‘Llapallan llakisqakunatam consuelananchik’

“Diosmi aceitewan talliwaspan sapaqchawarqa [. . .] llapallan llakisqakunata consuelanaypaq” (ISA. 61:1, 2).

1. ¿Imaynatam Jesusqa llakisqakunata yanaparqa, imanasqam chayta rurarqa?

JESUSMI nirqa: “Chaytaqa rurachkani kachamuwaqniypa munasqanta ruraspaymi hinaspa kamachisqanta tukuspaymi”, nispa (Juan 4:34). Chayta ruraspanqa, Jesusqa Taytanpa imayna kasqantam allintapuni qatipakurqa, aswanraqmi runakuna ancha kuyasqanta (1 Juan 4:7-10). Jehová Diosqa kuyawasqanchiktam qawachiwanchik consuelawaspanchik otaq kallpanchawaspanchikpas. Chaymi Pablo kaynata nirqa: “Sinchi kallpanchaqninchik Diosmi”, nispa (2 Cor. 1:3). Jesuspas Isaiaspa willakusqanman hinam chayna kuyawasqanchikta qawachirqa (leey Isaias 61:1, 2). Nazaret llaqtapi huñunakunanku wasiman yaykuykuspanmi leerqa chay willakuyta, hinaspam nirqa paypi cumplikusqanta (Luc. 4:16-21). Chaynamá karqa, payqa Diosmanta willakuspanmi runakunata kallpancharqa hinaspam llakisqa kaqkunata kuyakuywan hawkayachirqa.

2, 3. ¿Imanasqam Jesusta qatipakuna hinaspa runakunata kallpanchananchik?

 ² Jesuspa qatiqninkuna kasqanchikraykum ñakariqkunata kallpanchananchik (1 Cor. 11:1). Pablom kaynata niwanchik: “Kunan rurasqaykichikpi hinayá kallpanchanakuychik hinaspa yanapanakuychik”, nispa (1 Tes. 5:11). Kunan tiempopi allin sonqoyoq runakunaqa astawanmi necesitanku kallpanchananchikta. ¿Imanasqa? Kay sasallaña tiempopi kawsasqanchikraykum paykunataqa kaminku hinaspam contrankupi mana allinkunatapas ruranku (2 Tim. 3:1).

³ Bibliapa willakusqanman hinaqa, “runakunam kanqaku kikillanpaq munaqkuna, qollqella kuyaqkuna, hatun tukuspa alabakuqkuna, Dios insultaqkuna, mama-taytanku mana kasuqkuna, mana reqsikuqkuna, huchallapi purikuqkuna, mana kuyakuqkuna, mana pampachay munaqkuna, runakunapa contranpi rimaqkuna, mana controlakuqkuna, mana llakipayakuqkuna, allin kaqkunapa contranpi kaqkuna, runamasin traicionaqkuna, loco hina ruraqkuna, hatun tukuqkuna hinaspa Dios yupaychayta qepaman churaspanku kikinkupa munasqallanpi purikuqkuna”. Chayna kasqankuqa sapa punchawmi astawanraq yapakuchkan Bibliapa kayna nisqanman hina: “Mana allin runakunawan engañaq runakunam ichaqa aswan mana allinmanraq chayanqaku” (2 Tim. 3:2-4, 13).

4. ¿Imam pasakuchkan enteron pachapi?

⁴ Tukuy kaykunaqa pasakun Bibliapa nisqanman hina ‘kay pachapi mana allin kaqkuna Diablopa makinpi kasqanraykum’ (1 Juan 5:19). ‘Kay pachapi mana allin kaqkuna’ nispanqa, rimachkanmi gobiernokunamanta, pantay religionkunamanta hinaspa hatun negociokunamantapas. Chaychá Bibliaqa nin Satanas “kay pachapi kamachikuq” kasqanta (Juan 14:30; 2 Cor. 4:4). ¿Imanasqam mana allinkuna astawan mirachkan? Satanasmi piñasqallaña kachkan wañuchisqa kananpaq pisi tiempoyoqllaña kasqanrayku (Apo. 12:12). Diosqa ñam Satanastawan kay pachapi mana allinkunata chinkachinqaña, hinaspam llapallan kamachiq kasqanta qawachinqa. ¡Mayna allinmi chayqa! (Gen., cap. 3; Job, cap. 2.)

Enteron Pachapim allin noticiata willakunchik

5. ¿Imaynatam kunan tiempopi Diosmanta willakuyqa cumplikuchkan?

