‘Allin noticiamanta willana’ punchawpiqa ama imawanpas harkachikusunchu

SAMARIAMAN yaykunapi leprawan 4 onqoqkunam limosnakuspanku imatapas chaskirqakuchu. Aram nacionpi kaqkunam chay llaqtata muyurirurqaku chaymi llaqtapi runakunaqa yarqaymanta wañuchkarqaku. Llaqtaman yaykuyqa yanqapaqmi karqa, mikuypas mana rantiy atinañam karqa. Huk warmim wawantapas mikururqaña (2 Rey. 6:24-29).

Chaymi leprawan onqoqkunaqa Arampa campamentonman tutaykuptin rirqaku. Samariapi qepaptinkupas otaq riptinkupas vidankuqa peligropim karqa. Chayaruptinkuqa manam pipas kasqachu. Caballokunawan asnokunallam watasqa kachkasqa, manam kasqachu campamentota cuidaqkuna nitaq soldadokunapas. Admirakuspankum huk carpata qawarqaku, mana pipas kaptinmi yaykuspa chaypi tukuy imata mikurqaku hinaspa upyarqaku. Rikurqakutaqmi qorimantawan qollqemanta kaqkunata, pachakunata hinaspa valorniyoq kaqkunatapas. Munasqankuta apakuspankum pakaq rirqaku hinaspa kaqllamanta kutimurqaku. ¡Aram nacionniyoq tropakunam campamentomanta lluptirusqaku! ¿Imanasqa? Milagrota ruraspanmi Diosqa tropakunapa qapariyninta uyarirachirqa. Contrankupi tropakuna hamusqanta piensaspankum, tukuy imata saqespa lluptirusqaku.

Leprawan onqoqkunaqa kuti-kutirispa tukuy imata apachkaspankum, yuyarirurqaku Samariapi yarqaymanta kasqankuta hinaptinmi conciencianku acusarqa. Chaymi nirqaku: ‘Kay rurasqanchikqa manam allinchu. Kunan punchawqa allin noticia willanam’, nispa. Chaymi llaqtaman kallpaylla rirqaku tarisqankumanta willanankupaq (2 Rey. 7:1-11).

Leprawan onqoqkuna hinam, ñoqanchikpas ‘allin noticia willana’ punchawpi kachkanchik. ¿Ima noticiatam willakunanchik? Jesuspa kayna nisqanmantam: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, chaynataqa nirqa ‘kay pacha puchukananmanta’ rimaspanmi (Mat. 24:3, 14). ¿Imaynatam kaykunamanta yachayqa yanapawananchik?

Tukuy imapi afanakuspaqa rurayninchiktam qonqaruchwan

Leprawan onqoqkunaqa tukuy imata tariruspankum, qonqarurqaku Samariapi kaqkunapa imayna kasqankuta. Kikillankupi piensaspam mikuypi afanakuchkarqaku. ¿Chayna pasaruwachwanchu? Jesusqa nirqam tukupay tiempopi “muchuykuna” kananta (Luc. 21:7, 11). Qatiqninkunatam nirqa: “Yanqañataqmi viciokunapi, machakuykunapi hinaspa kay pachapi imapas kaqkunapi afanakuchkaqta qonqayllamanta chay punchawkuna tariramusunkichikman”, nispa (Luc. 21:34). Arí, cuidakunanchikmi imapas necesitasqanchikta maskaspa ‘allin noticia willanapaq’ punchawpi kasqanchikta mana qonqarunapaq.

Rimarisun Blessing sutiyoq iñiqmasinchikmanta. Payqa Diospa munaynintam haykapipas puntapi churarqa. Estudiaspanpas precursoram karqa. Chaymantañam casarakurqa Betelpi llamkaqwan hinaspam paypas Benín law Betelpi llamkananpaq invitasqa karqa. Paymi nin: “Limpiaspaymi llamkani, anchatam kusikuni llamkasqaywan”, nispa. Blessingqa 12 watañam  tukuy tiemponwan Diosta servichkan, anchatam kusikun ‘allin noticia willanapaq’ punchawpi kasqanta mana qonqasqanmanta.

¿Imakunapim tiemponchikta usuchichwan?

