Congregacionpi rurayninchikta chaninchasun

“Diosmi churarqa cuerpopa partenkunataqa munasqan sitiopi.” (1 COR. 12:18.)

1, 2. a) ¿Imanasqataq seguro kachwan congregacionpi sapakamapa rurayninchik kasqanmanta? b) ¿Ima tapukuykunam kay estudiopi contestasqa kanqa?

ÑAWPAQ Israel nacionpa tiemponmantaraqmi Diosqa congregacionninta servichikurqa llaqtanta yachachinanpaq hinaspa yanapananpaqpas. Hai llaqtata vencesqanku qepatam “Israel casta llapallan runakunapa qayllanpi”, ‘Josuey leerqa tukuy yachachikuykunapa ima nisqanta. Leerqamá runakunapaq bendicionkunatapas chaynataq ñakaykunatapas, chaykunaqa kachkan yachachikuykuna qellqasqa libropim’ (Jos. 8:34, 35).

² Punta pachak watapim Pabloqa Timoteoman qellqaspan nirqa Diospi iñiqkuna otaq congregacionqa “Diospa wasin” hinaspa “wasipa pilarnin hina” cheqapta takyachiq kasqanta (1 Tim. 3:15). Kunanqa ‘Diospa wasinqa’ kanku enteron pachapi cristianokunam. Corintoman punta cartasqanpim 12 capitulopi Pabloqa iñiqkunata cuerpowan tupachirqa. Dios yanapaptinmi nirqa cuerpopa partenkunaqa mana kaqllata ruraspankupas, llapanku serviq kasqankumanta. Kaynatam qellqarqa: “Diosmi churarqa cuerpopa partenkunataqa munasqan sitiopi”, nispa. Nirqataqmi ‘cuerpopi mana ancha kuyasqanchikkunata aswan sumaqtaraq’ cuidasqanchikta (1 Cor. 12:18, 23). ‘Diospa wasinpi’ sapa cristianopa rurasqanpas manam  wakinkunapa rurasqanmantaqa aswan allinchu nitaq mana serviqchu, ichaqa sapakamam huk rurayniyoq kanchik. ¿Imaynatam yachachwan congregacionpi ima rurayninchik kasqanta hinaspa chaninchasqanchikta qawachichwan? ¿Imakunamantam kanqa ima rurayniyoq kanapaq? ¿Imatam rurananchik ‘aswan-aswan ñawpaqman risqanchikta’ llapallanku qawanankupaq? (1 Tim. 4:15.)

Rurayninchikta imayna chaninchanamanta

3. ¿Imaynatam congregacionpi ima rurayninchik kasqanta yachachwan hinaspa chaninchasqanchikta qawachichwan?

³ Congregacionpi ima rurayninchikta yachanapaq hinaspa chaninchasqanchikta qawachinapaqqa yanapananchikmi ‘confianza sirvienteta’ chaynataq paykunapa rantinpi Jehová Diospa Llaqtanpi Punta Apaqkunatapas (leey Mateo 24:45-47). Allintam yuyaymanananchik ‘confianza sirvientapa’ niwasqanchikkunata sonqomanta kasukusqanchikta yachanapaq. Ejemplopaq, achka watakunañam consejokunata chaskirqanchik imayna pachakunamantawan allichakunamanta, kusirikuykunamanta hinaspa Internet servichikunamantapas. ¿Kasukunchikchu chay consejokunata chaynapi Dioswan amistadninchik allin kananpaq? Kallpanchasqataqmi karqanchik tiempota rakispa familiawan Diosta yupaychanapaq. ¿Kasukuchkanchikchu niwasqanchikta? ¿Huk tutata rakirunchikñachu chayta ruranapaq? Soltero otaq soltera kaspaqa, ¿chay tiempota servichikuchkankichu Bibliata estudianaykipaq? Confianza sirvienteta kasukuptinchikqa Diosmi ñoqanchiktawan familianchiktapas bendecinqa.

4. ¿Imakunapim piensananchik kikinchikpaq imatapas tanteaspa?

⁴ Pipas ninmanchá: “Imayna pachakuyta, allichakuyta hinaspa kusirikuytaqa sapakamam tanteana”, nispa. Ichaqa, congregacionpi rurayninkuta chaninchaq cristianokunaqa kaytam yachanku: manam munasqankuman hinallachu kaykunamantaqa tanteananku, aswanqa Diospa munasqanman hinam, paypa munasqantaqa Bibliapim tarinchik. Diospa Palabranqa kanan ‘chakinchikta kanchaykuq mechero hinam’ chaynataq ‘purisqanchik ñanpi achki hinam’ (Sal. 119:105). Piensananchiktaqmi Dios servisqanchik hinaspa cristianokunawan huk runakunapas tanteasqanchikwan imayna kanankumanta (leey 2 Corintios 6:3, 4).

