Mana qonqanapaq huñunakuy

“KAY huñunakuy tukuruptinmi, llapallanchik nisun: ‘Cheqaptapunim kay huñunakuyqa mana qonqanapaq kanqa’, nispa”. Kaynatam nirqa Diospa Llaqtanpi Punta Apaq Stephen Lett iñiqmasinchik, kayna nisqanwanmi astawan kallpancharqa Jersey City (Nueva Jersey, Estados Unidos) lawpi huñunakuq Jehová Diospa testigonkunata. Paykunam 2010 watapa 2 octubre killapi corporación Watch Tower Bible and Tract Society of Pennsylvania nisqapa 126 kutikamaña huñunakunankupaq chaypi karqaku. ¿Imakunamantam astawan chaypi rimarqaku?

Lett iñiqmasinchikmi qallariynin yachachikuypi willakurqa Ezequielpa mosqoyninpi Diospa carretanta rikusqanmanta. Chay sumaq carretaqa rikchakunmi Diospa llaqtanman, Paymi chaytaqa pusan. Chaypiqa kachkankum angelninkuna, hinaspam chay carretaqa llipya hina richkan Diospa piensasqanman hina. Kay Pachapi Diospa serviqninkunapas allintam ñawparichkanku, kay watakunapi qawasqanchikman hina.

Huklawkunapiqa Betel wasikunatam hukllapiña hukllawarunku. Chaynapim Betel wasipi llamkaq achka iñiqmasinchikkuna kallpankutawan tiemponkuta astawan servichikunqaku predicaypi. Lett iñiqmasinchikmi chay huñunakuypi kaqkunata nirqa confianza sirvientepaqwan Diospa Llaqtanpi Punta Apaqkunapaq allinta tanteanankupaq Diosta mañakunankupaq (Mat. 24:45-47).

Kallpanchakunapaq hina willakuykuna

Haití nacionpi Betel wasimanta Encargakuqkunamanta Tab Honsberger iñiqmasinchikmi, willarqa 2010 watapa 12 enero killapi terremoto pasaruptin 300.000 runakuna wañusqankumanta. Paypa nisqanman hinapas sacerdotekunam runakunaman nichkarqaku chay terremotowan mana allin runakunata Dios castigasqanta hinaspa allin runakunatañataq waqaychaykusqanmanta. Chayna kaptinqa, ¿imaynanpim carcelpi waranqantin mana allin runakuna salvakurqaku? Kunanqa Haití nacionpi achka runakunam imanasqa ñakariykuna kasqanmanta yachaspanku, hawkayayta tarichkanku. Chaymantapas kay iñiqmasinchikqa willarqam huk iñiqmasinchikpa señoran wañukuptin kayna nisqanmanta: “Sapa punchawmi waqani. Manamá yachanichu haykapikama kayna kanaytaqa, ichaqa anchatam kusikuni iñiqmasinchikkunapa kuyakuyninmanta. Yachanim hamuq tiempopi tupanaymanta, chaymantam willakuyta munani hukkunamanpas”, nispa.

 Brooklyn law Betel wasipi llamkaq Mark Sanderson iñiqmasinchikmi, Filipinas nacionmanta willakurqa. ¡Mayna kusikuywanmi nirqa qatinasllanpi 32 kutikama chay nacionpi predicaqkuna yapakusqanmanta, hinaspa Testigokunamantaqa Biblia estudiaqkuna aswanraq kasqanmanta! Willarqataqmi Miguel iñiqmasinchikmanta, paypa willkantam wañurachirqaku. Kay iñiqmasinchikqa tukuytam rurarqa willkanta wañuchiq runata presochanankupaq. Huk punchawsi carcelman predicaq rirqa hinaspam paywan tuparurqa. Hukman tarikuspanpas kuyakuywanmi Bibliamanta yachachinanpaq nirqa. Payñataqmi munarqa estudiayta, chaymi tiempopa risqanman hina Jehová Diosta kuyaspan bautizakururqa. Kunanqa Miguelpa allin amistadninñam, hinaspam yanapachkan pisi tiempollamanta carcelmanta lloqsinanpaq. *

Qatiqninpiñataqmi, Departamento de Escuelas Teocráticas nisqapi yachachiq Mark Noumair iñiqmasinchik kimsa casarasqakunata tapurqa: Alex hinaspa Sarah Reinmueller; David hinaspa Krista Schafer chaynataq Robert hinaspa Ketra Ciranko iñiqmasinchikkunata. Alex Reinmueller iñiqmasinchikmi Qellqakuna Ruraypi Encargakuqkunata yanaparqa. Paymi nirqa cheqap yachachikuyta astawan 15 watanpi chaninchasqanta. Chay watanpiqa Canadá nacionpim precursor karqa hinaspam yaqa llapanpi sapallan predicarqa. Betel wasipi kaqkunamanta pikuna vidanpi yanapasqanmanta tapuptinkum nirqa kimsa iñiqmasinchikkuna astawan iñiyninpi yanapasqanmanta. Sarah señoranñataqmi willakurqa, unay wata China nacionpi presochasqa cristianawan allin amistad kasqankumanta. Sarah iñiqmasinchikmi willakurqa mañakuspan Jehová Diospi imayna hapipakusqanmanta.

