KUYASQA AYLLUNCHIK WAÑUKUPTIN

Wañukuq aylluyuqkunapaq yanapakuy

QALLARINMANMI

AYLLUNCHIK WAÑUKUPTIN IMAYNA TARIKUSQANCHIKMANTAM ASTAWANRAQ YACHAYSAPA RUNAKUNA ESTUDIACHKANKU. Sunqunchik tiyaykunanpaq ima ruwanamanta yachaysapa runakunapa nisqankuqa bibliapa yanapakuyninkunawanmi tupan. Bibliapi kaq yachachikuykunaqa hinaspa consejonkunaqa hinallam kunan tiempopipas yanapawanchik. Chayna yanapakuykunataqa manam maypipas tarinchikchu.

Bibliapim willawanchik wañukuq ayllunchikkunaqa mana ñakarisqankuta.

Bibliapim Eclesiastes 9:5, niwanchik: ‘Wañuqkunaqa manañam imamantapas yachankuchu’, nispa. Arí, piensasqankupas tukurunñam (Salmos 146:4). Chaymi bibliapiqa wañuytaqa tupachin miski puñuywan (Juan 11:11).
Kuyakuq Diospi hapipakusqanchikqa yanapawanchikmi.

Bibliam nin: ‘Jehova * Diosqa cuidachkanmi allin ruwaq runataqa. Tayta Diosqa uyarintaqmi mañakusqankunata’, nispa (Salmos 34:15). Diosta mañakuyqa yanapawanchikmi imatapas allinta ruwanapaq hinaspa paypi astawan hapipakunapaq. Diosninchikpas atiyninwanmi sunqunchikta tiyaykachinqa.
Qamuq tiempopiqa allinñam kawsakusun.

Bibliaqa achka kutitam willawanchik wañuqkuna kawsarimunanmanta. Kay pachapi imayna kawsakunanchikmanta rimaspanmi biblia nin: “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas”, nispa (Apocalipsis 21:3, 4). Mayna sumaqmi chayqa kanqa.

Achka runakunatam llakiwan mana intuchikunankupaq ayllunku kawsarimunanmanta yachay anchata yanapan. Chaytam nin Ann, paypaqa qusanmi 65 wataña kuska kachkaptinku wañukurqa. Paymi nin: “Bibliaqa segurawanchikmi wañukuqkuna mana ñakarisqankuta aswanqa niwanchik hamuq tiempopi paykunata Dios kawsarichimunanmanta. Chayta yachaymi yanapawan qusayta yuyarispay mana llumpayta llakikunaypaq”, nispa.

Ñaqa rimasqanchik Tinapas ninmi: “Qusay wañukusqan punchawmantam qawarqani Dios yanapawasqanta. Llumpa-llumpay llakisqa kachkaptiymi Jehova Diosqa chaylla sunquyta tiyaykachirqa. Wañuqkuna kawsarimunankumanta yachasqaymi yanapawan hinalla kallpanchakunaypaq chaynapi hamuq tiempopi qusaywan tupaykunaypaq”, nispa.

Paykunata hinam waranqantin runakunata bibliapa nisqanqa yanaparqa. Qampaq bibliapa nisqan yanqalla kaptinqa kallpachakuy kikikipuni bibliapa nisqankunamanta yachaykunaykipaq. Chaypaq kallpanchakuspaykiqa cuentatam qukunki bibliapa nisqankunaqa ayllunchik wañukuptinpas yanapawasqanchikta.