6 KAQ YACHACHIKUY
¿Kanmanchu ima suyakuypas wañusqakunapaq?
1. ¿Ima suyakuytaq kanman wañusqakunapaq?
Jesucristo Allpa pachapiraq kachkaptinmi amigon Lazaro wañukurqa. Lazaroqa Jerusalenpa hichpan Betania llaqtapim yacharqa otaq tiyarqa. Chay llaqtaman Jesus chayaruptinqa Lazaroqa tawa punchawñam wañusqa karqa. Jesusqa Martawan Mariantinmi panteonman rirqaku hinaptinmi runakuna chaylla huñunakaramurqaku. ¿Imaynaraq Martawan Mariaqa sientekurqaku turinkuta Jesus kawsarirachiptin? Leey Juan 11:21-24, 38-44.
Diosmanta allin noticiataqmi kawsarimuymanta willakuypas. Martaqa yacharqam Allpa pachapi kawsanankupaq wañusqakunata Jehová Dios kawsarichinanmanta. Leey Job 14:14, 15.
2. ¿Imaynataq wañusqakunaqa kachkanku?
Diosmi Adanta nirqa: “Allpallam kanki, allpallamantaqmi tikrakunki”, nispa. (GENESIS 3:19.)
Ñutu allpamanta rurasqam runakunaqa kanchik (Genesis 2:7; 3:19). Kawsaq runapiqa manam kanchu angelkuna hina espirituqa. Runaqa aychayoq tulluyoqmi kanchik, wañuspaqa manañam maypipas kawsanchikchu. Wañuruptinchikqa manañam ima piensayninchikpas kanchu. Chaymi wañusqakunaqa manaña sientenkuchu nitaq ñakarinkuchu. Lazaro kawsariramuspanqa manam huk vidapi kasqanmantaqa willakurqachu. Leey Salmo 146:4; Eclesiastes 9:5, 6, 10.
Hukkunam ninku, Diosqa wañusqakunata infiernopi ñakarichisqanmanta, ichaqa manam chayqa ciertochu. Yachamusqanchikman hinam wañusqakunaqa imamantapas manaña musyankuñachu. Chaymi infiernomanta yachachisqankuqa llulla, Jehová Diostam llullata hina qawachin; rawrachkaq ninapi pitapas ñakarichisqanmanta piensayllatapas payqa cheqninmi. Leey Jeremias 7:31.
Qaway “¿Imaynataq wañusqakunaqa kachkanku?” niq videota.
3. ¿Atichwanchu wañusqakunawan rimayta?
Wañusqakunaqa manañam rimaytapas nitaq uyariytapas atinkuchu (Salmo 115:17). Ichaqa mana allin angelkunam wañusqakunapas rimachkanman hina runakunawan rimanku (Judas 6). Chaymi Jehová Diosqa millakuypaq qawan wañusqakunawan rimay munaqtaqa. Leey Deuteronomio 18:10, 11.
4. ¿Pikunataq kawsarimunqaku?
Nanananaq runakunam kawsarimunqaku Allpa pachapi kawsanankupaq. Jehová Diosta mana reqsichkaspa mana allin ruraqkunapas kawsarimunqakum. Leey Salmo 37:29; Hechos 24:15.
Kawsarimuqkunaqa atinqakum Diosmanta yachayta hinaspam kasukusqankuwan Jesuspi iñisqankuta qawachinqaku (Apocalipsis 20:11-13). Chaynata ruraspankuqa wiñaypaqmi kawsanqaku sumaq Allpa pachapi. Leey Juan 5:28, 29.
5. ¿Imatam kawsarimuyqa Diosmanta yachachiwanchik?
Jehová Dios ancha kuyakuq chaynataq sumaq sonqo kasqantam. Ñoqanchikrayku Diospa Churin wañusqanwanmi ancha favorecesqa kanchik sumaq suyakuyniyoq kanapaq. Wañuqkuna kawsarimuptin, ¿piwantaq tupaykuyta munawaq? Leey Juan 3:16; Romanos 6:23.
