta reqsichirqa. Iñiqmasinchikkunaqa kusikuywanmi chaskiykurqaku Roaldtawan señoranta, hinaspam nirqaku riptinkuqa Dios serviyninkupi yanapanankumanta. Andreas ancianoqa kusisqaraqmi nirqa Roaldpaqwan churin Fabianpaqpas llamkay tarirusqanta. ¿Imatam ruwananku karqa?

Fabianqa nirqam: “Ñoqaqa manam kaypiqa yachayta munanichu”, nispa. Manam imaniraqllatapas allinpaqchu qawarqa amistadninkunata saqeruspan huklaw llaqtachaman riytaqa. Electricista kananpaq estudiasqantapas manaraqmi tukurqachu. 21 watanpiña kaq Isabel paninta tapuptinkuñataqmi, payqa kusikuywan nirqa: “¡Ñoqaqa chay ruwaytam unayña suyarqani!”, nispa. Nintaqmi: “Astawan chaypi yuyaymanaspaymi tapukuq kani sichu huklawman hamusqay allin kasqanta. ¿Llakikusaqchu amistadniykunamanta? ¿Qepakuymanchu llaqtaypi iñiqmasiykunawan hinaspa tukuy ima kapuqniykunawan hawkalla kawsakunaypaq?”, nispa. Elsebethñataqmi nin: “Piensarqanim rinaykupaq Jehova Dios kamachiwasqankuta, ichaqa piensarqanitaqmi chayllaraq allichasqayku wasiykupi chaynataq iskay chunka watapi tukuy ima huñusqaykupipas”, nispa.

Semana tukuytam predicasqankumanta Roaldwan familianqa Bergen llaqtankuman kutirqaku. Lakselv lawpi kaq iñiqmasinkuna karu-karupi (2.100 km.) kaspankupas manam paykunataqa qonqarqakuchu. Elsebethmi nin: “Diostam anchata mañakurqani hinaspam chay llaqtapi iñiqmasiykunapa imayna tarikusqankumantapas yacharqaniku. Fotokunatapas apachinakurqanikum, ima pasasqanmantapas willanakuqtaqmi kaniku”, nispa. Roaldpas ninmi: “Rinaykupaqqa allintam tantearqani. Chaymantapas yachanaymi karqa chay llaqtapi imayna mantienikunaykumanta. Diostam sapa kuti mañakuq kani chaynataq familiaywan hinaspa experienciayoq iñiqmasiykunawanpas rimaq kani”, nispa. Fabianmi nin: “Astawan piensasqayman hinam astawan cuentata qokurqani rinaypaq mana imapas harkawasqanta. Diostam anchata mañakurqani, hinaptinmi riytapas astawan munarqani”, nispa. ¿Imatam nichwan Isabelmanta? Mana sasachakuspalla huklawman rinanpaq ima yanapananta piensaspanmi puntataqa precursoraraq karqa. Soqta killa precursora kasqanwan chaynataq Bibliata astawan estudiasqanwanmi listoña tarikurqa rinanpaq.

Predicaqkunapa mana kasqanpi yanapakuyta munasqankum astawan kallpancharqa huk llaqtaman rispa yanapakunankupaq. Roaldqa achka qollqetam llamkayninpiqa chaskiq, chayna kaptinpas huk wata samananpaqmi permisakurqa. Patronninmi ichaqa hinalla llamkananta munaspan iskay semanata llamkananpaq nirqa, soqta semanatañataq samananpaq. Kikin Roaldmi nin: “Manaña achkata ganaspaypas allinmi karqani”, nispa.

Señoranpas ninmi: “Lakselv llaqtapi wasita maskanaypaqmi qosayqa niwarqa, Bergen llaqtapi wasiykutañataq arriendakunaykupaq. Chay ruwayniyku sasa kaptinpas allinmi karqa. Chaymantam warmakunapas llamkayta qallaykurqaku ichaqa manam sapa punchawchu, kunanqa yanapawankuñam mikunaykupaq chaynataq pasajeykupaqpas”, nispa.