5. ¿Imanasqataq munasqallanchikman hina ruray sonqonchikpi wiñanantaqa mana saqenanchikchu?

⁵ Mana allinkuna ruray munaymi “Diosta mana kasukuqkunataqa kallpanchachkan” (Efe. 2:2). Chaymi piensayta qallaykuchwan Diospa llaqtanpa yanapakuyninta mana necesitasqanchikta. Manachá mayqanninchikpas Diotrefes hina kaytaqa munanchikchu, payqa apostol Juanpa nisqantam mana imatapas respetowanqa chaskiqchu (3 Juan 9, 10). Chaymi kallpanchakunanchik munasqallanchikman hina ruray sonqonchikpi mana wiñananpaq. Manam haykapipas rimasqanchikwan otaq rurasqanchikwanpas Diospa servichikusqan confianza sirvienteta mana respetasqanchiktaqa qawachinanchikchu (Num. 16:1-3). Aswanqa chaninchasun paykunawan llamkasqanchikta hinaspa kallpanchakusun congregacionpi ancianokunata kasukunapaq (leey Hebreos 13:7, 17).

6. ¿Imanasqataq imayna tarikusqanchikta qawakunanchik?

⁶ ¿Imatawan ruraspam chaninchasun congregacionpi rurayninchikta? Imayna tarikusqanchikta qawakuspam tapukunanchik: “¿‘Tukuy sonqomantachu’ kallpanchakuchkani Diosta servinaypaq hinaspa hatunchanaypaq?”, nispa (Rom. 11:13). Congregacionpiqa kanmi precursor regular kayta atiqkuna. Wakinkuqa kanku misionero, congregacionkuna watukuq ancianokuna hinaspa Betelpi llamkaqkuna. Hukkunañataq ruranku huñunakunanchik Salonkunata. Chaymantapas,  yaqa llapanku chayna serviyta mana atispankupas, tukuy sonqonkuwanmi kallpanchakunku familiankuta yanapaypi hinaspa sapa semana predicaypipas (leey Colosenses 3:23, 24). Tukuy kallpanchikwan hinaspa Diosta kusisqallaña servispanchikqa llaqtanpim haykapipas rurayniyoq kasun.

¿Imamantam kanqa congregacionpi rurayniyoq kanapaq?

7. ¿Imanasqam congregacionpi imatapas ruranapaqqa imayna tarikusqanchikmanta kanqa?

⁷ Imayna tarikusqanchikpim piensana, wakinpiqa chaymantam kanqa Jehová Diosta servispa imatapas ruranapaq. Ejemplopaq, cristianopa rurayninmi wakinpiqa mana chaynallachu cristianapa rurayninwanqa. Chaynataq kanqa hayka watayoq kasqanchikmanta hinaspa saludninchikmantapas. Proverbios 20:29 nin: “Mozokunapa kallpanqa paykunapa adornon hinam. Yuyaqkunapa soqo chukchanqa paykunapa adornon hinam”, nispa. Chaynamá, mozo-sipaskunam kallpankuman hina achkata ruranmanku, yuyaqkunañataq anchata yanapanmanku experienciankuwan hinaspa yachayninkuwan. Ichaqa llapanchikmi yuyarinanchik, Dios favorecewaptinchik llaqtanpi imapas rurasqanchikmanta (Hech. 14:26; Rom. 12:6-8).

8. ¿Imanasqam congregacionpi ima rurayniyoq kanapaqqa ima ruray munasqanchikmanta kanqa?

⁸ Congregacionpi imatapas ruranapaqqa manam imayna tarikusqallanchikmantachu kanqa. Ejemplopaq, piensasun tayta-mamanwan kuska yachaq ñañantin 2 sipaskunapi, iskayninkum chaynalla tarikunku. Tayta-mamanmi iskayninkuta kallpancharqa estudionkuta tukuspanku precursor regular kanankupaq. Ichaqa 18 watanpi estudionkuta tukuruspankum huknin precursora kayta qallaykun, hukninñataq tukuy punchaw llamkayta. ¿Imanasqataq mana chaynallatachu tantearqaku? Sapakamam munasqankuta rurarqaku. ¿Manachu ñoqanchikpas sonqonchikpa munasqanta ruranchik? Chaymi allinta piensananchik Dios serviypi ima haypay munasqanchikmanta. ¿Atichwanchu Diospaq astawan llamkayta imakunata saqenanchik kaptinpas? (2 Cor. 9:7.)

