1. ¿Ima cuintashcara Corinto huauqui paniunamanda apóstol Pablora cushiyachica?

 HUATA 55pi apóstol Pablo Troas llacta pungüi tian shinajpi Corinto huauquiunai iyarisha catiun. Huauquiunapura problemagunara charishcamanda apóstol Pablo ansa turbarica. Imasna shu yaya paihua churiunamanda turbarishca shina, apóstol Pablo paigunara shu cartara quillcaca camachingaj (1 Cor. 1:11; 4:15). Astaumbas paigunara pasiachu Titora cachaca, huasha paihua Troas pungüi tuparingaj. Shinallara Tito cuintachu imasna Corinto llactai pasaushcara, cuna apóstol Pablo Titora chapasha tiaun, Corinto llactai pasaushca cuintashcaunara uyangaj munan. Shinajpis Tito mana pactashcamanda apóstol Pablo yapa llaquirin. Cuna ¿imara ruranga? Macedonia llactama barcura apin. Chibi Titohua tuparisha ali gustu cuintashcaunara uyan, Corinto huauqui paniuna Pablo camachishcara cushihua chasquinuca, paiguna cuti Pablora ricungaj munanun. Cai cuintashcaunara uyasha Pablo yapa cushiyan (2 Cor. 2:12, 13; 7:5-9).

2. a) ¿Imara apóstol Pablo corintiogunara quillcaca quirinamanda, cushiyanamandas? b) Cai temai ¿ima tapuigunara cutipangaraunchi?

² Ansa timpu huasha, Pablo cutillara corintiogunara quillcasha, casnami nica: “Ñucanchi canguna quirinara mana mandaunchichu, astaun yanapaunchimi canguna cushi yaparingaj. Canguna quirinai ali shayaringuichi” (2 Cor. 1:24). ¿Imara rimana munaca cai shimiunahua? Cuna punzhaunai ancianoguna ¿imara yachana ushanun cai shimiunamanda?

3. a) Apóstol Pablo “canguna quirinai ali shayaringuichi” quillcachishcai ¿imara rimana munaca? b) ¿Imasnara cuna punzhaunai ancianoguna apóstol Pablo ejemplora catinun?

³ Apóstol Pablo quirinamanda cushiyanamandas rimaca, pai nica caita charina ashca valij an ñucanchi Diosta aduranai. Quirinamanda quillcaca: “Ñucanchi canguna quirinara mana mandaunchichu [...] Canguna quirinai ali shayaringuichi”. Apóstol Pablo ricuchica Corinto huauqui paniuna Diosta sirvisha catinuca paiguna Diospi quirinamanda, mana apóstol Pablomanda o shuj runaunamandas. Apóstol Pablo quirica paihua huauqui paniuna quirinara mana mandana ashcara, chita rurangaj mana munaca, pai yachacami huauqui paniuna ali ruranara munashcara (2 Cor. 2:3). Cuna timpui ancianoguna apóstol Pablo cuinta, paiguna huauqui paniuna quirishcai quirinun shinallara imaraigumanda paiguna Diosta sirvishcara (2 Tes. 3:4). Paiguna congregaciombi shinzhi mandashcaunara churana randi Bibliamanda iyaigunara Jehovahua organización mandashcaras catinun. Shujcuna quirinamanda duiñuuna mana anunzhu (1 Ped. 5:2, 3).

4. a) Apóstol Pablo “yanapaunchimi canguna cushi yaparingaj” quillcachishcai ¿imara rimana munaca? b) Apóstol Pablo cuinta ancianoguna cuna ¿imara rurana munanun?

⁴ Pablo shinallara nica: “Yanapaunchimi canguna cushi yaparingaj”. Cai shimiunahua paimanda paihua amigogunamandas rimaca. ¿Imasnara caita yachanchi? Chi cartai ishqui amigogunamanda rimaca. Pai nica: “Ñucanchi cangunama rimashca camachiushca Diospa Churi Jesucristo—ñucas, Silvanos, Timoteos rimaushca” (2 Cor. 1:19). Astaumbas apóstol Pablo cai shimi yanapajcuna nisha, pai ricsishcaunamanda rimaj aca, imasna Apolos, Áquila, Prisca, Timoteo Titoras (Rom. 16:3, 21; 1 Cor. 3:6-9; 2 Cor. 8:23). “Yanapaunchimi canguna cushi yanaparingaj” Pablo quillcachishcai corintiogunara ricuchica pai, paihua cumpañajcuna tucui ushashca tupu rurana munashcara congregación ucui ajcuna cushiyanara mas yaparichu. Cuna ancianoguna shinallara rurana munanun, tucui ushashca tupu ruranun paiguna huauqui paniuna Jehovara “cushihua” sirvinuchu (Sal. 100:2; Filip. 1:25).