⁵ Kay tiempopiqa rikunchiktaqmi Jesuspa willakusqan imayna cumplikusqanta, nirqam: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mat. 24:14). Enteron Pachapi predicayninchikqa astawanmi yapakuchkan. Kunanqa 7.500.000 predicaqkunam  107.000 congregacionkunapi kachkanku, llapallankum Jesuspa yachachisqanman hina Diospa gobiernonmanta Enteron Pachapi willakuchkanku (Mat. 4:17). Chaymi achka ñakariq runakuna consuelasqa kachkanku. Chayna kasqantam qawachin pasaq iskay watallapi 570.601 runakuna Testigo kanankupaq bautizakusqanku.

6. ¿Imatam niwaq Diosmanta willakuy aswan yapakusqanmanta?

⁶ Predicayninchik yapakusqanqa qawakuntaqmi 500 masnin rimaykunapi Bibliamanta qellqanchikkuna rurakusqanpi. ¡Chayqa manamá haykapipas rurakurqachu! Kunan tiempopi Diospa llaqtan achka rurayniyoq kasqan hinaspa ñawparisqanqa admirakunapaqmi. Chay ruraytaqa atichkanchik Diospa chuya espiritunpa yanapakuyninwanmi, manachayqa manach atichwanchu kay Pachapi Satanas munaychakusqanrayku. Achka runakunam Diospa gobiernonmanta uyarichkanku enteron Pachapi predicasqanchikrayku, hinaspam Diospa serviqninkuna hina consuelasqa kachkanku.

Iñiqmasinchikkunata consuelasun

7. a) ¿Imanasqam cristianoqa mana suyananchu ñakariyninkunata Jehová Dios chaylla chinkarachinanta? b) ¿Imaynatam yachanchik qatikachasqa kaspa aguantay atisqanchikta?

⁷ Kunan tiempopiqa mana allinkunapa chawpinpi kawsasqanchikraykum, imawanpas sasachakusun. Tukuy chaykunata Dios mana chinkachiptinqa, hinallam ima llakipipas tarikusun. Chaykamaqa Bibliapa willakusqanman hinam qatikachasqapas kasun, hinaptinmi qawachinanchik Diosman sonqo kasqanchikta hinaspa paypi hapipakusqanchiktapas (2 Tim. 3:12). Diospa yanapakuyninwanqa Tesalonica lawpi cristianokuna hinam kasun, paykunam ‘qatikachasqa kaspankupas chaynataq ñakarichisqa kaspankupas pacienciawan hinaspa iñiywan aguantarqaku’ (leey 2 Tesalonicenses 1:3-5).

8. ¿Ima willakuykunam qawachin serviqninkunata Dios kallpanchasqanta?

⁸ Jehová Diosqa yanapanmi serviqninkunataqa. Eliasmanta rimasun. Reina Jezabel wañurachinanmanta niptinmi mancharikuspan lluptirqa hinaspam wañuy munasqanmanta nirqa. Diosqa manamá qaqcharqachu, aswanmi kuyakuywan kallpancharqa kamachisqanta rurananpaq (1 Rey. 19:1-21). Jehová Diosqa serviqninkunatam haykapipas kallpanchan, chaynam punta cristianokunawanpas karqa. Bibliam nin: “Chaymi iñiqkunaqa tukuy Judea lawpipas, Galilea lawpipas hinaspa Samaria lawpipas hawkaña karqaku. Iñiyninkupim wiñaqku hinaspam Señorta manchakuspanku kawsaqku, Chuya Espiritupa kallpanchasqan kaspankum aswan-aswan miraqku”, nispa (Hech. 9:31). ¡Mayna allinmi paykuna hina chuya espiritupa kallpanchasqa kayqa!

9. ¿Imanasqam ninchik Jesucristomanta yachayqa kallpanchawanchikmi nispa?

⁹ Kallpanchawanchikmi Jesusmanta yachaypas hinaspa imayna kasqanta qatipakuypas. Jesusmi nirqa: “Hamuychik ñoqaman llapallan pisipasqakuna hinaspa qepichkaq hina ñakariqkuna, ñoqam samachisqaykichik. Llasawaqniy yugoyta apaspayá ñoqamanta yachaychik, ñoqaqa kani llampu sonqo humillakuqmi, chaynata ruraspaqa tarinkichikmi samayta. Yugoyqa facil apayllam, qepiypas sampallataqmi”, nispa (Mat. 11: 28-30). Yachasqanchikman hinam, Jesusqa runakunata kuyaq hinaspa kallpanchaq. Paymanta yachayqa hinaspa imayna kasqanta qatipakuyqa anchatamá kallpanchawasun sasachakuykunapi tarikuptinchikqa.

