36 YACHACHIKUY
Amayá suwakuqqa nitaq llullakuqqa kasunchu
Lliwmi munanchik runamasinchik mana suwakuq nitaq llullakuq kanankuta, chayna kananchiktam Jehova Diospas munan. Kaypim yachasun honrado kayqa allinninchikpaq kasqanmanta.
1. ¿Imanasqataq mana suwakunanchikchu nitaq llullakunanchikchu?
Jehova Diosta kuyasqanchikrayku hinaspa kasukusqanchikraykum mana suwakunanchikchu nitaq llullakunanchikchu. Jehova Diosqa yachanmi imapas piensasqanchikta utaq pakallapi imapas ruwasqanchikta (Hebreos 4:13). Jehova Diosqa imapipas allin kaqta ruwaptinchikqa kusikunmi. Bibliapim nin: “Mana allin ruwaq runataqa Jehova Diosqa chiqninmi. Allin ruwaq runatam ichaqa kuyan”, nispa (Proverbios 3:32).
2. ¿Pikunawanmi hinaspa maykunapim honrado kananchik?
Jehova Diosta serviqkunaqa manam llullakunanchikchu (Zacarias 8:16, 17). Chaymi imam kaqta rimanchik casado vidapipas, wawa-churinchikkunawanpas, llamkaqmasinchikkunawanpas, iñiqmasinchikkunawanpas hinaspa autoridadkunawanpas. Manataqmi suwakunanchikchu nitaq runamasinchiktaqa engañananchikchu (leey Proverbios 24:28 hinaspa Efesios 4:28). Wasinchikmanta hinaspa chakranchikkunamanta impuestotapas pagananchikmi (Romanos 13:5-7). Chaynaqa, Jehova Diosta serviqkunaqa tukuy imapim confianapaq runa kananchik (Hebreos 13:18).
3. ¿Imanasqataq allinninchikpaq honrado kayqa?
Mana suwakuq, mana llullakuq kaptinchikqa runakunam kuyawasunchik, iñiqmasinchikkunapas ñuqanchikmantaqa manam iskayrayanqakuchu. Sunqunchikpipas hawkam tarikusunchik. Chaymantapas ‘salvaqninchik Diospa yachachikuynintam sumaqyachisun’. Chayraykum runamasinchikkunapas Diosninchikmanta yachayta munanqaku (Tito 2:10).
ASTAWAN YACHAYKUSUN
Kaypim yachasun confianapaq runa kaptinchikqa Jehova Dios kuyawasqanchikmanta. Yachasuntaqmi imata ruwaspapas utaq maypi tarikuspapas honrado kanamanta.
4. Jehova Diosqa kusikunmi honrado kaptinchik
Leeychik Salmos 44:21 hinaspa Malaquias 3:16, hinaspa qatiqninmanta rimariychik:
-
¿Imatapas pakachwanchu Jehova Diosmanta? ¿Imanasqataq chaynata ninki?
-
Sasachakuypi tarikunanchik kaptinpas imam kaqta rimaptinchikqa, ¿imaynataq Jehova Diosninchik tarikunqa?
Huk taytaqa anchatam kusikun churin imam kaqta willakuptinqa. Chaynataqmi Jehova Diospas kusikun mana llullakuq kaptinchikqa.
5. Tukuy imapiyá honrado kasun
Diosmanta mana yachaq runakunam ninku wakinpiqa llullakuy allin kasqanta, ichaqa manam chaynachu. Imam kaqta rimaymi allinninchikpaqqa. VIDEOTA qawaykuychik.
Leeychik Tito 2:10 hinaspa rimariychik: ¿Imaynataq honrado kawaq...
-
... aylluykiwan?
-
... llamkaynikipi, estudiasqaykipi?
-
... maypiña kaspaykipas utaq imataña ruwaspaykipas?
6. Honrado kayqa allinninchikpaqmi
Imam kaqta willakusqanchikwan sasachakuypi kananchik kaptinpas allinninchikpaqmi kanqa. Leeychik Salmos 34:12-16 hinaspa qatiqninmanta rimariychik:
-
¿Imaynataq tarikusun tukuy imapi honrado kaspaqa?
-
Casado vidapi warmi-qari imam kaqta willanakuspaqa kusisqam kawsakusun.
-
Mana llullakuptinchikqa llamkapakusqanchikpipas confianzapaqmi hapiwasun.
-
Mana llullakuptinchikqa autoridadkunapas respetawasunmi.
WAKIN RUNAKUNAM NINKU: “Llullakuyqa manam imananchu”, nispanku.
-
¿Munanchu Jehova Diosqa llullakunanchikta? ¿Imanasqa chaynata ninki?
YUYARIYKUSUN
Jehova Diosqa munanmi serviqninkuna mana suwakuq hinaspa mana llullakuq kananchikta.
¿Ima niwaqtaq?
-
¿Pikunawanmi hinaspa maykunapim honrado kananchik?
-
¿Imatapas pakachwanchu Jehova Diosmanta?
-
¿Imakunaraykutaq honrado kanayki?
ASTAWAN YACHANAYKIPAQ
¿Imaynatam tayta-mamakuna yachachinmanku churi-wawankuta mana llullakuq kanankupaq? Chaypaq videota qawaykuy.
Prometekusqanchikman hina ruwaptinchikqa Jehova Diosqa kusikunqam. Chaypaq videota qawaykuy.
Prometekusqanchikta cumpliptinchikqa Jehova Diosqa bendeciwasunmi (9:09)
¿Imanasqataq chakranchikmantawan wasinchikmantaqa impuestota pagananchik? Chaymanta kaypi yachaykuy.
“Impuestotaqa ¿paganachu icha manachu?” (Willakuq, septiembre 2011)
¿Imataq yanaparqa suwakuq, llullakuq, engañakuq runata manaña chayna kananpaq? Paymanta kaypi leeykuy.
“Jehova Diosqa llakipayakuqmi hinaspa pampachakuykuqmi” (Willakuq, 15 mayo 2015)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
