Leeqkunapa tapukuyninkuna

¿Imanasqam Biblia nin: “Diosman sonqo runakuna wañukuptinqa manam yanqallapaqchu hapin Tayta Diosqa”, nispa?

▪ Arí, Jehová Diosqa lliw runakunapa vidantam anchata chaninchan hinaspa sapakama serviqninkunapatapas. Chay nisqanqa Bibliapim rikurimun Salmo 116:15, ichaqa manam wañukuq runallamantachu kaypiqa rimachkan.

Wañukuqmanta discursota ruraspaqa, manam kay textotaqa leenachu, Diosman sonqo kaspa wañukuptinpas. ¿Imanasqa? Kaywanqa manam chaymantachu niyta munachkarqa. Salmo qellqaqqa niytam munachkarqa Jehová Diospa lliw serviqninkuna payman sonqo kaspa wañuptinkuqa anchata llakikusqanmanta, chaymi mana wañunankutaqa munanchu (qawariy Salmo 72:14; 116:8).

Arí, Jehová Diosqa manam saqenqachu llapallan serviqninkunata enemigonkuna puchukachinantaqa. Chayna kasqanmantam kunan tiempopi imakuna pasawasqanchik qawachin. Qatikachasqa kayta atipasqanchikmi sutillata qawachin llaqtanta Jehová Dios waqaychasqanmanta.

Jehová Diosqa tukuy atiyniyoqmi, hinaspam munaynintaqa ruranqapuni. Chayraykum mana haykapipas saqenqachu enteron llaqtan chinkachisqa kanantaqa. Mana chayna kaptinqa, qatiqninkuna aswan atiyniyoq kasqantachá qawachichkanman, hinaspapas kay Pachata kasukuq runakunawan huntachiy munasqanchá mana rurakunmanchu (Isa. 45:18; 55:10, 11). Kay Pachapi templopa pationpipas manachá kanmanchu mayqan runapas Diosta yupaychananpaqqa. Chaymantapas, manachá ‘mosoq allpa pachapi’ kawsaq runakunaqa kanmanchu (Apo. 21:1). Mana runakuna kaptinqa, manachá cumplikunmanchu Cristopa waranqa wata kamachikuyninqa (Apo. 20:4, 5). ¡Manamá haykapipas chaykunaqa pasakunmanchu!

Chaymantapas sichu Jehová Dios saqenman enemigonkuna llaqtanta tukurachinanta, hinaptinqa kamachikuyninwan sutinqa mana allinchá qeparunman. Llapallan Kamachikuq kayninpas qalaypaq qachachasqachá qeparunman. Chaymi sutinrayku mana haykapipas saqenqachu chaykuna pasakunantaqa. Piensasuntaq kaypipas: Diospiqa “manam kanchu mana allinqa”, chaynaqa manam iskayrayachwanchu tukuy sonqonkuwan serviqninkunata Dios waqaychananmantaqa (Deu. 32:4; Gen. 18:25). Chayqa Bibliapa nisqanwanmi tupan, ninmi: “Diosmi ichaqa hatun sutinrayku runankunataqa mana saqesunkichikchu”, nispa (1 Sam. 12:22). Arí, Jehová “Diosqa manam saqenqachu runankunata. Tayta Diosqa manam saqenqachu akllasqankunata” (Sal. 94:14).

¡Diospa llaqtan kay Pachamanta mana haykapipas chinkachisqa kananmanta yachasqanchikqa mayna kusikunapaqmi! Chaynaqa amayá haykapipas Diosman sonqo kaspaqa iskayrayasunchu kayna niwasqanchikpi: “Manam pipas, contraykipi atirqachu arma rurayta. Manam atirqachu wañuchisunaykipaq arma rurayta. Juzgadopi llapallan acusaqnikikunam juiciopi vencesqa kanqa. Ñoqa Tayta Diosmi kaynata nini: Serviqniykunapa herencianqa chaynam kanqa. Chaynam ñoqapa salvasqaykunaqa kanqa” nispa (Isa. 54:17).

[22 kaq paginapi suti rikuylla kaq willakuy]

Diosqa manam haykapipas saqenqachu llaqtan chinkachisqa kanantaqa