Bulgariapim ancha allin willakuy apakurqa

“Achkallañam kachkan cosechanapaqqa, cosechaqkunam ichaqa aslla. Chaynaqa mañakuychikyá chakrayoqta cosechaqkunata kachananpaq.” (MAT. 9:37, 38.)

JESUSPA kayna nisqanqa mayna cheqapmi Bulgaria nacionpi. ¿Imanasqa? Chaypim achka cosechaqkunata necesitakun, 7.000.000 masnin chaypi tarikuq runakunaman allin noticiata willanapaq, kay nacionqa tarikun Europamanta sur lawpi Balcanes nisqapim. Chaypi 1.700 predicaqkuna kaspankupas manam haypakunkuchu enteronpi predicanankupaq. Chaymi Diospa Llaqtanpi Punta Apaqkunapa permisonwan invitarqaku Europa law nacionkunapi búlgaro rimaq Testigokuna predicaq rinankupaq, chayqa apakurqa 2009 watapi qoninan killakunapim. Qanchis semanam predicananku karqa hinaspam tukurqa ‘¡Listollayá kaychik!’ sutiyoq kimsa punchaw asambleapi, chayqa rurakurqa Sofía llaqtapi 14-16 agosto killapi.

Achkallañam rirqaku

Sofía llaqtapi Betel wasimanta iñiqmasinchikkunam tapukurqaku Alemaniamanta, Españamanta, Franciamanta, Greciamanta, Italiamantawan Poloniamanta hayka cristianokuna rinankumanta. Rinankuqa karqa kikinku gastaspanku hinaspa vacacionta horqospankum. Semanakunapa pasasqanman hinam riqkunaqa aswan yapakurqa, llapanpiqa chayarqa 292 solicitudkunam. Chayna achkallaña kaptinmi kamachirqaku kimsa llaqtakunaman rinankupaq: Kazanlak, Sandanski hinaspa Silistra lawman. Chaynataq Bulgaria nacionpi congregacionkunata watukuq ancianokunapas chay nacionniyoq predicaqkunata kallpancharqaku huk law nacionniyoqkunawan kuska rinankupaq. Llapanpiqa 382 cristianokunam tukuy sonqonkuwan predicarqaku allin noticiamanta mana uyarisqanku lawkunapi.

Chay llaqtakunapa hichpanpi kaq cristianokunatañataq kamachirqaku riqkunapa samanankupaq sitiota maskamunankupaq. Mana achka qollqepa chanin wasikunatawan samana cuartokunatam arriendarqaku. Mana pisipaspam llamkarqaku huk lawmanta riqkuna samananku wasipi allichakunankupaq hinaspa sapa punchaw ima necesitasqankupipas yanaparqaku. Arriendarqakutaqmi huñunakuy ruranankupaq wasikunata, huñunakuytaqa rurananku karqa chay llaqtaman riq cristianokunam. Admirakuypaqmi karqa mana Testigokunapa kasqan llaqtakunapi, Diosta alabanankupaq yaqa 50 testigokunapa huñunakusqankuqa.

Huk nacionniyoq iñiqmasinchikpa kusikuyninkuqa admirakuypaqmi karqa. Manam imapas harkarqachu, nitaq qoninan tiempopi llumpa-llumpay rupasqanpas (40 °C). Kimsa semanallapim tukururqaku Danubio mayupa waqtanpi tarikuq Silistra llaqta predicayta, chaypim yachanku 50.000 masnin runakuna. Chaymi Testigokunaqa rirqaku hichpanpi tarikuq llaqtakunaman hinaspa chayarurqaku Tutrakan llaqtaman, chayqa kachkan 55 waranqa metropim intipa seqaykunan lawpi. Qallariqkum 9 hora pasayta, chaymantam samaykuqku almorzanankupaq hinaspa hinalla predicaqku 7 hora tardekama. Kazanlak hinaspa  Sandanskipipas yaqa chaynam pasakurqa, allinta predicasqankuraykum enteronta tukururqaku hinaspa hichpanpi llaqtakunamanpas rirqaku.

¿Imapim rurasqanku tukurqa?

