Romanos 2:1-29
2 Chaynaqa, runamasiki hina mana allinkunata ruwachkaspaykiqa,+ ¿ima uyaykiwantaq runamasikimanta mana allinkunata rimawaq? Mayqannikichikña kaspapas mana allinkunata rimaspaykichikqa kikillaykichikmi huchayuq kasqaykichikta nikuchkankichik.+
2 Yachasqanchikpi hinapas Diosllam imatapas chiqap kaqman hinaqa allichan, chayraykum chayna mana allinkuna ruwaqkunataqa castiganqa.
3 Hinaptinqa, runamasiki hina mana allinkunata ruwachkaspa paykunamanta mana allinta rimaspaykiqa, ¿yaqachu Diospa piñakuyninmanta lluptiwaq?
4 Diosqa ancha kuyakuq kayninpim huchaykimanta wanakunaykipaq qamta yanapayta munasuchkanki,+ ¿icha chayta mana yachasqaykiraykuchu mana kaqpaqpas hapinki Diospa ancha kuyakuq kayninta,+ aguantawasqanchikta+ hinaspa pacienciakuyninta?+
5 Qamqa mana uyarikuq kaspayki hinaspa mana wanakuyta munaspaykim kikillayki Diosta piñachichkanki, Diosqa piñakuynintam qawachinqa runakunata juzgaspan, payqa juzganqa allin ruwayman hinam.+
6 Payqa sapakamamanmi imam ruwasqankuman hina kutichipunqa.+
7 Wiñay kawsaytam qunqa allin kaqkunata ruwaspa hinalla kallpanchakuqkunaman*.+ Chayta ruwaqkunaqa allin riqsisqa kayta hinaspa mana haykapipas ismuq kaytam maskachkanku.
8 Diospa piñakuynin hinaspa rabiakuyninmi ichaqa kanqa liryanakuqkunapaq hinaspa chiqap kaqta mana kasukuspa mana allin ruwaypi kaqkunapaq.+
9 Mana allin ruwaqkunaqa llumpaytam ñakarinqaku hinaspa llakikunqaku, chaykunaqa puntatam kanqa judiokunapaq hinaspa mana judio* kaqkunapaq.
10 Llapallan allin ruwaqkunam ichaqa hatunchasqa kanqaku, allin riqsisqa kanqaku hinaspa Dioswan hawka kawsakunqaku. Chaykunaqa puntatam kanqa judiokunapaq+ chaynataq mana judio kaqkunapaq.+
11 Diosqa manam pimanpas sayapakunchu.+
12 Diospa kamachikuyninta* mana yachachkaspa llapallan huchallikuqkunaqa kamachikuyninta mana riqsichkaspankutaqmi wañunqaku,+ Diospa kamachikuyninta yachachkaspanku llapallan huchallikuqkunam ichaqa kamachikuyman hina juzgasqa kanqaku.+
13 Diospaqqa manam kamachikuyninta uyariqkunachu allin ruwaq runaqa kanku, aswanqa kamachikuyninman hina kawsakuqkunam.+
14 Diospa kamachikuyninta mana yachaq nacionniyuq runakunapas kamachikuyninpa nisqantam ruwanku,+ paykunaqa Diospa kamachikuyninta mana riqsichkaspankupas qawachinkum sunqunkupi chay kamachikuy kasqanta.
15 Paykunaqa imapas ruwasqankuwanmi qawachinku Diospa kamachikuynin sunqunkupi qillqasqa hina kasqanta, concienciankum willan imapas allin utaq mana allin kasqanta, chaymi yachanku ima ruwasqankupipas huchayuq utaq mana huchayuq kasqankuta.
16 Chayqa kanqa runakunapa pakasqan kaqkunata Diospa juzgasqan punchawpim,+ Diosqa juzganqa Jesucristowanmi*, sumaq willakuymanta willakusqayman hinam chayqa kanqa.
17 Qanmi ninki judio+ kasqaykita, qanmi Diospa qusqan kamachikuypi hapipakunki hinaspa Diosmanta alabakunki.
18 Qamqa Diospa munaynintam yachanki Moisespa chaskisqan kamachikuyninmanta yachachisqa kasqaykirayku,+ hinaspam allin kaqkunatapas “allinmi” ninki,
19 chaymantapas qamqa ninkim ñawsakunapa pusaqnin kasqaykita, tutayaypi kaqkunapaq achkin kasqaykita,
20 mana yuyayniyuqkunapa chaynataq wawakunapa yachachiqnin kasqaykita. Moisespa chaskisqan kamachikuywanmi qamqa Diosmanta hinaspa chiqap kaqmanta wakillantapas yachanki...
21 Hukkunata yachachiq kachkaspaykiqa, ¿manachu kikiki yachachikunki?+ “Manam suwakunachu”+ nispa yachachichkaspaykiqa, ¿suwakunkichu?
22 “Manam hukwanqa pierdekunachu*”+ nispa nichkaspaykiqa, ¿hukwanchu pierdekunki? Taytacha-mamachakunata chiqnichkaspaykiqa, ¿iglesiakunatachu suwakunki?
23 Diospa qusqan kamachikuymanta alabakuq runa, ¿Moisespa chaskisqan kamachikuyta mana kasukuspachu Diosta pinqaypi churanki?
24 Qillqasqa kasqanman hinam “qampa mana allin ruwasqaykichikrayku nacionkunapi runakuna Diospa sutinta pinqayman churachkanku”.+
25 Diospa kamachikuy qusqanman hina kawsakuptillaykim qari kaynikipi señalasqa+ kasqaykiqa valen,+ chay kamachikuyta mana kasukuptikim ichaqa señalasqa kasqaykipas mana señalasqa hinaña rikurirun.
26 Chayrayku, ¿manachu mana señalasqa runa+ Moisespa chaskisqan kamachikuyman hina kawsakuptinqa mana señalasqa kayninpas señalasqa hinaña rikurirun?+
27 Qari kayninta mana señalachikuspa chay kamachikuyta kasukuq runam juzgasunki, qamqa chay kamachikuypa nisqankuna qillqasqa kapusuchkaptikipas hinaspa señalasqa kachkaspaykipas manam chay kamachikuytaqa kasukuchkankichu.
28 Chiqap judioqa manam “judiom kani” nispa rimaqllachu,+ señalasqa kaypas manam aychapi señalarachikuyllachu.+
29 Chiqap judio kayqa sunqumantam,+ señalasqa kaypas Diospa atiyninwan sunqupi señalasqa kaymi,+ manam Moisespa qillqasqan kamachikuyman hinachu.+ Chay runaqa manam runapa alabasqanchu, aswanqa Diospa alabasqanmi.+
Willakuykuna
^ Utaq: “Hinalla takyaqkunaman”.
^ Griego rimaypiqa nichkan: “Griego”, nispam. Paykunaqa huklaw nacionniyuq kaspapas griego rimayniyuqmi karqaku.
^ Utaq: “Leyta”.
^ Utaq: “Akllasqan runawanmi”.
^ Utaq: “Waqllikunachu”.
