Qusaykiwan utaq señoraykiwan liriaruspaqa, yaqapaschá ninki: “Imanasqamá pampachaykuway nisaqqa. Manam ñuqachu huchayuqqa kani”, nispa.

Mana imatapas nispaykiqa hinalla piñanasqa kasqaykitam qawachichkanki, manataqmi atinkichu pampachaykullaway niyta.

Hatun tukuq kasqanchikraykum. Carlosmi * nirqa: “Hatun tukuq kasqayraykum sasachakuni pampachaykuway nispay señorayta ninaypaq”, nispa. Pipas hatun tukuq kaspanqa manam chayllachu riqsikun pantasqantaqa.

Imayna piensasqanchikraykum. Ichapas piensanki mana pantasqaykimanta pampachaykuway niyqa yanqapaq kasqanta. Sara sutiyuq warmim nin: “Pantarusqaymanta cuentata qukuspayqa chayllam pampachaykuwananpaq qusayta nini. Iskayniyku pantaruptiykum ichaqa piensani, ¿imanasqamá ñuqaqa pampachaykuwananpaqqa nisaq?”, nispa.

Qusayki utaq señorayki pantarusqanta yachaspaqa manapaschá pampachaykuway niytaqa atinkichu. Joseymi nirqa: “Mana huchaykimanta pitapas pampachaykuway nispaqa yanqamantam tumpakuchkanki”, nispa.

Imayna uywasqa kasqanchikraykum. Ichapas wasikipiqa pitapas mana uyarirqankichu pampachaykuway niqtaqa, chayqa sasachasunkipaschá pampachaykuway ninaykipaq. Pampachaykuway niyta mana yachaqqa yuyayniyuq kaspanmi astawan sasachakun.

Piensay qusaykipi utaq señoraykipi. Pantarusqanmanta pipas pampachaykullaway nisuptikiqa kusisqam tarikunki. Chaynallataqmi pampachaykullaway niptikiqa qusaykipas utaq señoraykipas kusisqa tarikunqa. Wakinpiqa mana musyakuspallam qusaykita utaq señoraykita imawanpas sientirachiwaq. Chaymi tukuy sunquykiwan pampachaykuway nispaykiqa sunqunta tiyaykachinki. (Bibliapa yachachisqan: Lucas 6:31).

Piensay casado vidaykipi. Pampachaykusunaykipaq nisqaykiqa manam yanqapaqchu, casado vidaykipim yanapasunki. Bibliapas ninmi piñanakuyqa wasipa cerrojon hina kasqanmanta (Proverbios 18:19). Pampachaykullaway nispaqa chayllam allinyanakunkichik, mana chaynata nispam ichaqa hinalla piñasqa kankichik. Pampachanakuspaqa casado vidaykichikpim mana sasachakunkichikchu. (Bibliapa yachachisqan: Filipenses 2:3).

Pampachaykusunaykipaq chaylla niy. Pampachaykullaway niyqa sasam, astawanraqmi mana huchayuq kasqaykita piensaptikiqa. Qusayki utaq señorayki pantaruptinpas kallpanchakuy pampachaykunaykipaq. Sientichinakusqaykichiktaqa manam chayllachu qunqarunkichik. Pantasqaykimanta pampachaykullaway nispaqa qusaykitapas utaq señoraykitapas yanapankim chaynata nisunaykipaq. (Bibliapa yachachisqan: Mateo 5:25).

Pampachaykusunaykipaq tukuy sunquykiwan niy. Chaywanchu piñakurunki niyqa manam chaynallachu pampachaykuway niywanqa. Ichapas piensanki imapas ruwasqaykiqa qusaykita utaq señoraykita mana piñachinanpaq hina kasqanta, chayna kaptinpas riqsikunaykim sientichisqaykitaqa.

Pantaq kasqaykita riqsikuy. Llapallanchikmi pantanchik, chayna kasqanchikta riqsikunapaqqa manam hatun tukuqchu kananchik. Piñanakusqaykichikmanta mana huchayuq kasqaykipi piensaynikiqa manam allinchu. Chaymi bibliapas nin: ‘Punta quejakuq runam allin ruwaq runaman rikchakun. Sapaq runa tapupayaptinmi ichaqa llulla kasqanta hapirachikun’, nispa (Proverbios 18:17). Pantaq kasqaykita riqsikuspaqa manam sasachakunkichu pampachaykullaway ninaykipaqqa.