Jesusqa Diospa wasinpim riqsisqa sacerdotekunatawan autoridadkunata upallarachirqa ima derechowan imatapas ruwasqanmanta tapuptinku. Chaymantam iskay churikunamanta rikchanachirqa imayna kasqankuta qawachinanpaq.

Nirqam: ‘Huk runapam karqa iskay churinkuna. Huknintam nirqa: “Churilláy, rispaykiyá uvas chakranchikpi llamkaramuy”, nispa. Churinñataqmi nirqa: “Manam riymanchu”, nispa. Ichaqa mana kasukusqanmanta pesakuspanmi rirqa. Huknin churintapas hina chaynallata niptinmi “risaqmi taytáy” nichkaspan mana rirqachu. Hinaptinqa, ¿mayqinnintaq taytanpa munasqanta ruwarqa?’, nispa (Mateo 21:28-31). Taytanpa munasqantaqa ruwarqa punta kaq churim.

Hinaspam Jesusqa chiqniqninkunata nirqa: ‘Chiqaptapunim nikichik: Impuesto mañaqkunawan chuchumikakunaraqmi Diospa munaychakuyninmanqa ñawpaqnikichikta richkanku’, nispa. Autoridadkunapaq qullqi mañaypi llamkaqkunawan chuchumikakunaqa manam qallariyninpiqa Diostaqa yupaychaqkuchu, ichaqa punta kaq churi hinam wanakuspanku yupaychayta qallaykurqaku. Religionkunapi punta apaqkunañataqmi huknin churi hina kaspa niqku Dios yupaychasqankuta, ichaqa yanqallam rimaqku. Chaymi Jesus nirqa: ‘Bautizaq Juanqa hamurqa allin ñanta riqsichisunaykichikpaqmi, ichaqa manam creerqankichikchu. Impuesto mañaqkunawan chuchumikakunam ichaqa creerqaku, kaykunata qawachkaspaykichikpas manam wanakurqankichikchu creenaykichikpaq’, nispa (Mateo 21:31, 32).

Religionkunapi punta apaqkunaqa manam Dios yupaychay tukuqllachu karqaku, aswanqa llumpay mana allin runakunam. Chayta qawachinanpaqmi Jesusqa huk rikchanachiywanraq nirqa: ‘Huk runam uvasta plantaruspan chakranta cercorurqa, uvaspa rurunta sarunapaq uchkutapas tuqururqam, ruwarqataqmi cuidanapaq altosniyuq chukllatapas. Hinaspam chakrapi llamkaqkunaman arriendakuruspan huk law nacionman ripukurqa. Uvas pallay tiempo chayaramuptinñataqmi huknin serviqninta llamkaqkunaman kacharqa uvaspa rurunmanta tupaqninta mañamunanpaq. Paykunam ichaqa maqaparuspanku mana imayuqta kutirichirqaku. Patronñataqmi huknin serviqnintaña kacharqa, paytapas umanta pakiruspankum pinqayta ruwarurqaku. Chaymi huktaña kacharqa hinaptinmi wañurachirqaku. Chaymantapas achkataraq hukkunatapas kachaptinmi wakinta maqaparuspa wakintañataq wañurachirqaku’, nispa (Marcos 12:1-5).

¿Musyakurqakuchu ima niy munasqanta? Paykunaqa ichapas yuyarirqaku Isaiaswan Diospa willachisqanta. Nirqam: ‘Tukuy atiyniyuq Jehova Diospa kuyayllapaq uvas huertanqa Israel runakunawan Juda nacionpi yachaqkunam. Payqa kasukunankutam munarqa, aswanqa wañuchinakuyllatam tarirun’, nispa (Isaias 5:7). Yaqa chaynam Jesuspa willakusqanpas karqa. Uvas chakrayuq runaqa Jehova Dioswanmi tuparqa, uvas chakrañataqmi Israel runakunawan, paykunaqa Diospa kamachikuyninkunawanmi cercosqa hina karqaku. Paykunamanmi Diosqa willakuqninkunata kacharqa allin kaqta ruwanankupaq.

Chaywanpas chakrapi llamkaqkunaqa patronpa serviqninkunatam wañurachirqaku. Jesusqa nirqataqmi: ‘Patronpaqa karqataqmi kuyasqan sapallan churinpas, chaymi qipallataña kachaspan nirqa: “Churiytaqa respetanqakuch”, nispa. Chakrapi llamkaqkunam ichaqa ninakurqaku: “Paymi herencia chaskiqqa. Haku wañuchimusun herencianqa ñuqanchikpaqña kananpaq”’, nispa. Hinaspam churintapas wañurachirqaku (Marcos 12:6-8).

 Chaymantam Jesusqa nirqa: ‘¿Imatataq uvas chakrayuqqa ruwanqa?’, nispa (Marcos 12:9). Religionkunapi punta apaqkunañataqmi nirqaku: “Mana allin kasqankuraykum paykunataqa wañurachinqa hinaspam huk llamkaqkunamanña uvas chakranta arriendakunqa, paykunaqa tiempollanpim rurunta qunqaku”, nispa (Mateo 21:41).

Chaynatam mana musyakuspa kikillanku chayna kanankuta nikuchkarqaku, paykunaqa Jehova Diospa ‘uvas chakranpi’ ‘llamkaqkuna’ hinam karqaku. Paykunaqa allin kaqtam ruwananku karqa, hinaspapas Diospa churin Jesustam chaskinanku karqa. Chaymantam Jesusqa religionkunapi punta apaqkunata qawarispan nirqa: “¿Manachum haykapipas leerqankichik kayna qillqasqata: ‘Pirqaqkunapa wischupakusqanku rumiqa wasi pirqapa esquinanpi hapiq rumiñam rikurirun. Chay rumiqa Jehova Diosmantam hamurqa hinaspapas admirakuypaqmi’, niqta?”, nispa (Marcos 12:10, 11). Hinaspam nirqaraq: “Chaymi nikichik: Diospa munaychakuyninqa qamkunamanta qichusqa kaspanmi ruruq nacionmanña qusqa kanqa”, nispa (Mateo 21:43).

Escribakunawan riqsisqa sacerdotekunaqa musyarurqakum Jesusqa “paykunamanta chay rikchanachiywan rimasqanta” (Lucas 20:19). Chaymi ‘herencia chaskiq’ Jesustaqa aswanraq wañurachiyta munarqaku. Ichaqa runakunatam manchakurqaku Diosmanta willakuqpaq hapisqankurayku, chaymi manaraq wañuchirqakuchu.