Yachachikuymanta Encargakuqkunata yanapaq David Schafer iñiqmasinchikmi mamanpa iñiyninmanta sumaqta rimarqa, rimarqataqmi warmallaraq kaptin yantakunata chitqaq iñiqmasinchikkunapa yanapakuyninwan precursor auxiliar kasqanmanta. Krista señoranñataqmi willakurqa Betel wasipi yuyaq iñiqmasinkuna yanapasqanmanta, paykunam Jesuspa kamachisqanman hina ‘pisillapipas confianapaq’ karqaku (Luc. 16:10).

Yachachikuykuna Qellqaymanta Encargakuqkunata yanapaq Robert Ciranko iñiqmasinchikpas rimarqam abuelonkunamanta, paykunaqa Hungría nacionmantam karqaku hanaq pachaman rinankupaq suyakuyniyoq. Paytam yanaparqa warmallaraq kaptin  hatun asambleakunaman risqan, chaypim musyakururqa Diospa llaqtanqa congregacionninmanta aswan hatun kasqanta. Ketra señoranñataqmi willakurqa precursora kaspan Diosman sonqo kayta yacharusqanmanta, congregacionninpim Diospa llaqtanmanta lloqsiruspanku contranpi churakuqkuna hinaspa huk sasachakuykunapas karqa. Payqa hinallam Diosta servirqa hinaspam tiempopa risqanman hina precursora especial kaspan huk sonqolla kaq congregacionman rirqa.

Chaymantañataq Manfred Tonak iñiqmasinchik Etiopía nacionmanta willakurqa. Kay nacionpim kan 9.000 predicaqkuna. Paykunamanta yaqa llapanmi Adís Abeba sutiyoq llaqtapi hinaspa hichpan llaqtakunapi yachanku. Chay lawkunapiqa ancha yanapanatam necesitakun. Chaymi huk law nacionkunapi kaq Etiopia nacionniyoq testigokunata kallpancharqa yanapakunankupaq, hinaptinmi pisi tiempollapaqpas achka rirqaku. Bibliamanta yachay munaq runakunata tarispankupas, anchatam chaypi iñiqmasinchikkunata kallpancharqaku.

Chaymantapas ancha allinmi karqa Rusia nacionpi Testigokunamanta hinaspa juezkunawan sasachakuy kasqanmanta willakuykunapas. Betel wasimanta Encargakuqkunamanta Aulis Bergdahl iñiqmasinchikmi willakurqa Moscú llaqtapi iñiqmasinchikkuna imayna qatikachasqa kasqankumanta. Philip Brumley iñiqmasinchikpas willakurqam Tribunal Europeo de Derechos Humanos nisqapi juezkuna Testigokunata yanqa tumpasqankumanta qawasqankuta, hinaspa chaypa qepanman tukuy pasakusqanmanta. Juezkunaqa manam imatapas tarirqakuchu hinaspam Testigokunapa contranpi wakin nisqankutaqa qepancharurqaku. Chay tanteasqanku manaraq ruraypi qawakuchkaptinpas, Brumley iñiqmasinchikqa ninmi chay tanteasqankuqa huk nacionkunapipas yanapakunanmanta.

Chaymantañataqmi Lett iñiqmasinchik willarqa chay cortepi juezkuna Francia nacionpi Testigokuna impuesto paganankumanta sasachakuyta chaskisqankumanta. Kay corteqa ancha reqsisqamá hinaspa manam ima sasachakuykunatapas chaskiyllachu chaskin. Kunankamaqa Testigokunapa 39 sasachakuyninkunatam atienderqa, hinaspam 37 kutikama favorninchikpi tantearurqaku. Chaymi Lett iñiqmasinchik nirqa Diosninchikta hinalla mañakunapaq.

Tukunapaqñataqmi Congregacionmanta Ancianokunapaq Escuelapi yachachiq Richard Morlan iñiqmasinchik, kusikuywan willakurqa chay escuela imayna kasqanmanta  hinaspa ancianokuna ancha agradecesqa kasqankumantapas.

