Diospa espiritunta chaskiy ama kay pachapi kaq espiritutachu

‘Ñoqanchikqa chaskirqanchik manam kay pachapi kaq espiritutachu aswanqa Diospa espirituntam chaynapi Diospa kuyakuyninman hina qowasqanchikta yachananchikpaq.’ (1 COR. 2:12.)

1, 2. a) ¿Ima guerrapim cristianokunaqa kachkanchik? b) ¿Ima tapukuykunamantam yachasun?

GUERRAPI hinam cristianokunaqa kachkanchik. Enemigonchikqa atiyniyoq hinaspa ñawpaqmantaraq sacrellaña peleaqmi. Servichikuntaqmi ancha allin armata, chaymi yaqa llapallan runakunata munaychakun. Ichaqa manam sapallanchikchu kachkanchik nitaq piensanachu mana vencey atina kasqantaqa (Isa. 41:10). Kapuwanchikmi mana tupachiy atina yanapakuy, chayqa imamantapas harkawanchikmi.

² Chay peleasqanchik guerraqa manam runakunawan peleaychu. Enemigonchikqa Diablom, armanñataqmi ‘kay pachapi kaq espiritu’ (1 Cor. 2:12). Ñoqanchikta yanapawaqninchikñataq Diospa chuya espiritun. Chaymi Diosta mañakunanchik hinaspa chuya espirituman hina kawsananchik. Chaynapim kay guerrapi venceyta atisun hinaspa iñiyninchikpipas allin kasun (Gal. 5:22, 23). Ichaqa, ¿imataq kay pachapi kaq espirituqa? ¿Imanasqam runakunapi munaychakun? ¿Imaynatam yachachwan sichu ñoqanchikpi munaychakusqanta? ¿Imaynatam Jesusqa kay pachapi kaq espirituta atiparqa hinaspa Diospa espiritunta chaskirqa, imatam yachachiwanchik?

¿Imanasqam kay pachapi kaq espiritu runakunapi munaychakun?

3. ¿Imataq kay pachapi kaq espirituqa?

³ ‘Kay pachapi kamachikuq’ Satanasmi rikurirachirqa chuya espiritupa contranpi kallpata (Juan 12:31; 14:30; 1 Juan 5:19). Chayqa kay pachapi kaq espiritum otaq runakunapi munaychakuq mana allin ruray munaykunam, chaymi runata tanqan Diospa munayninpa contranpi imatapas rurananpaq.

4, 5. ¿Imaynatam kay pachapi kaq espirituqa runakunapi astawan munaychakuyta qallarirqa?

⁴ ¿Imaynatam kay pachapi kaq espiritu runakunapi astawan munaychakuyta qallarirqa? Edenpim Satanasqa Evata engañarurqa hinaspa Diosmanta karunchakuruspan aswan kusisqa kananmanta nirqa (Gen. 3:13). ¡Llullamá karqa! (Juan 8:44.) Chaymantam Evatakama Adanta Diosta mana kasukunanpaq pantarachirqa. Mana allin tanteasqanmantam lliw mirayninkuna huchaman rantisqa kanchik chaymi runakunaqa Diablopa munasqanman hina mana kasukuq kanchik (leey Efesios 2:1-3).

 ⁵ Satanasqa achka angelkunatapas engañaspanmi Diosmanta karuncharurqa chaynapim demoniokunapi rikurirurqaku (Apo. 12:3, 4). Chayqa pasakurqam Noeypa tiemponpi manaraq sinchi para kachkaptin. Paykunam piensarqaku hanaq pachata saqespanku allin kanankuta hinaspa runayaspan kay Pachaman hamuspanku mana allin ruray munasqankuta ruranankupaq (Jud. 6). Chaymantam runa kasqankuta saqerurqaku, hinaspam Satanasta yanapachkanku, paymi “llapallan kay pachapi runakunata engañachkan” (Apo. 12:9). Chaymi yaqa lliw runakuna mana cuenta qokuspankupas Satanaspa munaychakusqan kachkanku (2 Cor. 4:4).

¿Munaychakuchkanchu ñoqanchikpi kay pachapi kaq espiritu?

6. ¿Haykallapim kay pachapi kaq espirituqa ñoqanchikpi munaychakunman?

⁶ Achka runakunam mana yachankuchu Satanaspa toqllankuna imakuna kasqanta, cristianokunam ichaqa yachanchik (2 Cor. 2:11). Kay pachapi kaq espirituqa ñoqanchikpipas munaychakunmanmi saqekuptinchikqa. Tawa tapukuykunata qawasun sichu kay pachapi kaq espiritu icha Diospa espiritun ñoqanchikpi munaychakusqanta.

7. ¿Imaynatam Satanasqa Jehová Diosmanta karunchawananchikta munan?