5. Cai temai ¿imara ricungaraunchi, imai iyarina anchi?

⁵ Cunalla intiru mundui shu muntun huauqui paniunara shu tapuira rurashcanchi. Paigunara tapucanchi: “¿Imara nica shu anciano canguna cushi angaj yaparichu?”. Cai huauquiuna cutipashcara ricusha, iyarishun imasna ñucanchi cutipana ushacanchi shinallara imasnara tucuiguna yanapana ushanchi congregación ucui cushi angaj yaparichu. a

6, 7. a) ¿Imasnara ancianoguna Jesús, Pablo, shuj Diosta sirvijcuna ejemplora catina ushanun? b) ¿Imarasha ñucanchi huauqui paniuna shutiunara iyarisha mas cushiyachinchi?

⁶ Ashca Diosta sirvijcuna ninuca mas cushi sintirinun ancianoguna paigunara llaquishcara ricuchishcamanda. Ancianoguna llaquishcara ricuchingaj David, Elihú, Jesús ejemploras catina ushanun ( leai 2 Samuel 9:6; Job 33:1; Lucas 19:5). Cai quinsa runauna shujcunara shutii cayanuca. Apóstol Pablo yachacami ministirishca ashcara huauqui paniuna shutii iyarisha cayangaj. Romanogunara quillcashca cartai veinticinco yali huauqui paniuna shutii rimasha saluran. Pai quillcaca: “Saluraichi llaquishca Pérsidara” (Rom. 16:3-15).

⁷ Huaquimbi ancianogunaj congregaciombi tiaj huauqui paniuna shutiunara iyaringaj shinzhi an. Shinajpi paiguna shutiunara iyaringaj ursarisha, paigunara llaquishcara ricuchinun (Éx. 33:17). La Atalaya estudianai tandarinai maquira aisasha rimajcunara shutii cayasha ancianoguna yanapanun huauqui paniuna cushiyanuchu (Juan 10:3hua ricui).

8. ¿Imasnara apóstol Pablo Jehová, Jesús ejemplora catica?

⁸ Ñucanchi huauqui paniuna cushiyangaj yanapana ushanchi alimi rurashcangui nisha apóstol Pablo rurashca cuinta. Apóstol Pablo cutillara corintiogunara quillcashcai casnami nica: “Ashcara ahuayauni cangunamanda” (2 Cor. 7:4). Cai shimiuna corintiogunara animachishcanga. Pablo chi tunu shimiunallahuara shuj congregaciongunara animachica (Rom. 1:8; Filip. 1:3-5; 1 Tes. 1:8). Shinallara Roma llactai congregacionda quillcashca cartai Pérsida panimanda rimasha, pai nica: ‘Señorbi ashcara tarbaj huarmimi’ (Rom. 16:12). ¡Ñucanchi pani sirtu cushiyashcanga! Alimi rurashcangui nisha rimangaj apóstol Pablo Jehová, Jesús ejemplora catica (leai ­Marcos 1:9-11; Juan 1:47; Apoc. 2:2, 13, 19).

9. ¿Imarasha congregación ashca cushi sintirin ñucanchi cushiyachij shimiunahua rimajpi shinallara ñucanchira cushiyachij shimiunahua rimanujpi?

