‘Amayá apuyaytaqa kuyaychikchu [...]. Diosmi nirqa: “Manapunim dejasqaykichu”, nispa.’ (Hebreos 13:5)

¿IMAYNATAM DIOSQA INTERESAKUSQANTA QAWACHIN?

Jehova Diosqa tukuy imaymanata ruwaspanmi yanapan serviqninkuna qollqemanta sasachakuptinku. Yanapanmi kuyakuq cristianokunawanpas. a Santiago 1:27 nin: “Dios Taytataqa agradanchik kaynata servispam: mana tayta-mamayoqkunatawan viudakunata llakinkunapi yanapaykuspam”, nispa.

Punta cristianokunaqa necesitaq iñiqmasinkutam yanapaqku. Judea lawpi hatun yarqay kananmanta willakuy kaptinmi, Siria lawpi “Antioquiamanta iñiqkuna rimanakurqaku Judeapi iñiqkunaman atisqankuman hina yanapakuy apachinankupaq” (Hechos 11:28-30). Chaywanmi Judea lawpi kaqkunaqa yarqay kaptin aguantarqaku. Chaynatam cristianokunaqa kuyakuq kasqankuta qawachirqaku ruwasqankuwan (1 Juan 3:18).

‘Diosnikim ñoqaqa kani. Allinnikipaq yachachiqnikim kani.’ (Isaias 48:17, 18)

DIOSMI YANAPAWANCHIK KIKINCHIKTA YANAPAKUNANCHIKPAQ

Millonnintin runakunam tarirunku Bibliapa yachachisqanqa imawanpas mana tupachiy atina kasqanta. Proverbios 2:6, 7 nin: “Diosmi yuyay qokuqqa. Paymi palabranwan yachay qokuqqa. Paytaqmi rimasqanwan entiendechikuqqa. [...] Munasqanman hina ruraqkunamanmi allin kanankupaq yuyayta qoykun”, nispa. Diospa nisqanman hina kawsaqkunaqa kikinkum yanapakunku.

Kikinkum yanapasqa kanku tukuy ima viciokunamanta. Manam qollqenkuta usuchinkuchu drogakunapi chaynataq upyaykunapipas (2 Corintios 7:1). Chaymantapas aswan allin ruwaq, allin llamkaq hinaspa cumpliq kanankupaqmi yanapasqa kanku, chaynapim llamkayta tarinmanku otaq llamkayniyoqña kaspankupas aswan chaninchasqa kanku. Efesios 4:28 nin: ‘Pipas ñawpaqta suwa kaspaqa amañayá suwakuchunchu, aswanqa allintayá [...] llamkachun chaynapi imallawanpas muchuqkunata yanapaykunanpaq’, nispa.

‘Diospa munasqan yachaqkunam ichaqa yachayniyoq kasqankuta qawachinku ruwasqankuwan.’ (Mateo 11:19)

ALLINPI TUKUSQANMI QAWACHIN ALLIN KASQANTA

África law Ghana sutiyoq nacionpim, Wilsonpa huk tiempolla llamkapakusqan tukunanña karqa. Llamkasqan tukunan punchawpim, patronninpa carronta mayllachkaspan qollqeta tarirurqa carron ukupi. Llamkasqanta qawaqñataqmi nirqa chay qollqeta apakunanpaq, payqa manam suwakuyta munarqachu chaymi qollqeta patronninman qopurqa, Wilsonqa Jehova Diospa testigonmi karqa. Mana llamkayniyoq kananmantaqa tukuy tiempo llamkananpaqmi chaskisqa karqa, chaymantañataq hina chay llamkasqallanpi aswan allin llamkaytapas chaskirqa.

Francia nacionpim, Geraldineta llamkayninmanta patronan qarqorurqa Jehova Diospa testigonkuna mana gustasqanrayku. Ichaqa patronanpa mamanmi nirqa qarqosqanqa mana allin kasqanta. Nirqataqmi: “Llamkapusuqniki llamkayninwan cumpliq hinaspa confianza kananpaqqa Jehova Diospa testigonmi kanan. Paymanta aswan allintaqa manam tarinkichu”, nispa. Chaymi Geraldinepa patronanqa Testigokunapa imayna kasqankuta astawan yachaspan kaqmanta contratarqa.

Sudáfrica lawpipas, wawankunata sapallan uywaq Sarah sutiyoqmi qollqemanta sasachakurqa, congregacionninpi kaqkunam mikunankupaq hinaspa pasajenkupaq yanaparqaku paytawan wawankunatapas. Tiempopa pasasqanman hinam, wawankunaqa nirqaku: “Ñoqaykupaqqa achka tayta-mamaykum kan congregacionpiqa”, nispa.

Kaynakuna pasasqanmanta willanapaqqa achkallañam, kaymi yuyarichiwanchik Proverbios 1:33 nisqanpi Jehova Diospa kayna prometesqanta: ‘Aswan segurom kawsakunqa pipas uyariwaqniyqa’, nispa. ¡Chaynapunimá kay nisqanqa!