⁷ ¿Imatam qawachini akllasqay kusirikuykunawan? (Leey  Santiago 3:14-18.) Satanasqa yachanmi wañuchinakuytawan maqanakuy kuyaqkunata Dios cheqnisqanta, chaykunawanmi Satanasqa Diosmanta karunchawanchik (Sal. 11:5). Servichikunmi qellqakunata, peliculakunata, takikunata hinaspa pukllanapaq videokunatapas, chaypi lloqsimuqkunam maqanakuspa wañuchinakunku chaynataq huchapakunkupas. Allinkunata ruranapaq kallpanchakuptinchikpas, Satanasqa anchatam kusikun mana allin ruraykunata tumpallatapas kuyaptinchikqa (Sal. 97:10).

8, 9. ¿Ima tapukuykunatam rurakunanchik kusirikuykunamanta?

⁸ Diospa espiritunmi ichaqa yanapawanchik llampu sonqo, chuya hinaspa llakipayakuq kanapaq. Chaymi tapukuna: “¿Akllasqay kusirikuykuna yanapawanchu allin runa kanaypaq?”, nispa. Diosmanta yachayniyoq runakunaqa “cheqap sonqokunam” kanku. Arí, chuya espirituman hina kawsaqkunaqa, hawkayaymantawan chuya kanamanta predicaspaqa, manam wasinpiqa mañuchinakuytawan huchapakuytaqa qawankuchu.

⁹ Jehová Diosqa munanmi payllata yupaychananchikta. Satanasmi ichaqa mana. Payqa Jesusta tentasqanman hinam, huk kutillatapas munayninta ruraptinchikqa kusikun (Luc. 4:7 NM, 8). Chaymi tapukunanchik: “¿Akllasqay kusirikuykuna yanapawanchu Diosta munasqanman hina yupaychanaypaq? ¿Yanapawanchu mana allin ruray munaykunata atipanaypaq icha astawanchu sasachawan? ¿Allintachu akllanay kanqa?”, nispa.

10, 11. a) ¿Qollqemanta imayna piensananchiktam kay pachapi kaq espiritu munan? b) ¿Imapaqmi Diospa espiritun yanapawanchik?

¹⁰ ¿Imatam piensani kapuqniyoq kaymanta? (Leey  Lucas 18:24-30.) Kay pachapi kaq espirituwanmi Satanasqa tanqawanchik ‘ñawipa munasqankunata’ otaq kapuqniyoq kayta munapayanapaq (1 Juan 2:16). Arí, runakunatam hikutan qollqellapi piensanankupaq (1 Tim. 6:9, 10). Piensachiytam munawanchik kapuqniyoq kaspa seguro kawsanamanta (Pro. 18:11). Dios kuyaymanta qollqeta astawan kuyaptinchikqa, Satanasmi venceruwanchikña. Chaymi tapukuna: “¿Puntatachu maskani kusirikuykunatawan tukuy imayoq kayta?”, nispa.

¹¹ Bibliawanmi Diospa espiritun yanapawanchik qollqella maskayman mana qokunapaq hinaspa familianchikta mantieneyta mana saqenapaq (1 Tim. 5:8). Niwanchiktaqmi Diospa qokuykuq kasqanta qatipakunapaq. Reqsichikunam qokuykuq kasqanchikwan imapas chaskiy munasqanchikmantaqa. Imakunamantapas runakunatam astawan chaninchana hinaspa atisqanchikman hina yanapana (Pro. 3:27, 28). Manataqmi qollqe maskaytaqa puntapi churanachu Dios serviymantaqa.

12, 13. ¿Imaynatam Diospa chuya espiritun yanapawanchik kay pachapi kaq espirituta atipanapaq?

 ¹² ¿Imayna kasqay Diospa espirituntachu qawachin icha kay pachapi kaq espiritutachu? (Leey  Colosenses 3:8-10 *, 13.) Kaymanta yachananchikpaqmi musyakuna imapas munasqanchikman hina mana kaptin imayna kasqanchikpi. ¿Yaqachu chaypi qawachinchik aychapa munayninkunata? (Gal. 5:19-21.) ¿Imatam rurana pi iñiqmasinchikpas piñachiwaptinchik otaq mana allinkunata rurawaptinchik? ¿Imaynam kanchik familianchikwan? Paykunawan imayna kasqanchikmi qawachin sichu Diospa espiritun otaq kay pachapi kaq espiritu munaychakuwasqanchikta. Tapukusun: “Soqta killa pasaqpi, ¿aswan allinchu imayna kasqay karqa icha ñawpaqpi hinachu rimasqaypiwan portakusqaypi kachkani?”, nispa.