10, 11. ¿Pikunataq iñiqmasinchikkunata kallpanchayta atinmanku?

¹⁰ Kallpanchawanchiktaqmi iñiqmasinchikkunapas. Sasachakuykunapi kaptinchikqa astawanmi kallpanchawanchik congregacionpi ancianokuna. Santiagom nirqa: ‘Mayqannikichikpas [iñiyninpi] onqosqa kaspaqa  iñiqkuna ukupi ancianokunatayá qayaychik chaynapi Diosta mañapusunaykichikpaq’, nispa. Hinaptinmi ‘confiakuspa mañakuptinku [Diosqa] onqoqta sanoyachispa sayarirachinqa, huchapi kaptinpas pampachaykunqam’ (Sant. 5:14, 15). Arí, iñiqmasinchikkunawanpas kallpanchanakuchwanmi.

¹¹ Cristianakunaqa warmipuram wakin sasachakuyninkuta allichayta munanku. Yuyayniyoq cristianakunaqa experienciayoq kasqankuraykum sipaskuna yanapayta atinmanku. Chayna llakipayakuq kasqankuqa ancha allinmá (leey Tito 2:3-5). Chaynallataqmi ancianokunawan wakin iñiqkunapas, congregacionpi ‘hukmanyasqakunata kallpanchananku’ (1 Tes. 5:14, 15). Kaytam yuyarinanchik: Diosqa ‘tukuy sasachakuyninchikpim kallpanchawanchik’ chaynapi “ñoqanchikpas sasachakuypi kaqkunata Diospa kallpanchawasqanchikman hina kallpanchananchikpaq” (2 Cor. 1:4).

12. ¿Imanasqam ancha allin huñunakuykunaman riyqa?

¹² Kallpanchawanchiktaqmi huñunakuykunapi Bibliamanta yachachikuykunapas. Chaynatam rurarqaku Judaswan Silaspas, paykunam “sumaqllataña rimaspa iñiqkunata kallpancharqaku chaynapi qaqa hina sayanankupaq” (Hech. 15:32). Chaymantapas, rimasqanchikwanmi kallpanchanakunchik huñunakuy manaraq qallarichkaptin hinaspa tukuruptinpas. Chaymi sasachakuypi tarikuspaqa mana karunchakunachu iñiqmasinchikkunamantaqa, chayta ruraspaqa manam imatapas tarisunchu (Pro. 18:1). Aswanqa Pablopa kayna nisqanta kasukusun: “Ama qonqaruspayá kuyanakunapaq hinaspa allin ruranapaq yanapanakusunchik. Wakinkunapa costumbrasqanman hinaqa amayá huñunakuyman riyta dejasunchu aswanqa Señorpa chaylla kutimunanta yachaspayá kallpanchanakusunchik” (Heb. 10:24, 25).

Diospa Palabranqa kallpanchawanchikmi

13, 14. ¿Imaynatam Diospa Palabranqa kallpanchawanchik?

¹³ Unay wataña bautizasqa kaptinchikpas otaq chayllaraq Bibliata estudiaptinchikpas, llapanchikpam Bibliaqa kapuwanchik kallpanchawananchikpaq. Pablom nirqa: “Bibliapi imapas qellqasqa kaqkunaqa yachananchikpaqmi kachkan. Chaynapi pacienciakuspa hinaspa kallpanchakusqa, confianzallawanña suyananchikpaq”, nispa (Rom. 15:4). Diospa Palabranqa kallpanchawanchikmi hinaspapas yanapawanchikmi “yachayniyoq kaspa tukuy allinkunata rurananchikpaq” (2 Tim. 3:16, 17). ¡Anchatamá kallpanchawanchik Diospa munayninkunamanta yachayqa hinaspa hamuq tiempopaq suyakuyniyoq kaypas! Chaynaqa leesunyá  Bibliatawan qellqanchikkunatapas. Chaynapim kallpanchasqa kasun hinaspa huk yanapakuykunatapas chaskisun.