Diospa Llaqtanpi Punta Apaqkunamanta wakin yachachiqkuna

Tukuyninpi yachachiykunatam qorqaku Diospa Llaqtanpi Punta Apaqkunamanta wakiqninkuna. Guy Pierce iñiqmasinchikmi 2011 watapaq textomanta rimarqa: Amparakusunyá Jehová Diospa sutinpi (Sof. 3:12, NM). Nirqam kusikunapaq tiempopi kawsasqanchikmanta chaynataq Diospa piñakuynin hichpaykamusqanrayku rikchan-rikchanlla kanamantapas. Ichaqa runakunam pantay religionkunapi, politicapi, qollqepi hinaspa hukkunapipas amparakunku. Cheqaptapuni amparasqa kanapaqqa Jehová Diospa sutintam rimana, chaypaqmi reqsinanchik, respetananchik, confiananchik hinaspa tukuy sonqowan kuyananchik.

Chaymantañataqmi David Splane iñiqmasinchik kayna niq yachachikuyta qorqa: “¿Yaykurunchikñachu Diospa samanan punchawman?”. Chaypim nirqa samana punchawninpi Jehová Dios hinaspa churinpas kay Pachapaq Diospa munaynin cumplikunanpaq hinalla llamkasqankumanta (Juan 5:17). ¿Imaynatam yaykuchwan chay samana punchawman? Chaypaqqa huchanchikmantam wanakunanchik hinaspam allin ruraykunataña rurananchik. Chaymantapas iñiyninchiktam qawachina, rikchan-rikchanlla kaspataqmi Diospa munayninta suyana hinaspa yanapananchik. Ichaqa wakinpiqa sasamá, chaywanpas Diospa llaqtanpa yanapakuyninwanqa atichwanmi rurayta. Chay yachachikuytam tukurqa Diospa samanan punchawman yaykunapaq kallpanchaspa.

Tukunapaqñataqmi Anthony Morris iñiqmasinchik rimarqa “¿Imam suyawanchik?”, niq yachachikuymanta. Ancha kuyakuywanmi uyariqninkunata yuyarichirqa ima tiempopi tarikusqanchikmanta hinaspa ganasllawanña, “hawkañam, seguroñam kachkanchik” nisqa qapariyta suyanamanta chaynataq pantaq religionkuna puchukanantapas (1 Tes. 5:2, 3; Apo. 17:15-17). Ichaqa nirqataqmi Armagedon imayna qallarinanmanta yanqa willakuykunata mana kasukunapaq. Yuyarichirqataqmi Miqueas 7:7 nisqanman hina pacienciakuspa chaynataq kusisqa suyanamanta. Kallpancharqataqmi Diospa Llaqtanpi Punta Apaqkunawan huk sonqolla llamkanapaq. Hinaspam tukurqa kaynata nispan: “Diospi confianzawan suyaqkunaqa allinneqtaraqyá kallpanchakuychik, sonqoykichiktayá takyachillaychik”, nispa (Sal. 31:24).

Tukuyninpi willakuykunapas mana qonqanapaqmi karqa. Geoffrey Jackson iñiqmasinchikmi willakurqa ingles rimaypi chaylla entiendenapaq Llaqta Cuidaq huk tiempo lloqsimunanmanta, chaynapi inglesta mana ancha entiendeqkuna yanapachikunankupaq. Stephen Lett iñiqmasinchikpas nirqam Diospa Llaqtanpi Punta Apaqkuna, Estados Unidos nacionpi superintendente de distrito chaynataq señorankupas watukusqa kanankupaq. Qatiqninpiñataqmi willakurqa Escuela de Entrenamiento Ministerial nisqa Solterokunapaq Bibliamanta Escuela nisqawanña sutichakunanmanta, hinaspa Casadokunapaq Bibliamanta Escuela kananmantapas. Kay escuelam allintapuni yanapanqa Diospa llaqtanpi astawan yanapakunankupaq. Lett iñiqmasinchikqa nirqataqmi watapi 2 kutikama Patterson lawpi, Congregacionkunata Watukuqkunapaq Escuela kananmanta hinaspa señorankupaqpas, chaynataq Betel Wasimanta Encargakuqkunapaq Escuela kananmanta hinaspa señorankupaqpas. Tiempo risqanman hinam chay escuelaman riqkunaqa kaqmanta riyta atinqaku.

Ancha kusikunapaqmi chay huñunakuyta tukurqa, 97 watanpiña kaq John E. Barr iñiqmasinchik Diosta sonqomanta mañakuspan. * Chay huñunakuy tukuruptinmi lliw huñunakuqkuna nirqaku cheqaptapuni mana qonqanapaq hina kasqanmanta.

[Willakuykuna]

[19 kaq paginapi suti rikuylla kaq willakuy]

Iñiqmasinchikkunata tapusqankumantam llapallanku kusikurqaku

[20 kaq paginapi suti rikuylla kaq willakuy]

Jehová Diosmi Etiopía nacionpi llamkasqankuta bendecirqa