Kay allpa pachaqa manam chinkachisqachu nitaq kañasqachu kanqa manataqmi huk allpa pachatachu Diosqa unanchanqa. Bibliapiqa ninmi kay allpa pachaqa runakuna wiña-wiñaypaq yachanankupaq unanchasqa kasqanta.

•   “Allin ruwaq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku” (Salmos 37:29 a).

•   “Kay pachatam maypim tiyananpaq unancharqanki. Mana haykapipas suchurinanpaqmi chaynata takyachirqanki” (Salmos 104:5).

•   ‘Allpam ichaqa hina kanqa’ (Eclesiastes 1:4).

•   Kay pachata unanchaq takyachiqmi nin, runakuna chaypi yachananpaq unanchasqanta (Isaias 45:18).

 Diosqa manam saqinqachu kay allpa pachata runakuna qachachaspanku, guerrakunawan utaq imawanpas chinkachinankutaqa. Astawanmi bibliapiqa nin Diosninchik ‘kay pacha purmachiqkunata chinkachinanmanta’ (Apocalipsis 11:18). ¿Imaynatam chaytaqa ruwanqa?

 Diosmi kay allpa pacha purmachiq gobiernokunata chinkachinqa hinaptinmi kikinpa gobiernon kamachimunqa (Daniel 2:44; Mateo 6:9, 10). Diospa chay gobiernonpi kamachimuqqa churin Jesucristom (Isaias 9:6, 7). Jesusqa kay pachapi kachkaspanmi lamar quchata hinaspa sinchi wayra-paratapas hawkayachirqa (Marcos 4:35-41). Chaymi kamachimuptinqa manañam kanqachu llumpay wayra-parapas nitaq ima ñakarichiwaqninchikkunapas. Arí, kay pachanchiktam sumaqta allichanqa ñawpaq Eden huertapi hina imapas kananpaq (Mateo 19:28; Lucas 23:43).

 Manam. Runakunaqa chaynataqa ninku 2 Pedro 3:7 nisqanta mana sumaqta entiendesqankuraykum, chaypim nin: ‘Cielokunawan kay pachapas ninapaq sapaqchasqam kachkan’, nispa. Kayna nisqanmanta allinta entiendenapaq qatiqninpi yachaykusun.

1.   Bibliapiqa hanaq pachamanta, kay pachamanta hinaspa ninamanta rimaspaqa wakinpim tupanachiylla-tupanachin. Wakinpim allpa pachamanta rimaspanqa runakunamantam rimachkan. Sagrada Biblia Quechua-Castellanom Salmos 33:8 nisqanpi nin: ‘Tukuy hinastinpi allpa-pacha Diosta manchakuchun’, nispa (escritura actualizada). Chaypiqa rimachkan llapallan runakuna Diosta yupaychananchikmantam.

2.   2 Pedro 3:5, 6 versiculopim ‘cielokuna’, ‘kay pacha’, ‘nina’ imawan tupasqanmanta yachachiwanchik. 5, 6 versiculokunapim willawanchik Noeypa tiemponpi sinchi para karusqanmanta. Chaypiqa kay pachapi tukuy ima hinaspa mana allin ruwaq runakunam chinkarurqakuqa manam kay allpa pachachu. Wakinpiqa ‘allpa-pachamanta’ bibliapi rimaspanqa rimachkan runakunamantam (Genesis 6:11, Sagrada Biblia Quechua-Castellano). Cielokunamanta bibliapi rimaspanpas wakinpiqa kamachiqkunamantam rimachkan. Chaymi cielokunam chinkanqa nispanqa kamachiqkuna chinkachisqa kananmanta rimachkan. Arí, manam kay allpa pachachu chinkanqaqa aswanqa mana allin ruwaqkunam. Ñawpaqtapas Noeyllam ayllunpiwan sinchi paramanta salvakurqaku hinaspam kaqmanta miraspanku kay pachaman huntarqaku (Genesis 8:15-18).

 2 Pedro 3:7 ninawan kay pacha chinkachisqa kananmanta rimaspanpas rimachkan mana allin runakuna chinkachisqa kanankumantam, manam allpa pachanchik chinkachisqa kananmantachu. Diosmi prometewanchik “musuq cielokunatawan musuq allpata” chaypiqa ‘imapas suma-sumaqmi kanqa’ (2 Pedro 3:13). Arí, “musuq allpam” kanqa. Huk rimaypiqa Diosta kasukuq runakunallañam kay pachapi kanqaku. Kanqatami ‘musuq cielokunapas’. Huk rimaypiqa kanqam musuq gobierno, Diospa gobiernollanñam lliwta kamachimunqa hinaptinmi runakunaqa kusisqaña kawsakusunchik (Apocalipsis 21:1-4).