Satanas llullakusqanwanmi mana allin ruraqkunaqa qallarirqa. Payqa mana pantaq allin angelmi qallariypiqa karqa, ichaqa manam ‘cheqappichu’ takyarqa (Juan 8:​44). Dioslla yupaychana kaptinpas yupaychasqa kaytam munapayarqa. Llullakuywanmi Evata engañarurqa paytaña kasukunanpaq. Eva hinam Adanpas Diosta mana kasukurqachu. Chaywanmi ñakariywan wañuypas qallarirqa. Leey Genesis 3:​1-6, 19.

Evata engañarusqanwanmi Satanasqa Llapallan Kamachiq Jehová Diospa contranpi mana kasukuyta qallarichirqa. Yaqa lliw runakunapas kamachinanpaq derechonta mana reqsikuspankum Satanas Diabloman hukllawakurunku, chaymi Satanasqa ‘kay pachapi kamachiqninku’ rikurirun. Leey Juan 14:30; 1 Juan 5:​19.

Unanchasqankunaqa lliwmi allinpuni karqa. Runakunawan angelkunaqa Diospa kamachisqankunata kasukunankupaqmi unanchasqa karqaku (Deuteronomio 32:​4, 5). Diosmi unanchawarqanchik allintapas otaq mana allintapas tanteakuqta. Chayna kasqanchikmi yanapawanchik kuyasqanchikta qawachinapaq. Leey Santiago 1:​13-​15; 1 Juan 5:3.

Dios mana yanapaptinqa mayqen gobiernopas runamasin gobiernay mana atisqanta qawachinanpaqmi. Llapallan Kamachiq kasqanta mana reqsikuqkunaqa manam unaypaqchu kanqa. (Eclesiastes 7:​29; 8:9). Soqta waranqa wataña kamachisqankum chayna kasqanta  sutillata qawachin. Manam chinkachiyta atinkuchu ñakariykunata, mana allin ruraqkunata, guerrakunata nitaq onqoykunatapas. Leey Jeremias 10:23; Romanos 9:​17.

Diospa kamachisqanman hina kawsayqa allinninchikpaqmi (Isaias 48:​17, 18). Diosqa chayllam chinkachinqaña gobiernokunata. Allpa pachapiqa kawsanqaku paypa Gobiernonta reqsikuspa kasukuqkunallam (Isaias 11:9). Leey Daniel 2:​44.

Qaway “¿Imanasqam Diosqa ñakariykunata mana chinkachinchu?” niq videota.

Satanasmi nirqa, runakunaqa Diostam servin imatapas qoptillan nispa. Diospa pacienciakusqanqa favorecewanchikmi paypa kamachisqanman hina kawsasqanchikwan Diablo llulla kasqanta qawachinapaq chaynataq Diospa Gobiernon reqsikusqanchiktapas. Leey Job 1:​8-​12; Proverbios 27:11.

Diospa kamachisqan kayta munaspaqa Bibliapa yachachisqanman hinam yupaychananchik (Juan 4:23). Chaymantapas Satanas mana kasukusqanchiktam qawachisun Jesus hina politica nisqapi hinaspa guerrakunapi mana chaqrukuspaqa. Leey Juan 17:14.

Satanasqa tukuytam servichikun huchapakuypi otaq qanra vidapi runakuna kawsanankupaq. Chayna kawsaymanta karunchakuptinchikqa amistadninchikpas otaq familianchikpas asipayawachwanmi (1 Pedro 4:3, 4). Chayna kaptinqa, ¿Dios kuyaqkunatachu amistadninchikpaq akllasun? ¿Kasukusunchu yachaywan hinaspa kuyakuywan kamachiwasqanchikkunata? Chaynata ruraspaqa qawachisunmi Satanas llulla kasqanta, paymi nirqa sasachakuypi kaspaqa Diosta mana kasukusqanchikta. Leey 1 Corintios 6:​9, 10; 15:33.

Kuyawasqanchikraykum ñakariykunatawan mana allin ruraykunata Diosqa chinkachinqa. Chayna kananmanta mana iskayrayaqkunaqa wiñaypaqmi kay Allpa pachapi kawsanqaku. Leey Juan 3:​16.