2012 watapim octubre killapi, 29 semananpi, Nueva York llaqtapi anchata pisiyarurqa runakuna wañuchiy, hatun suwakuykunapiwan chayman rikchakuq mana allin ruwaykunapas. Ichaqa manam chaynachu karqa 2011 watapiqa. Kayqa pasarqa tukuy imata purmachiq Sandy sutiyoq hatun wayra-para kasqanraykum. Nueva York llaqtamanta Paul Browne sutiyoq policiam nirqa: “Hatun desgraciakuna kaptinmi, runa wañuchiykuna, hatun suwakuykunapiwan mana allin ruwaykuna pisiyarun”, nispa. Ichaqa llumpaymi tiendakunatawan wasikunata suwakuyqa rikurirurqa, achka llaqtakunapi Sandy sutiyoq hatun wayra-para luzninkuta yanqachasqanrayku.

Yachaysapa runakunam manchakunku huklawkunamanta plantakunapa yaykumusqan chaypi imapas kaqkunata sasachananmanta. Chay lawman waranqantin riq runakunam mana musyaylla sapa wata botasninkupi otaq qepinkupi yaqa chunka muhuta apanku. Chaymi Antártida Occidental lawpi achkallaña chay plantakuna wiñasqanta tarirunku.

Huk yuyaq warmipam 83 watanpi kachkaptin, kakichun mana valeqña rikurirurqa tullu onqoy hapiruptin, chaymi huk maquinawan ruwapurqaku titanio nisqamanta kakichunta. Chaymi kunanqa atinña mikuyta, samayta hinaspa mana sasachakuspa rimaytapas. Chay maquinaqa titaniopa polvontam chulluchirqa pisi-pisimanta kakichunman rikchakunankama hinaspam chay kakichuta churarqaku.

Achka runakunapa kasqankupi cigarrota mana pitanankupaq kamachikuyta horqoruptinkum, huk watallamanta qasqo nanaywan onqoqkuna hospitalkunapi menosyarurqa chunka kaq parte masninpi, chaynataqmi yaqa chunka kaq partenkama menosyarqa sonqowan onqoqkunapas.