Qanchis semana predicasqankupim allinta willarqaku. Punta pachak watapipas nirqakum apostolkuna ‘Jerusalenpi lliw runakunaman yachachisqankumanta’. Chaynatam ninmanku karqa Testigokunamanta chay llaqtayoq runakunaqa (Hech. 5:28). Runakunamanmi saqemurqaku 50.000 revistakunata hinaspa Bibliamanta estudiota qallarirqaku 482 runakunawan. Chaynataq, 1 de septiembre 2009 watapaqmi rikurirqa punta kaq congregacion Silistra lawpi, grupokunapas kachkanñam Kazanlak chaynataq Sandanskipipas. Anchatam kusikunchik chayllaraq allin noticiamanta uyariq achka runakuna iñiyninkupi ñawparisqankuwanqa.

Punta semanapim, búlgaro idioma rimaq España nacionniyoq precursora especial callepi predicarqa Karinata, payqa Silistra lawpim periodicota rantikun. Atencionwanmi Karinaqa uyarirqa hinaspa huñunakuyman rirqa, chaymantam Bibliata estudiarqa. Diospi qosan mana iñiptinmi, mañakurqa parquepi estudiota qonankupaq. Iskay warmi wawankunawan kuskam estudiaqku, mayor kaq Danielam anchata munaq Bibliamanta yachayta. Huk semanallapim Yachachiq librota leerurqa hinaspa Bibliapa kamachisqanta kasukuspa chaylla saqerurqa taytacha-mamacha yupaychayta. Amistadninkunamanpas cheqapmanta willaytam qallarirqa. Huñunakuyman chayllaraq risqanmanta 3 semana pasaruptinmi estudiachiqnin hermanata nirqa: “Qamkuna hina kasqaytañam piensani. ¿Imatataq ruranay qamkunawan kuska predicanaypaq?”, nispa. Danielaqa hinallam ñawparichkan mamanwan hinaspa sullkanwan kuska.

Italiamanta hamuq Bulgaria nacionniyoq Orlin sutiyoq cristianom rirqa Kazanlak lawman. Huk punchawmi samanan wasiman kutichkaspan iskay mozokunata parquepi tiyachkaqta rikururqa hinaspa asuykurqa predicananpaq. Yachachiq librotam saqerqa hinaspa nirqa paqarinnintinta kutinanpaq. Chay kutipim Svetomir sutiyoq huknin mozo Bibliamanta estudio chaskiyta munarqa. Paqarinnintinpas estudiarqakum, 9 punchawllapim 8 kutita estudiarurqaku. Chay mozom Orlinta nirqa: “Parquepi predicawasqaykimanta iskay punchaw ñawpaqtaraqmi Diosta nirqani reqsiy munasqayta hinaspa yanapawaptinqa tukuy vidaywan servinaypaqpas”. Italiaman Orlin kutisqan qepatam, chay llaqtapi iñiqmasinchikkuna Svetomirta hinalla watukurqaku, payqa hinallam ñawparichkan.

 Predicanankupaq imakunapas saqesqankuqa kusikuytam tarichin

¿Imatam piensanku kikinku gastaspanku hinaspa vacacionninkuwan predicanankupaq Bulgariaman riqkuna? Españapi huk ancianom qellqarqa: “Búlgaro idioma rimayniyoqkunata kaypi atiendeq cristianokunatam, Bulgariaman risqanku astawan huñurun. Risqankuqa paykunapaqmi ancha allin karqa”, nispa. Italia nacionniyoq casarasqa iñiqmasinchikkunam kaynata qellqarqaku: “¡Ñoqaykupaqqa ancha sumaqmi chay killaqa karqa! [. . .] Chayman predicaq risqaykum vidaykuta tikrarun. Manam puntata hinañachu kaniku”, nispa. Paykunam piensachkanku Bulgariaman rispa aswan necesitakusqanpi yanapakuyta. España nacionniyoq Carina sutiyoq soltera precursoram, Silistraman predicaq rirqa. Kutiramuspanmi llamkayninmanta lloqsikuruspan chayllaraq rikuriq congregacionta yanapaq kutikun Silistra llaqtaman. Bulgariapi huk wata kananpaqmi qollqenta churakusqa. ¿Imaynam tarikun chaynata rurasqanwan? Paymi nin: “Ancha kusisqam kachkani Bulgariaman hamunaypaq Jehová Dios saqewasqanmanta, unay tiempom qepayta munachkani. Pichqamanñam estudiota qochkani, paykunamantam huñunakuyman kimsaña richkanku”, nispa.

