Astawan yachay munaqkunapaq
Astawan yachay munaqkunapaq
Bibliapa kamachisqanman hinaqa ¿imaninkutaq Jehova Diospa testigonkunaqa kikinkupa yawarninkuwan hampichikuymanta?
Diosta serviqkunaqa bibliapa nisqantam kasukunanku. Manam kikinkupa piensasqankuman hinallachu nitaq doctorkunapa imapas nisqanman hinallachu imatapas tantiananku. Chaynapim Jehova Dios kasukusqanta qawachinqa.
Kawsakuyta quwaqninchik Jehova Diosmi kamachiwarqanchik yawartaqa mana mikunapaq (Genesis 9:3, 4). Yawarwan kawsasqanchikraykum ñawpaq tiempopi Israel runakunatapas kamachirqa: “Animalpa vidanqa yawarninpim kachkan, ñuqam kamachirqaykichik chay yawarta altarman apaptikichik huchaykichikta pampachanaypaq”, nispa. ¿Imatataq animalpa yawarninwan ruwananku karqa nakaspankuqa? Diosmi nirqa: “Yawarninta pampaman suturachispanmi allpawan taparunqa”, nispa (Levitico 17:11, 13) *. Chay kamachikuytaqa Diosqa achka kutitam nirqa (Deuteronomio 12:16, 24; 15:23). Judiokunapa libronpas ninmi: “Yawartaqa manam guardanachu, aswanqa pampamanmi tallina chaynapi mana mikunapaq”, nispa (The Soncino Chumash). Israel runakunaqa ima animalpa yawarnintapas manam guardanankuchu karqa nitaq mikunankuchu karqa, chaytaqa ruwaqku yawarwan Dios kawsachisqanraykum.
Jesuspa wañukusqanmantapacham Moisespa chaskisqan kamachikuytaqa manaña kasukunchikchu. Chaywanpas Diospaqqa yawarqa hinallam ancha chaninniyuq. Diospa chuya espiritun yanapaptinmi apostolkunapas Jesuspa qatiqninkunata nirqaku yawarta ama servichikunankupaq. Chay kamachikuytaqa kasukunankupunim karqa, chayqa huchapakuymanta utaq taytacha-mamachata yupaychaymanta karunchakuy hinam karqa (Hechos 15:28, 29; 21:25). Iskay chunka watakuna qipatam yawarta churachikuspa hampichikuyta hinaspa hukkunaman quyta astawan qallaykurqaku. Chay watakunapitaqmi Jehova Diospa testigonkunaqa entienderurqaku bibliapa kamachisqanman hina mana kasqanta. *
Wakinpim doctorkunaqa manaraq operachkaspanku ninku yawarninta hurquruspa operaspan kutiykachinanpaq. Ichaqa hurquruspa churarayachispaña kutiykachiyqa manam Diospa kamachisqanman hinachu, chaytam Levitico hinaspa Deuteronomio qillqapipas willakun. Yawartaqa manam churarayachinachu, aswanqa pampamanmi tallina, chaynapim Diosman kutichichkanchikmanpas hina kanqa. Kunanqa manañamá Moisespa chaskisqan kamachikuykunataqa kasukunchikchu. Chaywanpas Jehova Diospa testigonkunaqa Diospa kamachisqantam kasukuniku, chaymi yawartapas mana servichikunikuchu, pimanpas manam qunikuchu nitaq churarayachinikuchu chaymanta churachikunaykupaqqa. Aswanqa pampamanmi talliniku, yawarta imapaqpas servichikuyqa manam Diospa kamachisqanman hinachu.
Wakinpi ima unquywan kasqanchikta yachanankupaq doctorkunapa hurqusqanmantaqa manam bibliaqa imatapas ninchu. Chaymi Diosta serviqkunaqa imawan unqusqankuta yachanankupaq yawarninkuta hurquchikunku, chay hurqusqanku yawartaqa wikapankum. Wakinpiñataqmi doctorkunaqa hina kikinkupa yawarnillanta servichikunankupaq ninku.
Wakinpiñataqmi operaspankuqa hemodilución nisqanta ruwanku. Chaypaqqa yawartam hurqunku hinaspam kaqmanta kutiykachinku, chaynapi cuerponpi yawar hinalla kananpaq. Wakinpiñataqmi operaptinku ususqan yawarta huñuruspanku chuyanchanku hinaspam kutiykachinku. Wakinpiñataqmi yawarta maqinaman huk ratolla hurqurunku hinaspam kutiykachinku. Wakinpiñataqmi yawarta limpianankupaq hurqunku, wakinpiñataqmi yawarta hurqunku hampikunata ruwanankupaq. Wakinpiñataqmi yawarta hurquruspankum ima hampiwanpas chaqruykuspa kaqmanta kutiykachinku.
Tiempopa risqanman hinam tukuy chaykuna ruwasqankuqa mana chaynallachu kanqa. Chaykunamanta sapakamamanta sumaqta yachaspanchikpas manam ñuqanchikchu chaytaqa tantiananchik. Diosta serviqkunaqa sapakamam operachikuspanku utaq hampichikuspankuqa yawarninkuwan imata ruwanankupaqqa tantiakunanku. Manaraq hampichikuchkaspam doctorta tapunanku yawarninwan imata ruwanankumanta, hinaspañam concienciankupa ima nisqanman hina tantiananku (Qaway “Kaykunatam tapukunayki” niqta).
Diosta serviqkunaqa Diosllapaqña kawsanankupaq nisqankutam yuyarinanku. Yuyarinankutaqmi Diosta tukuy sunqunkuwan, tukuy vidankuwan, tukuy kallpankuwan hinaspa tukuy yuyayninkuwan kuyanankumanta bibliapi nisqantapas (Lucas 10:27). Jehova Diospa testigonkunapaqqa imamantapas puntataqa Dioswan kuyachikuyniykum. Kawsakuyta quwaqninchik Diosqa Jesuspa wañukusqanpi iñinanchikpaqmi kamachiwanchik. Palabranpipas ninmi: “Runakunapa rantinpi churinpa precio pagasqanwanmi librasqa kanchik. Arí, Diospa ancha-ancha kuyakuyninraykum churinpa yawarninwan huchanchikmanta pampachasqa kanchik”, nispa (Efesios 1:7).
[Willakuy]
^ Frank H. Gorman sutiyuq ancha riqsisqa runapas nirqam: “Yawarta pampaman sutuchiyqa kawsakuy quwaqninchik Diosta respetaymi, Diosmi kawsakuy quwaqninchikqa hinaspa cuidawaqninchikqa”, nispa.
^ 1951 watapa noviembre killapi lluqsimuq La Atalaya sutiyuq qillqam yawarmanta rimarqa. Chaypim nirqa hukpa yawarninta churachikuyqa mana allin kasqanta.
[Recuadro/Fotokuna]
KAYKUNATAM TAPUKUNAYKI
¿Yawarniyta hurquruwaspanku unaymanta kutiykachiwaptinku hina kikiypa yawarniy kasqantaraqchu concienciaypi niyman?
Sichu limpianankupaq yawarniyta hurquruspanku kaqmanta cuerpoyman kutiykachiwaptinkuqa ¿imaynataq bibliamanta yachasqayman hina concienciaypi tarikuyman?