9, 10. ¿Imatam rurananchik Diosta astawan serviyta sonqonchikpi munananchikpaq?

⁹ ¿Imatam rurachwan congregacionpi mana kallpanchakuspanchikqa hinaspa Diosta astawan serviyta sonqonchikpi munanapaq? Filipos llaqtapi iñiqkunaman cartasqanpim Pablo kaynata nirqa: “Diosmi munasqanman hina allin munayta qosuspaykichik allinkuna ruranaykichikpaq yanapasunkichik”, nispa. Jehová Diosqa yanapawanchikmanmi astawan serviyta munanapaq (Fili. 2:13; 4:13, NM).

¹⁰ ¿Manachu chayta ñoqanchikpas mañakunanchik? Chaynatam rey Davidpas rurarqa, mañakurqam: ‘Dios Taytalláy, yachaykachillawayá munasqaykiman hina kawsakuyta [. . .], cheqap kaqnikiman hina pusawaspayki. Salvaykuqniy Diosmá qamqa ñoqallaypaq kanki. Hina qampunimá tukuy punchaw confiakunay Diosqa kanki’, nispa (Sal. 25:4, 5). Ñoqanchikpas Diostam mañakuchwan agradonpaq kaqta rurananchikpaq.  Rurasqanchikta Jehová Dioswan Churin chaninchasqankumanta yuyaymanaspaqa sonqonchikmantam kusikusun (Mat. 26:6-10; Luc. 21:1-4). Agradecesqa kasqanchikmi kallpanchawanchik Diosta mañakunapaq, chaynapi payta servisqanchikpi ñawpariyta munananchikpaq. Isaiaspa ejemplonta qatipakusun. Diosmi tapurqa: “¿Pitataq kachasaq? ¿Pitaq willakamunqa ñoqaykumanta?”, nispa. Hinaptinmi payqa nirqa: “Kayqaya ñoqa kaypi kachkani [. . .], ñoqatayá kachaway”, nispa (Isa. 6:8).

¿Imaynatam Diosta serviypi ñawparichwan?

11. a) ¿Imanasqataq congregacionpi kaq qarikunaqa kallpanchakunanku aswan rurayniyoq kanankupaq? b) ¿Imatam huk cristianoqa ruranan congregacionpi astawan rurayniyoq kananpaq?

¹¹ Septiembre 2007 watamanta agosto 2008 watakamam enteron pachapi bautizakurqaku 289.678 runakuna, kaymi qawachin ancianokuna necesitakusqanta. Chaynaqa, ¿imatam congregacionpi qarikuna rurananku? Siervo ministerial hinaspa anciano kanankupaq Bibliapa nisqankunata cumplinankupaqmi kallpanchakunanku (1 Tim. 3:1-10, 12, 13; Tito 1:5-9). Bibliapa nisqankunata cumplinankupaqqa kallpanchakunankum: predicanankupaq, congregacionpi rurayninkunata allinta atiendenankupaq, huñunakuypi allinta rimarinankupaq hinaspa iñiqmasinkunamanta interesakunankupaqpas. Chaynata ruraspankuqa congregacionpi rurayninkutam chaninchachkanku.

12. ¿Imatam mozokuna ruranmanku iñiyninkupi ñawparinankupaq?

¹² ¿Imatam mozokuna ruranmanku iñiyninkupi ñawparinankupaq? Bibliamantam allinta yachananku, chaynapi ‘yachayniyoq kanankupaq’ hinaspa Diosta allinta reqsinankupaq (Col. 1:9). Chaypaqqa allintam estudiananku, huñunakuykunapipas rimanankum. Chaymantapas, tukuy tiemponkuwan Diosta servinankupaqmi Bibliapa nisqankunata cumplinankupaq kallpanchakunanku (1 Cor. 16:9). Dios serviyta vidankupi puntata churaspankuqa, kusisqam kanqaku hinaspa premiotapas chaskinqaku (leey Eclesiastes 12:1).

13, 14. ¿Imaynatam cristianakuna qawachinmanku congregacionpi rurayninku chaninchasqankuta?

¹³ Cristianakunañataqmi qawachinmanku Salmo 68:11 nisqan cumplinankupaq favorecesqa kasqanku chaninchasqankuta, chaypim nin: ‘Señormi noticiata willakurqa, chaytam achka warmikuna willakunku’, nispa. Chaytaqa ruranmanku Jesuspa qatiqnin kanankupaq runakunata yachachispankum (Mat. 28:19, 20). Arí, munasqankuta saqespa tukuy kallpankuwan Diospa munasqanta ruraspankum, qawachinku congregacionpi rurayninku chaninchasqankuta.