Italia nacionniyoq huk cristianapas munarqam predicacionpi yanapakuyta, ichaqa chayllaraq llamkayta qallarisqanraykum vacacionnin manaraq karqachu. Chaywanpas valorchakuspanmi mana pagasqa kananpaq huk killa permisota qonanpaq mañakurqa, mana qoptinkuqa llamkaynin saqeytam tantearurqa. Admirakuypaqmi patronnin kaynata nirqa: “Riyyá, ichaqa Bulgaria imayna kasqanmantam foto horqosqata apachimuwanki”, nispa. Payqa convencesqam kachkan mañakusqanta Jehová Dios uyarisqanmanta.

Stanislava sutiyoq sipas cristianam Bulgariapi Varna llaqtapi yachan, tukuy tiemponwanmi llamkaq hinaspa allin pagasqataq karqa, paypas permisotam mañakurqa Silistraman predicaq rinanpaq. Chay llaqtaman chayaruspanmi, nacionninman hamuq huk law nacionniyoq precursorkunapa kusikuyninta qawaspan waqarqaraq. Hinaspam yuyaymanarqa vidanta imayna servichikusqanmanta, wasinman kutispa 2 semana pasaruptinmi llamkayninmanta lloqsikuruspa precursora regularña karqa. Kunanmi Stanislavaqa ancha kusisqa tarikun, sipas kasqanpi Unanchaqninta servispan (Ecl. 12:1).

¡Achka bendicionkunatam chaskinku tukuy sonqonkuwan Jehová Diosta serviqkunaqa! Vidanchikpi ancha allin rurayqa: tiemponchiktawan kallpanchikta predicanapaq hinaspa runakunata yachachinapaq servichikuymi. ¿Atiwaqchu astawan predicayta chaynapi runakuna salvakunankupaq? Ichapas nacionnikipa llaqtankunapi necesitakuchkan predicaqkunata. ¿Piensarqankichu chay lawkunaman rinaykipaq? Ichapas atiwaq huk idioma yachayta chaynapi chayna rimayniyoqkunata Bibliamanta yachachinaykipaq. Imataña saqenayki kaptinpas, segurom kawaq Jehová Dios achkanpi bendecisunaykimanta (Pro. 10:22).

[32 kaq paginapi dibujo hinaspa recuadro]

Mana qonqanapaq punchaw

Huk law nacionkunamanta Bulgaria nacionman predicaq riqkunamantam achka rirqaku Sofía llaqtapi kimsa punchaw kayna sutiyoq Asambleaman: ‘¡Listollayá kaychik!’ Bulgariapi iñiqmasinchikkunam ancha kallpanchasqa karqaku, Europa lawmanta tukuy nacionniyoq achka iñiqmasinkuta reqsispanku. Llapankupa admirakunankupaqmi Diospa llaqtanpi Punta Apaq Geoffrey Jackson, viernes punchawta búlgaro idiomapi Traducción del Nuevo Mundo de las Santas Escrituras sutiyoq Biblia lloqsimusqanta qawachirqa. 2.039 huñunakuqkunam ancha kusisqa tarikurqaku hinaspa agradecesqa kasqankuta qawachirqaku unayta kallpawan taqllakuspanku. Karqam kusikuymanta waqaqkunapas. Chay allin tikrasqa hinaspa facil entiendena Bibliaqa, Bulgariapi allin sonqoyoq runakunatam yanapanqa Jehová Diosta reqsinankupaq.

[31 kaq paginapi mapa]

(Imayna kasqanmanta yachanapaq qaway kay qellqata)

BULGARIA

SOFÍA

Sandanski

Silistra

Kazanlak

[31 kaq paginapi dibujokuna]

Qanchis semana predicasqankupim allin willakuy apakurqa