¹³ Diospa espiritunmi yanapawanchik Bibliapa kayna nisqanta kasukunapaq: “Saqenaykichikñam ñawpa vidaykichikpi tukuy mana allin ruraykunata. Mosoq runa hinañam kanaykichik”. Chaynata ruraspaqa kuyakuypiwan sumaq sonqo kaypim aswan allin kasun, hukkunatapas pampachasunmi piñakunapaq razonniyoq kaspapas. Mana allinkunata rurawaptinchikpas manam “piñapakuqqa, rabiakuqqa, cheqnikuqqa, qaqchanakuqqa, insultanakuqqa” kasunchu. Aswanqa kallpanchakusunmi ‘kuyapayakuq’ kanapaq (Efe. 4:31, 32).

14. ¿Imatam runakuna Bibliamanta piensanku?

¹⁴ ¿Kasukunichu hinaspa kuyanichu imayna kawsanapaq Bibliapa nisqanta? (Leey  Proverbios 3:5, 6.) Kay pachapi kaq espiritum runakunata tanqan Diospa Palabranta qepanchanankupaq. Wakinkuqa Bibliapa wakin textonkunata mana kasukuspankum astawan munanku runakunapa yachachikuynintawan costumbrenta qatipakuyta (2 Tim. 4:3, 4). Wakinñataqmi Bibliapa nisqanta mana creenkuchu. Yachaysapa tukuspankum ninku Bibliaqa Diosmanta mana kasqanta hinaspa runakunata mana yanapasqantapas, chaymi hukwan pierdekuyta, qarimasillanwan otaq warmimasillanwan huchapakuyta chaynataq divorciakuytapas allinpaq hapinku. Huk rimaypiqa ‘mana allintam allinpaq’ qawanku ‘allin kaqtañataq mana allinpaq’ (Isa. 5:20). ¿Chaynatachu wakinpi piensanchik? ¿Runapa hinaspa kikinchikpa piensasqanchikman hinachu sasachakuyninchikta allichanchik icha Bibliapa nisqanman hinachu?

15. Yachayninchikman hina imatapas ruranamantaqa, ¿imatam rurananchik?

¹⁵ Chuya espiritum ichaqa kallpanchawanchik  Bibliata respetanapaq. Salmista hinam kanchawaqninchik mecherota hina qawanchik (Sal. 119:105). Chaymi yachasqanchikman hina imatapas ruranamantaqa, Bibliata servichikunchik allin hinaspa mana allin kaqta reqsinapaq. Manam kasukuyllachu aswanqa kuyananchikmi (Sal. 119:97).

Jesuspa ejemplonmanta yachasun

16. ¿Imatam rurananchik ‘Cristopa piensasqanman hina piensanapaq’?

¹⁶ Diospa espiritunta chaskiyta munaspaqa ‘Cristopa piensasqanman hinam piensananchik’ (1 Cor. 2:16). Huk rimaypiqa piensayninchikmi “Jesucristopa piensasqanman” hina kanan, chaypaqqa piensaynintawan rurasqantam reqsinanchik hinaspa imayna kasqantapas qatipakunanchik (Fili. 2:5; 1 Ped. 2:21). Qawasun imayna qatipakunamanta.

17, 18. a) ¿Imatam yachachiwanchik Jesuspa mañakusqan? b) ¿Imanasqam hinalla ‘mañakunanchik’?

¹⁷ Diosta mañakusun espiritunta qowananchikpaq. Manaraq pruebakunapi tarikuspanmi Jesusqa Taytanta mañakurqa espiritunwan yanapaykunanpaq (Luc. 22:40, 41). Ñoqanchikpas chaynatam rurananchik. Iñiywan mañakuptinchikqa, Diosqa qowasunmi (Luc. 11:13). Cristom nirqa: “Mañakuptikichikqa Diosmi qosunkichik. Maskaychik, tarinkichikmi, qayaychik, kichasunkichikmi. Mañakuqqa chaskinmi, maskaqqa tarinmi, qayakuqqa kichaykachikunmi”, nispa (Mat. 7:7, 8).

¹⁸ Qawasqanchikman hinaqa, mana amispam Jehová Diospa espirituntawan yanapakuyninta mañakunanchik. Mañakuyninchikqa yaqachá kanan sapa kuti hinaspa unaypas. Wakinpiqa iñisqanchiktawan munasqanchikta qawachinanchiktam payqa munan, chaymantañam mañakusqanchikta qowanchik. *

19. ¿Imatam haykapipas Jesusqa rurarqa, hinaspa imanasqam qatipakunanchik?