Predicanankupaq 70 qatiqninkunata kamachispanmi Jesus kaynata nirqa: “Achkallañam kachkan cosechanapaqqa, cosechaqkunam ichaqa aslla, chaynaqa mañakuychikyá chakrayoqta cosechaqkunata kachananpaq”, nispa (Luc. 10:2). Chakrapi llamkaq tiempollanpi mana cosechaptinqa wakinqa usurunmanmi. Chaynallataqmi, predicananchikta imawanpas harkachikuptinchikqa achka runakunam wañurunmanku. Nirqataqmi: “Ñanpiqa amataqmi pitapas rimaykunkichikchu”, nispa (Luc. 10:4). Griego idiomapi ‘rimaykuy’ nisqa palabraqa manam “imaynallataq kachkanki” niyllachu otaq runakunata “rimaykuyllachu”. Karqataqmi iskay amistadkuna tuparuspa abrazanakusqanku hinaspa unayta rimasqankupas. Willasqanku ancha allin kasqanraykum, Jesuspa qatiqninkunaqa mana imapipas tiemponkuta usuchinankuchu karqa.

¡Achka tiempotamá qechuwanchik imakunapas! Unayñam televisionqa runakunapa tiemponta suwachkan. Ichaqa, ¿imatam nichwan celularkunamantawan computadorakunamanta? Gran Bretaña lawpim 1.000 runakunata tapurqaku hinaspam yacharurqaku, “mana apu kaspankupas wasinpi telefonowan huk punchawllapi 88 minutota qayasqankuta, celularwan 62, computadorawan 53 hinaspa celularwanpas 22 minutota qellqasqankuta”. Killapiqa yaqa 112 horam, kayna tiempoqa haypanmi iskay kuti masnintaraq precursor auxiliar kanapaq. Chaymi tapukunanchik: “¿Hayka tiempotam kaykunata servichikuni?”, nispa.

Ernst hinaspa Hildegard Seliger warmi-qari iñiqmasinchikkunam tiemponkuta allinta servichikurqaku. Alemania gobiernopiwan hukkunapas presochaptinkum, iskayninkumanta 40 wata masninta carcelkunapi karqaku, lloqsimuspankum kay Pachata saqenankukama precursor karqaku.

Achka runakunam paykunawan carta apachinakuyta munarqaku, leenankupaq hinaspa contestanankupaqqa yaqa llapan tiemponkutachá servichikunmanku karqa. Ichaqa Diosta serviyninkum aswan valorniyoq karqa.

Llapanchikmi munanchik kuyasqanchikkuna carta apachimuwananchikta otaq telefonowan qayamuwananchikta. Chayqa allinmi. Tiempochakunanchikmi imapas munasqanchikkunata ruranapaq. Ichaqa tiemponchiktam cuidananchik, mana chayqa ‘allin noticia willananchik’ tiempotam usuchichwan.

Mana imawanpas harkachikuspa willasun ‘allin noticiamanta’

¡Mayna sumaqmi ‘allin noticia willana’ punchawpi kawsayqa! Amayá saqekusunchu leprawan onqoqkunata qallariyninpi pasasqanta hina pasawananchiktaqa. Chaymantañam nirqaku: “Kay rurasqanchikqa manam allinchu”, nispa. Ñoqanchikpaqpas manam allinchu kanman imatapas munasqanchik otaq kusirikuykuna predicaymanta harkawaptinchikqa.

Pablopa rurasqanmi allin ejemplo ñoqanchikpaqqa. Qallariyninpi 20 wata predicasqanmanta yuyarispanmi, kaynata qellqarqa: ‘Cristomanta allin noticiakunatam tukuy hinastinman rispay willakurqani’, nispa (Rom. 15:19). Pablotaqa manam imapas harkarqachu kusisqa predicanantaqa. Ejemplonta qatipakuspayá tukuy kallpanchikwan Diospa munaychakuyninmanta willakusun kay ‘allin noticia willana’ punchawpi.

[28 kaq paginapi dibujo]

Blessingtaqa manam kikinpa munasqanqa harkarqachu tukuy tiemponwan Diosta servinantaqa

[29 kaq paginapi dibujo]

Ernst hinaspa Hildegardmi tiemponkuta allinta servichikurqaku