PUNTO 7
Diospa Reino ¿imara an?
1. Diospa Reino ¿imara an?
Jesusga ¿imarasha mas ali mandaj an? (MARCOS 1:40-42)
Diospa Reinoga ahua pachai tiaj gobiernomi an. Chi gobiernoga runauna gobiernogunara tucuchinga. Shinami ahua pachai, cai pachais Diospa munai pactaringa. Allpai ali causangahua chi Reinora ministinchi. Caiga ali gustu cuintashcaunami an. Leapai Daniel 2:44; Mateo 6:9, 10; 24:14.
Caran tunu gobiernoibi shu mandaj tian. Shinajpi, Diospa Reinoi ¿pita mandan? Diospa Churi Jesusmi mandan. Jehová Diosllara Jesusta ajllaca mandaj tucuchu. Leapai Ricuchina (Apocalipsis) 11:15.
Diospa Reino ¿imara an? nishca video ricui.
2. Jesusga ¿imarasha mas ali mandaj an?
Diospa Churi mas ali mandajmi an. Paiga llaquij, alira rajmi an (Mateo 11:28-30). Astaumbas tucui runaunara yanapangahua ushaira charinmi. Ahua pachamanda cai pachara mandasha ñucanchira yanapanga. Causarishca huasha Jesús ahua pachama rica. Yaya Dios ali maqui partima chapana aca mandanara apinagama (Hebreos 10:12, 13). Chi huasha, Yaya Diosga Jesusma mandanara cuca. Leapai Lucas 1:32, 33.
3. ¿Sapallachu Jesús mandanga?
Yaya Diosga ansalla runaunara ajllaca Jesushua ahua pachamanda mandanuchu nisha (Ricuchina [Apocalipsis] 5:10). Jesús Allpai ashcai, paita catijcunapuramanda huaquingunara apica apostolguna tucunuchu. Chi huasha paiguna ñaupa punda ajllashca anuca ahua pachamanda mandangaj. Shinallara cunan punzhagama tucui shunguhua casuj cariunara, huarmiunaras Jehová ajllaushca, Jesushua ahua pachamanda mandangaj. Paigunaga huañushca huasha ahua pachai causangahua causarinun. Leapai Juan 14:1-3; 1 Corintios 15:42-44.
¿Masnapura ahua pachama rinunga? Biblia ricuchinmi, ansahualla ahua pachama rinunga. Chiraigu Jesús paigunara nica, “ichilla muntun runauna” (Lucas 12:32). Allpara mandangahua 144.000 tupu ajllashcauna ahua pachama rinunga. Leapai Ricuchina (Apocalipsis) 14:1.
4. Jesús mandasha callarijpiga ¿imara tucuca?
Jesusga 1914 huatai mandai callarica. * Mandai callarishaga Satanasta, paihua supaigunaras ahua pachamanda Allpama shitaca. Satanasga Allpama shitashcaraigumanda piñarica. Chiraigu tucui runaunara llaquichiun (Ricuchina [Apocalipsis] 12:7-10, 12). Shinallara runauna causai mas shinzhi tucuca. Diospa Shimi rimaca, guerraguna, Allpa cuyunauna, ungüiguna, yarcais tiana ashcara. Diospa Shimi nishcauna pactarijpiga, Diospa Reino cai Allpara ñalla mandanara yachanchi. Leapai Lucas 21:7, 10, 11, 31.
5. Diospa Reino ¿imara raun?
Diospa Shimi rimanai intiru mundui “ashca atun muntun runaunara” Diospa Reino tandachiun. Ashca huaranga huaranga runauna Jesús mandashcara pactachisha, Diospa Reino partimanda tucunun. Paiguna quishpirinunga Diospa Reino manali mundura tucuchina huraspi. Diospa Reino shamushcai ali causanara apina munashaga, Jesús mandashcara pactachinami anchi. Leapai Ricuchina (Apocalipsis) 7:9, 14, 16, 17.
Diospa Reinoga huaranga huatai intiru Allpara alichinga, Dios munashca cuinta paraíso tucuchu. Chibi runauna cushi causanunga. Huaranga huata huasha Jesusga mandanara pai Yayama cutichinga (1 Corintios 15:24-26). Cai Reinomanda ¿pita cuintanara munangui? Leapai Ricuchina (Apocalipsis) 21:4.
^ par. 6 Chi 1914 huatamanda mas yachanara munashaga, ¿Imara Biblia yachachin? nishca libroi página 217-220 ricungui.