¹⁹ Haykapipas Jehová Diosta kasukusun. Jesusqa haykapipas Diospa agradontam rurarqa. Ichaqa huk kutipim Taytanpa mana piensasqanman hina huk sasachakuyta atipayta munarqa. Chaywanpas Taytanpi confiakusqantam qawachirqa, chaymi nirqa: “Amayá ñoqapa munasqaychu kachun aswanqa qampa munasqaykiyá”, nispa (Luc. 22:42). Tapukusun: “¿Kasukunichu Diosta sasa kaptinpas?”, nispa. Mana chayna kaptinqa wiñay kawsaytaqa manam chaskisunchu. Diostaqa tukuypim kasukuna, paymi kawsayta hinaspa tukuy necesitasqanchikta qowarqanchik (Sal. 95:6, 7). Kasukuyqa ancha allinpunim. Mana chayqa Diospa favornintaqa manam tarisunchu.

20. ¿Imatam Jesusqa tukuy vidanpi rurarqa hinaspa imaynatam ejemplonta qatipakuchwan?

²⁰ Bibliata allinta estudiasun. Satanas tentaptinmi Jesusqa Diospa Palabranpa nisqanta servichikurqa (Luc. 4:1-13). Religionpi punta apaqkunapa rimasqankunata kutichinanpaqpas servichikurqam (Mat. 15:3-6). Payqa Diospa leynintam tukuy vidanpi kasukurqa hinaspa cumplirqapas (Mat. 5:17). Ñoqanchikpas Diospa Palabranwanmi iñiyninchikta astawan wiñachina (Fili. 4:8, 9). Wakin cristianokunaqa ichapas piensanku Bibliata sapallanku otaq familiankuwan estudianankupaq mana tiempoyoq kasqankuta. Ichaqa kaytam yuyarinanchik: manam suyanaraqchu tiemponchik kanantaqa, aswanqa tiempotam horqonanchik (Efe. 5:15-17).

21. ¿Imatam sapa semana rurananchik Diospa Palabranta allinta yachanapaq?

 ²¹ ‘Allin yuyayniyoq confianza sirvienteqa’ yanapawanchikmi sapallanchik hinaspa familiawan Bibliata estudianapaq (Mat. 24:45). Chaypaqmi sapa semana Familiawan Diosta Yupaychanapaq Tutata ruranapaq niwarqanchik. ¿Allintachu chayta servichikuchkanchik Cristopa piensasqanman hina piensanapaq? Chaypaqmi yanapawasun Jesuspa yachachisqankunamanta estudiayninchik. Maskachwanmi Índice de las publicaciones Watch Tower libropi. Ejemplopaq, servichikuchwanmi 2008-2010 watakunapi predicanapaq Llaqta Cuidaq revistapi lloqsimuq “Jesuspa yachachisqankuna” niqta. Servichikuchwantaqmi “Diosman asuykuychik” niq yachachikuytapas. Kay yachachikuykunam yanapawanchik Bibliamanta astawan yachanapaq, chaymi allinpuni kanman familiawan estudiaspa servichikuyqa.

Mana allinkunataqa atipachwanmi

22, 23. ¿Imatam rurana mana allin munaykunata vencenapaq?

²² Diospa espiritun yanapawananchikta munaspaqa mana allinkunatam qepanchananchik. Chay rurayqa sasam. Chaymi anchata kallpanchakuna vencenapaq (Jud. 3). Ichaqa atipachwanmi, qatiqninkunatam Jesus nirqa: “Kay pachapiqa ñakarinkichikmi ichaqa kallpanchakuychikyá, kay pachapi mana allinkunataqa venceruniñam”, nispa (Juan 16:33).

²³ Mana allin munaykunataqa vencechwanmi ñoqanchikpi munaychakunanta mana saqekuspa, chaynataq Diospa espiritunta chaskinapaq kallpanchakuspaqa. Dios yanapawaptinchikqa “¿pitaq imanawachwanpas?” (Rom. 8:31.) Diospa chuya espiritunta chaskispa hinaspa Bibliapa nisqanta kasukuspaqa kusisqa chaynataq hawkallam kawsasun, manam iskayrayasunchu hamuq tiempopi wiñay kawsay kananmantapas.

[Willakuykuna]

¿Kaykunata entienderqanchikchu?

• ¿Imanasqam kay pachapi kaq espiritu runakunapi astawan munaychakun?

• ¿Ima 4 tapukuytam rurakunanchik?

• ¿Imakunata ruraspam Jesusta qatipakuchwan Diospa chuya espiritunta chaskinapaq?

[Kay yachachikuypa tapukuyninkuna]

[8 kaq paginapi dibujo]

¿Imaynatam wakin angelkuna demoniokunapi rikurirurqaku?

[10 kaq paginapi dibujo]

Satanasmi kay pachapi kaq espirituta servichikun runakunapi munaychakunanpaq, ñoqanchikqa atichwanmi librakuytaqa