Isabelmi kunan yuyarispan nin: “Risqayku llaqta taksalla kasqanraykum sasachakurqani llamkayta tarinaypaq chaynataq hinalla precursora kanaypaqpas. Wakinpiqa mana tarinaytañam piensarqani”, nispa. Chayna kaptinpas Isabelqa tukuy imapim llamkarqa gastonkunamanta pagananpaq, qallariy watapiqa isqon llamkaykunatam tarirurqa. ¿Imatam Fabianmanta nichwan? Paymi nin: “Estudiasqayta tukunaypaqmi  yaqa electricista hinaña llamkanay karqa, chaytam Lakselv llaqtapi tarirurqani. Chaymantam electricista kanaypaq examenta qorqani hinaspam llamkayta tarirurqani, ichaqa manam sapa punchawchu llamkaq kani”, nispa.

Marelius hinaspa Kesia sutiyoq casarasqa iñiqmasinchikkunapas predicaqkunapa mana ancha kasqanpim serviyta munarqaku. 29 watanpiña kaq Mareliusmi nin: “Asambleakunapi precursorkunata tapusqanku chaynataq paykunapaq yachachikuykunata uyarisqaymi kallpanchawarqa Diosta astawan servinaypaq”, nispa. 26 watanpi kaq señoranpaqmi ichaqa sasa karqa familianmanta rakikuspan huklawman riyninqa. Kikinmi kaynata willakun: “Llakichiwaqmi kuyasqay runakunata saqespay huklawman riypi piensayqa”, nispa. Mareliustaqa sasacharqataqmi wasinwan garantizaspa prestakusqanta pagananpaq sapa punchaw llamkasqanpas. Paymi nin: “Jehova Diostam anchata mañakurqaniku tanteasqaykuman hina ruwasqaykupi yanapawanankupaq, chaynapim chay llaqtachaman riytaqa atirqaniku”, nispa. Puntataqa Biblia estudianankupaqmi astawan tiempochakurqaku. Chaymantapas wasinkutam rantikururqaku, llamkasqankutapas saqerurqakum, hinaspam 2011 watapa agosto killanpi rirqaku Noruega nacionpa norte law Alta sutiyoq llaqtaman, chaypim precursor kachkanku. Vida pasanankupaqmi Mareliusqa contador hina llamkan, Kesia señoranñataq imakunapas waqaychana kasqanpi chaykunata cuidaspan.

Knut hinaspa Lisbeth casarasqa iñiqmasinchikkunaqa kimsa chunka masnin watayoqñam kanku, paykunaqa kallpanchasqam tarikurqaku predicaqkunapa mana ancha kasqanpi serviqkunamanta Anuario libropi leespanku. Lisbethmi nin: “Leesqayku experienciakunam piensachiwarqaku. ¿Yaqachum huklaw nacionman riyta atiymanku? Ñoqaqa iskayrayachkarqanim chayta ruwanaypaq mana atisqayta piensaspay”, nispa. Chayna kaptinpas kallpanchakurqakum. Knutmi willakun: “Yachasqayku cuartoykutam rantikururqaniku hinaspam qollqeta huñunaykupaq mamaypa wasinman astakururqaniku. Huklaw llaqtapi imayna serviyta yachanaykupaqmi Bergen llaqtapi kaq ingles rimayniyoq iñiqmasiykupa kasqanman rirqaniku, chaypim Lisbethpa mamanwan kuska yacharqaniku”, nispa. Manapas unaymantam Knutwan Lisbethqa Uganda nacionman rirqaku. Ichaqa, ¿imatam ruwarqaku mantienikunankupaq chaynataq hinalla precursor kanankupaqpas? Sapa watam Noruega nacionninkuman kutiqku iskay killa llamkanankupaq.

¿Imapim tukurqa kay iñiqmasinchikkunapa ruwasqankuqa? Roaldmi nin: “Familiaykum aswan huñulla tarikun Bergen llaqtapi kasqaykumantaqa. Chaynataq kusisqam tarikuniku iñiyninkupi churi-wawaykupa imayna ñawparisqankumantapas”, nispa. Nintaqmi: “Imapas kapuqniyoq kaypiqa manañam ñawpaqpi hinachu afanakuniku”, nispa.

