1 Pedro 5:1-14
5 Kunanñataqmi qamkuna ukupi kaq punta apaqkunata* rimapayamuykichik. Ñuqapas iñiqkunapi punta apaqmasikichikmi kani, rikurqanitaqmi Cristopa ñakarisqankunatapas, chaymantapas llapallanchik hatunchasqa kaptinchikmi akllasqakunawan kuska hatunchasqa kasaq.+ Qamkunatam ruegakamuykichik*:
2 Makikichikpi churasqa Diospa ovejankunatayá allinta michiychik,+ qamkunaqa paykunata cuidanaykichikpaqmi kamachisqa kachkankichik, amayá hikutasqallachu michiychikqa, aswanqa Diospaq hinayá sumaqta michiychik.+ Amataqyá imatapas chaskiyta munaspallachu,+ aswanqa tukuy sunqumantayá.
3 Ovejakunataqa michiychik amayá munaychakuq hinachu,+ aswanqa paykunapa qatipakunanpaq hinayá kaychik, paykunaqa Diospa herencianmi.+
4 Michiqkunapa kamachiqnin+ rikuriramuptinmi hatunchasqa kanaykichikpaq sumaq hinaspa mana tukuq premiota* chaskinkichik.+
5 Chaynallataqyá qamkunapas musukuna, mayor qarikunata* tukuy imapi kasukuychik.+ Ichaqa ama hatuntukuspayá llapallaykichik kawsakuychik, Diosqa hatuntukuqkunapa contranpim kachkan, ichaqa ancha kuyakuynintam* qawachin mana hatuntukuqkunamanqa.+
6 Chaynaqa, ancha atiyniyuq Diospa makinpiyá* churakuychik, chaynapi tiempo chayaramuptin hatunchasunaykichikpaq,+
7 chaynallataqyá ima* llakikichiktapas Diospa makinpi saqiychik,+ payqariki qamkunamantam nanachikun.+
8 Allin yuyayniyuq hinaspa qawan-qawanllayá kaychik,+ enemigoykichik diabloqa leon hinam muyuriqnikichikpi ñawrawyaspan purichkan pitapas mikurunanpaq.+
9 Paypa contranpiyá qaqa hina sayaychik+ Diospi ancha-anchata iñispa, yachasqaykichikpi hinapas enteron pachapi lliw iñiqmasikichikkunapas qamkuna hinam ñakarichkanku.+
10 Pisi tiempollapas ñakariruptikichikmi ancha kuyawaqninchik* Diosqa tukuy imapi aswan allin kanaykichikpaq yachachisunkichik, payqa wiña-wiñaypaq kanchariyninmanmi+ Cristowan huklla kasqaykichikrayku qayasurqankichik. Paymi yanapasunkichik qaqa hina sayaq kanaykichikpaq,+ kallpayuq+ hinaspa allin takyaq kanaykichikpaq.
11 Diosqa wiña-wiñaypaq atiyniyuqmi. Chaynayá kachun*.
12 Silvanowanmi*+ iskay-kimsa palabrakunata qillqamuchkaykichik, payqa Diosman sunqu iñiqmasinchikmi, qillqamuchkaykichikqa kallpanchanaypaqmi hinaspa Diospa ancha kuyawasqanchik* chiqap kasqanmanta tukuy sunquywan willanaypaqmi. Qamkunaqa Diospa ancha kuyasusqaykichikpiyá allinta takyaychik.
13 Babilonia lawpi qamkuna hina akllasqa warmi iñiqmasinchikmi* saludamusunkichik, churiy hina Marcospas+ saludamusunkichikmi.
14 Llapallaykichikyá kuyakuywan muchaykanakuspa rimaykanakuychik.
Llapallaykichikyá hawkalla kawsakuychik, qamkunaqa Cristowanmi huklla kachkankichik.
Willakuykuna
^ Utaq: “Kallpanchamuykichik”.
^ Utaq: “Ancianokunata”. Qaway kay palabrapa ima ninan kasqanta.
^ Utaq: “Coronata”.
^ Utaq: “Punta apaqkunata”.
^ Kaypiqa rimachkan mana kuyana kachkaspa kuyasqa kaymantam.
^ Griego rimaypiqa nichkan: “Diospa atiyniyuq makinpiyá”, nispam.
^ Utaq: “Llapa”.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Amen”.
^ Silvanotaqa Silas nispapas riqsiqkum.
^ Kaypiqa rimachkan mana kuyana kachkaspa kuyasqa kaymantam.
^ Chay warmiqa tupanmanchusmi Babiloniapi iñiqkunawan.
