Mariam * nin: “Iskay amistadniykunam kusikuyllawanña tukuy imata ruwaqku, ñuqatam ichaqa mana kaqpaqpas hapiwarqakuchu. Huk kutim huk kaqninta telefonowan qayarurqani, hinaspam uyarirqani kusikuyllawanña rimasqankuta. Chayta uyarispaymi aswan sapallay tarikurqani”, nispa.

¿Haykapipas sapallayki sientekurqankichu? ¿Mana kaqpaqpas hinatachu amistadnikikuna hapisunki? Chayna kaptinqa bibliam yanapasunkiman. Ichaqa, puntata yachaykusunchik sapallanchik sientekuyqa mana allin kasqanmanta.

Yaqa lliw runakunam haykapipas sapallan kasqankuta sientekurqaku. Achka amistadniyuq kaqkunapas chaynapimá tarikunku. ¿Imanasqa? Achka amistadniyuq kaspankupas, paykunapaqqa manam hukllapas allin amistadninqa kanchu. Arí, pipas achka amistadniyuqmá tarikunman, ichaqa chullallapas allin amistadnin mana kaptinqa sapallanmi sientekunqa.

Sapallayki sientekuspaykiqa unquruwaqmi. Doctorkunam 148 runakunata estudiaspanku nirqaku sichu pipas mana piwanpas rimaspanqa manapas tiemponpi wañusqankumanta. Nirqakutaqmi sapallanchik sientekuyqa “15 cigarrota huk punchawllapi pitay hina llumpay mana allin kasqanta”, chaynataq “llumpay puquruymanta iskay kuti masraq mana allin kasqanta”.

Sapallayki sientekuspaykiqa mana allin amistadkunawanmi hukllawakuruwaq. Chaynapi tarikuspaykim pi runawanpas chaylla amistadta armaruwaq. Alanmi nin: “Sapallayki sientekuspaykiqa pipas rimaykusunaykitam munanki. Imallatapas nisusqaykim imamantapas aswan allinqa. Ichaqa sasachakuykunamanmi apasunkiman”, nispa.

Ima aparatowanpas qillqanakuyqa manam yanapasunkichu. Nataliam nin: “Tukuy punchawmi mensajekunata apachispay kayman, chayta ruwaspaypas hinallam sapallay sientekuni”, nispa. Tomaspas ninmi: “Celularwan qillqanakuyqa mikuyta mallichkaq hinallam, kikinwan rimaspam ichaqa allinta mikuchkawaq hina tarikunki. Mikuyta malliyqa allinmi, ichaqa aswan allinmi saksanaykikama mikuyqa”, nispa.

Ama chaylla hukmanyaychu. Kaypi piensariy, ichapas amistadnikikunapa fotonta fiestapi kasqankumanta internetpi qawawaq. ¿Imapi piensaytaq aswan allin kanman? Llullankuta mana invitasusqaykipichu icha mana atisqankurayku mana invitasusqaykipichu. Chaymanta mana allinta yachasqaykiraykum chayllaqa mana hukmanyanaykichu. Allin kaqkunapi piensanaykipaq kallpanchakuy. Yaqapaschá mana kaqta piensasqaykirayku sapallayki sientekuchkanki. (Bibliapa yachachisqan: Proverbios 15:15).

Ama yanqakunata rimaychu. Sapallayki sientekuspaykiqa yaqapaschá kaynata ninki: “Manam haykapipas invitawankuchu”, utaq “Manam pipas ñuqawan amistad kaytaqa munanchu”, nispa. Chayna piensayqa manamá allinchu, chayqa rikchakunmanmi sinigapi kachwanpas hina. Chaymanta lluqsinapaq tukuyta ruwaspaqa astawanmi chinkakuykuchwan. Arí, sapallayki astawan sientekuspaykiqa, astawanmi pimantapas karunchakuyta qallaykuspayki chinkakuykuchkaq hina llumpay hukmanyasqa tarikunki. (Bibliapa yachachisqan: Proverbios 18:1).

Yuyayniyuqkunapa amistadnin kay. Bibliam willawanchik Davidmanta, paymi mozollaraq kachkaspan Jonatanwan amistadta armarurqaku. Jonatanqa 30 watawanmi masyarqa. Mana wiñaypura kaspankupas allin amistadmi karqaku (1 Samuel 18:1). Qampas chayna amistadniyuqmi kawaq. 21 watanpi kaq Claram nin: “Musyakururqanim yuyayniyuqkunapa amistadnin kay atisqanmanta. Kunanqa ñuqamanta aswan watayuq amistadkunawanmi hukllawakuni, paykunaqa imayna kasqankupiwan imayna piensayninkupim allin takyasqa kanku”, nispa. (Bibliapa yachachisqan: Job 12:12).

Ama manchakuychu sapallaykipi kaytaqa. Wakin runakunam sapallanku tarikuspanku hukmanyanku. Ichaqa manam sapallayki tarikuspachu sapallaykiqa sientekunayki. Piensariy kaypi, Jesusmi runakunawan kuska kayta munarqa, wakinpim ichaqa sapallan kayta munarqa (Mateo 14:23; Marcos 1:35). Sapallayki tarikuspa hukmanyanaykimantaqa, kallpanchakuy chayna tarikuspayki tukuy allin kaqkunapi yuyaymananaykipaq. Chay ruwasqaykim allin runa kanaykipaqwan allin amistadkunata tarinaykipaq yanapasunki (Proverbios 13:20).