⁹ Shinallara cuna punzhaunai tiaj ancianoguna, huauqui paniunara shimiunahua valichisha rimanun (Prov. 3:27; 15:23). Casna rurasha, “canda valichishcamanda ima rurashcara ricucani” nishca cuintami an. Shinami an, ñucanchi huauqui paniuna valichij shimiunara rimanuchu ministinun. 55 huataunara charij pani rimashca shimiuna ashcauna iyashca cuintami riman: “Tarbanai mana pis canda valichinujpi, tucuiguna canda mandana munanun, chibi mana pis llaquinunun. Chiraigumanda ashca cushimi sintirini congregacionmanda shu anciano turi ñuca tarbanara valichishcara nijpi. ¡Ñucara shinzhiyachin! Jehová ñucara llaquishcara ricuni”. Cunalla shu anciano huauquiga, huarmira mana charisha ishqui churiunara iñachiuj yayara cai cushiyachij shimiunara rimaca. Ima pasashcara cai yaya cuintan: “Pai rimashca shimiuna ñucara yapajta cushiyachihuaca”. Shinami an, anciano huauquiuna cushiyachij shimiunahua huauqui paniunara rimajpi paigunara yapajta cushiyachinmi. Astaumbas cai huauquiuna causaimanda ñambii mana sambayasha purisha catingahua ursara charinun (Is. 40:31).

10, 11. a) ¿Imasnara anciano huauquiuna Nehemías ejemplora catina ushanun? b) ¿Imara yanapanga anciano huauquiunara cushiyachingaj pasianaunai Jehovamanda cuyashcaunara huauqui paniunama cungaj?

¹⁰ ¿Ima mas rurana ushanun anciano huauquiuna congregacionmanda huauqui paniuna mas cushi anuchu? Quiquinllara ursarinun yanapaira ministijtas yanapangaj (leai Hechos 20:28). Casna rurasha, ñaupa punzhaunai tiaj congregacionda cuirajcuna ejemplora catinun. Judío huauquiuna paihua quirina irquiyaushcai congregacionda cuiraj Nehemías ima rurashcara ricungui. Bibliaga pai shayarisha huauqui paniunara animashcara riman (Neh. 4:14). Cuna punzhaunai tiaj ancianoguna shinallara ruranun, ñaupa punda shayarinun huauqui paniuna quirinara shinzhiyachingahua. Chiraigumanda usharijpi anciano huauquiuna paigunara paiguna quiquin huasiunai pasianun paigunama Jehovamanda cuyashcaunara huauqui paniunama cungaj (Rom. 1:11). Cushiyachingaj pasianaunai ¿imara yanapanga anciano huauquiunara?

¹¹ Manara pasiaushcallaira anciano huauquiuna pihua rimangaraushcara purunturinami anun. Tapurina ushanunga: “Cai huauqui ¿ima turmindusgunara chariun? Paita animangaj ¿imara rimana ushanchi? ¿Ima Bibliamanda textoguna paita yanapanga? ¿Bibliai pai pasashca cuinta shu runa tianzhu?”. Cai tunu tapuigunara rurasha pasiashca runaunara animachichu yanapanga . Chi pasianaunai ancianoguna huauqui paniuna tucui shunguhua rimangaj saquinun shinallara ali intindishcahua paigunara uyanun (Sant. 1:19). Shu pani casna nica: “¡Shu anciano huauqui shungumanda rimashcara ali uyajpi ashcara cushiyachin!” (Luc. 8:18).

12. Congregaciombi ¿pita animachichu ministin, imarasha?

¹² ¿Pigunara cushiyachij pasianaunara ministinun? Pablo anciano huauquiunara camachica: ‘Tucui quirijcunara cuiraichi’ nisha. Shinami an, congregacionmanda tucui huauqui paniuna animachichu ministinun, ashca huataunara Bibliamanda yachachiujcuna, precursorguna, shuj huauqui paniunas animachichu ministinun. ¿Imarasha cai ali shinzhi huauquiuna ancianoguna yanapanuchu ministinun? Paiguna sintina ushanun cai mundumanda llaquiunara ña mana ahuantashcara. Rey David causaibi ima pasashcara ricusha ñucanchira yachachin Diosta ali sirvijcunas huaquimbi shu cumpañaj yanapachu ministinushcara.

13. a) Isbí-benob shutiyuj ¿imai riparaca David runara llaquichingahua? b) ¿Imarasha Abisái shutiyuj ministishca ratui David runara yanapana ushaca?