 ¹⁴ Pablom Titoman qellqaspan nirqa: “Señorakunapas Diospa agradonpaqyá kawsachunku [. . .], paykunaqa allin ruraytayá yachachichunku. Chaynata kawsaspam sipas warmikunata yachachinqaku qosankutawan wawanku kuyayta, allin piensayta, chuya sonqo kayta, wasinkupi imapas rurakuyta, allin sonqo kayta hinaspa qosanku kasukuyta, chaynapim Diospa palabranpa contranpiqa mana pipas rimanqachu” (Tito 2:3-5). Qawasqanchikman hinaqa, experienciayoq cristianakunaqa allintam yanapakunku. Respetankum congregacionpi punta apaqkunata, allinta tanteaspam akllanku imawan kusirikuyta, pachakuyta chaynataq allichakuytapas. Chaynapim allin ejemplo kanku hinaspa qawachinku congregacionpi rurayninkuta chaninchasqankutapas.

15. ¿Imatam soltera cristianakuna rurananku sapallan kasqankuta mana piensanankupaq?

¹⁵ Wakinpiqa soltera cristianakunam sasachakunmanku congregacionpi ima rurayninku kasqanta yachanankupaq. Huk cristianam nin: “Wakinpiqa sapay kasqaytam piensani”, nispa. Chayna kasqanta imata ruraspa atipasqanmanta tapuptinkum nirqa: “Diosta mañakusqay hinaspa estudiasqaymi yuyarichiwan congregacionpi rurayniyoq kasqayta. Ñoqamanta Jehová Dios ima sientesqanmanta yachachikuytam maskani, hinaspam iñiqmasiykunata yanapanaypaq kallpanchakuni. Chayta ruraspaymi kikiypiqa manaña anchata piensanichu”, nispa. Salmo 32:8 nisqanpim Davidta Dios kaynata nirqa: ‘Ñoqam qawariykuspay consejasqayki’, nispa. Arí, Jehová Diosqa serviqninkunamantaqa sapakamamantam nanachikun chaynataq solterakunamantapas. Paymi llapanchikta yanapawasun llaqtanpi ima rurayniyoq kananchikpaq.

Ama haykapipas saqeychu congregacionpi ruraynikitaqa

16, 17. a) ¿Imanasqataq Diospa llaqtanpi kanapaq niwasqanchikta kasukuyqa ancha allin? b) ¿Imatam rurananchik congregacionpi rurayninchikta mana saqenapaq?

¹⁶ Anchata kuyawaspanchikmi Diosqa llaqtanman pusamuwarqanchik, chaymi amistadta paywan ruranchik. Jesusmi nirqa: “Manam pipas hamunmanchu ñoqamanqa kachamuwaqniy Taytay ñoqaman mana pusamuptinqa”, nispa (Juan 6:44). Millonnintin runakunamantam Diosqa ñoqanchikta pusamuwarqanchik llaqtanpi kananchikpaq. Allintamá tantearqanchik llaqtanpi kanapaqqa, chayraykum imapaq kawsasqanchikmanta yacharunchik. ¡Maynatamá kusichiwanchik congregacionpi rurayniyoq kasqanchikqa!

¹⁷ Salmos qellqaqmi nirqa: “Dios Taytalláy, ñoqallayqa kuyallanim yachanayki templollaykitaqa”, nispa. Nirqataqmi: “Manapunim mitkanqachu chakillayqa [. . .]. Lliw huñunakuqkunapa chawpinpiqa Tayta Diostamiki alaballasaq ñoqallayqa”, nispa (Sal. 26:8, 12). Diosqa llapanchikmanmi qowanchik llaqtanpi imata rurananchikpaqqa. Llaqtanpa niwasqanchiktayá kasukusun hinaspayá tukuy tiemponchikwan payta servisun, chaynapim congregacionpi rurayninchiktaqa mana saqesunchu.

¿Yuyachkankichu?

• ¿Imanasqataq nichwan congregacionpi sapakamapaq rurayninchik kasqanta?

• ¿Imaynatam qawachichwan congregacionpi rurayninchik chaninchasqanchikta?

• ¿Imakunamantam kanqa congregacionpi ima rurayniyoq kananchikpaq?

• ¿Imaynatam mozo-sipaskunawan yuyayniyoqkuna qawachinmanku congregacionpi rurayninku chaninchasqankuta?

[Kay yachachikuypa tapukuyninkuna]

[16 kaq paginapi dibujokuna]

¿Imatam cristianokunaqa rurananku congregacionpi aswan rurayniyoq kanankupaq?

[17 kaq paginapi dibujo]

¿Imaynatam cristianakuna qawachinmanku congregacionpi rurayninku chaninchasqankuta?