KAY pachapi yaqa 7.000 tukuy rikchaq rimaykuna kasqanmi gobiernokunata sasachan kamachimunankupaq, runakunapas sasachakunkum estudianankupaq, illanankupaq hinaspa rantikunankupaqpas. Ñawpaqmantaraqmi kay sasachakuyqa karqa. Yaqa 2.500 wata ñawpaqtaraqmi kamachiq Asueropa kamachikuyninkunata apachiqku, “Indiamanta qallaykuspa Etiopiakama pachak iskay chunka qanchisniyuq provinciakunaman, sapa provinciapa imaynam qillqankuman hina chaynataq rimayninkuman hina (yaqachusmi Asueroqa Jerjes I, karqa)”. *

Kunan tiempopiqa manam ima gobiernopas nitaq ima institucionpas chaynataqa ruwankuchu. Ichaqa huk sunqulla huñunasqa runakunam achka rimaykunapi qillqakunata ruwachkanku. ¿Pikunataq kanku? Jehova Diospa testigonkunam. Paykunam qillqakunata, videokunata hinaspa uyarinallapaq kaqkunata 750 masnin rimaykunapi ruwanku, chaymantapas ruwankutaqmi mana rimaqkunapaq (80 lenguajes de señas) hinaspa ñawsakunapaqpas (braille). Bibliatapas achka rimaykunapiñam ruwarunku.

Jehova Diospa testigokunaqa manataqmi chay ruwasqankuwanqa qullqichakunkutaqchu. Qillqakunata huk rimaypi ruwaqkuna hinaspa yanapaqninkunaqa mana imallapaqmi sunqumanta llamkanku. Ichaqa, ¿imanasqataq kallpanchakunku tukuy rikchaq rimaypi qillqakunata ruwanankupaq? ¿Imaynatam chayta ruwanku?