¹⁴ Jesusqa qatipakunapaq hinam. Payqa Diospa Palabrantam allinta servichikurqa runakunata yachachinanpaq hinaspa consuelananpaqpas. Kawsariruspanpas, iskay qatiqninkunaman rikuriykuspanmi ‘Bibliamanta entiendechirqa’ chaynapi sonqonkuman chayananpaq (Luc. 24:32). Jesucristopa chayna kasqantam Pablopas qatipakurqa. Achka kutipim uyariqninkunaman Bibliamanta entiendechirqa. Chaymi Berea runakunaqa “gustollawanña Diospa palabranta uyarispanku sapa punchaw Bibliata estudiarqaku” (Hech. 17:2 NM, 10, 11). Arí, allinpunim sapa punchaw Bibliata leeyqa hinaspa qellqanchikkunatapas leeyqa, chaynapim sasachakuypi tarikuptinchik kallpanchasqa kasun.

Consuelanapaq huk yanapakuykuna

15, 16. ¿Imakunatawan ruraspam iñiqmasinchikkunata kallpanchachwan?

¹⁵ Huk ruraykunawanpas iñiqmasinchikkunataqa kallpanchachwanmi. Yaqapaschá onqoq hinaspa yuyaq iñiqmasinchikkunata yanapachwan imankunatapas rantipuq rispa. Chaynataq wasinkupi imapas necesitasqankupi yanapaspa (Fili. 2:4). Alabachwantaqmi kuyakuyninkumanta, valorchakusqankumanta, iñiyninkumanta hinaspa imayna kasqanmantapas.

¹⁶ Yuyaqña iñiqmasinchikkunatam allintapuni kallpanchachwan watukuspa hinaspa tukuy pasasqankunamanta chaynataq Diospa bendicionninkuna chaskisqankumanta willawaptinchik uyarispa. Yaqapaschá ñoqanchikraq kallpanchasqa tarikusun. Watukuq rispaqa, leepuchwanmi Bibliatawan qellqanchikkunatapas. Allinmi kanman huñunakuypi estudiasqanchik Llaqta Cuidaq otaq Biblia Estudianapaq Huñunakuypi estudiasqanchik qellqata kuska leeyninchikqa. Allintaqmi kanman Bibliamanta DVD nisqanta qawaypas, otaq qellqanchikkunapi kaq experienciakunata leepuypas.

17, 18. ¿Imanasqam suyachwan Jehová Dios consuelawananchikta?

¹⁷ Pi iñiqmasinchikpas kallpanchanata necesitaptinqa, sutinmanta nispam Diosta mañakunanchik (Rom. 15:30; Col. 4:12). Hukkunata yanapayta munaptinchikpas otaq ñoqanchikña sasachakuypi tarikuptinchikpas, Salmo qellqaq hinam kananchik, nirqam: “Diosmanyá qoykuy preocupasqa kasqaykitaqa. Payñam cuentallikunqa qanmantaqa. Allin runataqa manam wiñaypaqchu saqenqa urmasqataqa”, nispa (Sal. 55:22). Diosman sonqo kaptinchikqa, yanapawananchikpaqwan kallpanchawananchikpaqmi waqtanchikpi kanqa.

¹⁸ Ñawpaqpim serviqninkunata Jehová Dios nirqa: “Kikiypunim consuelasqaykichik”, nispa (Isa. 51:12). Kunanpas payqa kallpanchawanchikmi, hinaspapas kusikuntaqmi llakisqa kaqkunata yanapasqanchikwan chaynataq rimasqanchikwan kallpanchaptinchikpas. Hanaq pachapi otaq kay Pachapi kawsanapaq suyakuyniyoq kaspapas, llapanchikmi kallpanchasqa kanchik Pablopa kayna nisqanwan: “Señorninchik Jesucristowan Dios Taytanchikmi favorecewanchik, kuyawaspanchikmi wiñaypaq consuelawanchik confianzata qospa. Paypuniyá sonqoykichikta kallpanchachun hinaspayá takyachisunkichik tukuy ruraynikichikpiwan allin rimaynikichikpi” (2 Tes. 2:16, 17).

¿Yuyachkanchikchu?

• ¿Imaynam kachkan Diosmanta willakuyninchik?

• ¿Imaynatam hukkunata kallpanchachwan?

• ¿Bibliapa ima willakuyninkunataq qawachiwanchik Jehová Diosqa consuelakuq kasqanta?

[Kay yachachikuypa tapukuyninkuna]

[28 kaq paginapi dibujo]

¿Kallpanchakunchikchu llakisqa kaqkunata consuelanapaq?

[30 kaq paginapi dibujo]

Mozo-sipas otaq yuyaqña kaspapas atichwanmi hukkunata kallpanchaytaqa