¹³ Ansa timpu Israelmanda rey ajllashca huasha David, Goliat runahua macanuca, paiga refaím miraimanda atun runa aca. David mana manzhaj ashcara ricuchisha paita huanchica (1 Sam. 17:4, 48-51; 1 Crón. 20:5, 8). Huaquin huatauna huasha, filisteos runaunahua macanushcai, David refaím miraimanda runaunahua tuparica. Paihua shuti Isbí-benob aca (2 Sam. 21:16; nota). Shinajpis cai atun runa ñalla paita huanchica. ¿Imarasha? David mana manzharica maspas ursara ña mana charica. Biblia sambayashca ashcara nin astaun chita riparasha Isbí-benob paita huanchingaj munaca. Shinajpis atun runa paita huanchingaraushcai, Abisái Zeruyahua churi paita quishpichingahua shamuca filisteo runara urmachisha huanchica (2 Sam. 21:15-17). ¡Ñalla huañunamanda quishpirica! David, Abisái runahua ashca pagarachushca ashcanga paita ali cuiraushcamanda shinallara paihua causai turminduibi tiaushcai quishpichishcamandas. Cai cuintashcamanda ¿imara yachanchi?

14. a) ¿Imasnara atun llaquiunara shu Goliat cuinta vinsina ushanchi? b) ¿Imasnara ancianoguna yanapana ushanun cuti cushi, ursara charingaj? Shu ejemplo ricuchi.

¹⁴ Satanás paita catijcunandi ñucanchira arcaigunara churanujpis, ñucanchi intiru mundui Diospa Shimimanda yachachisha catinchi. Huaquimbi shinzhi llaquiunara shu Goliat cuinta charishcanchi, shinajpi intiru shunguhua Jehová Diospi quirisha caita vinsishcanchi. Cai mundumanda llaquinara ahuantashcamanda huaquimbi sambayashca sintirinchi. Casna llaqui sintirishcamanda cai llaquiuna ñucanchira vinsina ushanun. Chi timpui ancianoguna yanapaihua cutillara cushi, ursara charina ushanchi. Shu precursora pani 65 huatayuj nin: “Pasashca timpui manali sintiricani, Bibliamanda yachachinai sambayacani. Shu anciano ricuca ñuca sambayashca ashcara chiraigu tapuca imara tucungui nisha. Shu gustu cuintarina charicanchi shu texto Bibliamanda leaca. ¡Pai yanapashcamanda ashcara pagarachuni!”. Shu gustu bendicionmi an cai llaquij ancianoguna ñucanchira cuirashcamanda shinallara Abisái cuinta ñucanchira yanapangaj puruntushca anun.

15, 16. a) ¿Imarasha huauqui paniuna Pablora ashcara llaquinuca? b) ¿Imarasha ñucanchi llaquij ancianogunara llaquinchi?

¹⁵ Congregacionda cuirana ashca tarbana an. Huaquimbi ancianoguna mana puñuna ushanun, huauqui paniunamanda turbarisha Yaya Diosta mañashcamanda shinallara Diosta sirvinuchu paigunara yanapashcamanda (2 Cor. 11:27, 28). Shinajpis cai mingashca tarbanara ali cushihua ruranun. Shina Pablo cuinta ruranun, Pablo quirij corintiogunara casnami quillcaca: “Ali munaihua [...] ñucallara illajta gastasha canguna almara yanapangaj” (2 Cor. 12:15). Huauqui paniunara yapajta llaquishcamanda paigunara shinzhiyachingaj ursarica (leai 2 Corintios 2:4; Filip. 2:17; 1 Tes. 2:8). ¡Chiraigu Pablora paiguna ashcara llaquinuca! (Hech. 20:31-38).

¹⁶ Cuna punzhaunai Diosta sirvijcuna shinallara ñucanchi llaquij ancianogunara llaquinchi, shinallara ñucanchi oracionda ruranai, paigunara charishcamanda Diosta pagarachunchi. Ñucanchira cuirashcamanda mas cushi sintirinchi, paiguna ñucanchira pasiasha shinzhiyachishcamanda. Cai mundumanda llaquiunara vinsingaj ancianoguna purunturishca ashcamanda ashcara valichinchi. Sirtu pacha paiguna yanapanun ñucanchi cushi yaparingaj.