 Elsebethqa munarqam huk idioma yachaytapas. ¿Imanasqa? Lakselv llaqtapi iñiqmasinchikkunaqa predicankutaqmi Karasjok llaqtapi sami rimayniyoq runakunamanpas. Chay rimayniyoq runakunaqa Noruega, Suecia, Finlandia hinaspa Rusia nacionkunapipas kachkankum. Chay runakunaman predicananpaqmi Elsebethqa sami rimayta estudiarqa, kunanqa atichkanñam chay rimaypi runakunawan parlayta. ¿Imaynataq kunan kachkan chay predicasqan lawpiqa? Kusisqallañam kaynata nin: “Soqta runakunamanmi Bibliamanta yachachichkani. ¡Manamá munanichu huklawpi kaytaqa!”, nispa.

Fabianqa precursor hinaspa siervo ministerialmi. Panin Isabelpiwanmi kimsa warmakunata yanaparqaku congregacionpi astawan llamkanankupaq. Paykunaqa kimsankum Diosmanta astawan willakuchkanku. Chaymantapas iskaymi bautizakurunku hinaspam 2012 watapa marzo killanpi precursor auxiliar karqaku. Kimsan warmakunamantam huk kaqninqa warmi warma, paymi Isabeltawan Fabianta agradecekurqa tukuy imata paypaq ruwasqankumanta. Fabianmi nin: “Nisqankunaqa sonqoymanmi chayaruwarqa. ¡Mayna kusisqam tarikuni hukkunata yanapaspaqa!”, nispa. Isabelñataqmi nin: “Yanapakusqaypim yachani Salmo 34:8 nisqan imayna cumplikusqanta. Yacharqanitaqmi Jehova Dios allin kasqanta. Diosta kaypi serviyqa ancha kusikunapaqmi”, nispa.

Mareliuswan Kesiaqa kusisqamá kawsakunku tukuy imanku mana kaptinpas, risqanku Alta sutiyoq congregacionpiqa 41 iñiqmasinchikkunam kachkan. Mareliusmi willakun: “Imapas saqesqaykumantaqa, kunanmi aswan kusisqa tarikuniku imayna kawsasqaykuwan. Jehova Diostam agradecekuniku kay llaqtapi precursor hina payta servisqaykumanta. Manamá imawanpas kayna kusisqaqa kaymankuchu”, nispa. Kesiañataqmi nin: “Jehova Diospi astawan hapipakuytam yacharuni, payqa kuyakuywanmi uywakuwanku. Aylluykunamanta karupi tarikusqayqa yanapawantaqmi qosaywan kuska kasqayta astawan chaninchanaypaqpas. Manam ñakakunichu yanapakunaykupaq tanteasqaykumantaqa”, nispa.

¿Imaynataq Knutwan Lisbeth tarikunku Uganda nacionpi? Knutmi willakun: “Tumpatam sasachakurqaniku imayna kawsasqankuman amañaytaqa. Wakinpiqa wiksa nanaywanmi sasachakuni, yakuwan achkipas manataqmi tukuy tiempochu kan, chayna kaptinpas hinallam runakunaman Bibliamanta yachachiniku”, nispa. Lisbethpas ninmi: “Yachasqayku lawmanta 30 minutollapim kachkan mana haykapipas predicasqa llaqtachakuna. Chayman chayaruspaykum Biblia leeq runakunata tarirqaniku, paykunañataqmi Bibliamanta yachachinaykupaq niwaqku. Ancha kusisqam tarikuniku humilde runakunam yachachispayku”, nispa.

Maynatachá Señorninchik Jesucristoqa kusikun, kay Pachapi predicay qallarichisqan astawan yapakusqanta hanaq pachamanta qawamuspanqa. Diospa llaqtanpi kaqkunapas kusisqam tarikunku kamachisqanta kasukuspanku. Jesusmi nirqa: “Llapallan nacionpi runakunaman rispayá willamuychik qatiqniykunaña kanankupaq”, nispa (Mat. 28:19, 20).