Jehova Diosqa churin Jesustam kay allpa pachaman kachamurqa huchamantawan wañuymanta librawananchikpaq. Chaymi bibliapi nin ‘Cristopa yawarninwan’ librasqa kasqanchikta (Efesios 1:7; 1 Pedro 1:18, 19). Jesuspas nirqam ‘vidanta quspan achka runakunata librananpaq’ kay pachaman hamusqanmanta (Mateo 20:28).

¿Imanasqataq librasqa kananchik karqa?

 Adantaqa mana huchayuqtam Diosqa unancharqa. Payqa Diosta kasukuspanqa wiñaypaqmi kawsakunman karqa, ichaqa mana kasukusqanraykum wañuqña rikurirurqa (Genesis 3:17-19). Chaymi Adanpa miraynin kasqanchikrayku llapanchik huchayuq kanchik (Romanos 5:12). Bibliapipas ninmi Adan huchaman rantikuruwasqanchikta utaq vendewasqanchikta (Romanos 7:14). Chaymi mana pipas huchamantaqa librakuyta atinchikchu (Salmos 49:7, 8).

 Jehova Diosqa ancha-anchatam runakunataqa kuyawanchik (Juan 3:16). Ichaqa manam chayraykullachu huchamantaqa librawachwan karqa (Salmos 89:14; Romanos 3:23-26). Adan huchaman rantikuruwasqanchikraykum utaq vendewasqanchikraykum Jehova Diosqa churinpa wañukusqanwan rantiwachkanchikmanpas hina huchamantawan wañuymanta librawarqanchik (Romanos 5:6-8).

¿Imaynatataq Jesuspa wañukusqanqa librawanchik?

 Chaymanta yachananpaq kaypi yuyaymanasun:

1.   Imatapas rantiyta munaspaqa paganam (Numeros 3:46, 47).

2.   Pagaykuptinchikñam rantisqanchikta quwanchik (Exodo 21:30).

3.   Pagapunanchikpas haykam mañawasqanchiktam.

 Jesuspas ñuqanchikta rantiwananchikpaqmi:

1.   Pagarqa. Bibliapim nin ‘preciowan rantisqa kasqanchikta’ (1 Corintios 6:20; 7:23). Jesusqa yawarninwanmi runakunata Diospaq rantiwarqanchik (Apocalipsis 5:8, 9).

2.   Chaymi librasqa karqanchik. Arí, Jesuspa wañukusqanwanmi huchamanta librasqa kanchik (1 Corintios 1:30; Colosenses 1:14; Hebreos 9:15).

3.   Jesusqa vidantam ñuqanchikpa rantinchikpi qurqa. Adanqa qallariypiqa mana huchayuqmi karqa chaymi huchamanta librawananchikpaqqa mana huchayuq runa ñuqanchikrayku wañunan karqa (1 Corintios 15:21, 22, 45, 46). Chaymi bibliapi nin: ‘Chullalla runapa [Adanpa] mana kasukusqanwanmi achkallaña runakuna huchayuq rikurirurqaku, chaynallataqmi chulla runallapa [Jesuspa] kasukusqanwan achkallaña runakuna mana huchayuqña rikurinku’, nispa (Romanos 5:19). Arí, Jesuspa wañukusqanwanmi llapallanchik huchamanta librasqa kanchik. “Paymi llapallanchikpa rantinchikpi kikinmanta entregakurqa librasqa kananchikpaq” (1 Timoteo 2:5, 6).