Jehová ñucanchi Yayami an. Ñucanchira Ruraj asha pai tucuira yachan. Astaumbas ñucanchira cuirangaj, llaquingaj munan. Chiraigu ñucanchira mana rurashcachu paita mana iyarisha sapalla causangahua (Jeremías 10:23). Imasna huahuauna cuinta ministinun yaya cuirachu, shinallara tucui runauna Yaya Dios cuirachun ministinchi (Isaías 48:17, 18). Yaya Diosga runaunara llaquishcamandami, pai mandashca shimiunara quillcachica. Leapai 2 Timoteo 3:​16.

Dios mandashca shimiunaga ñucanchira yanapanmi cunan punzhai, shamuj punzhaunais ali causangahua. Yaya Dios ñucanchira rashcamanda paita casunami anchi. Leapai Hebreos 8:10; Ricuchina (Apocalipsis) 4:​11.

Bibliamanda iyaiguna yanapanmi imais ali rurangahua. Randi, Diospa leygunaga pasajtami riman ima ruranara, ima mana ruranaras (Rashcauna [Hechos] 15:29). Bibliamanda iyaiguna alira pactachingahua ali taripasha ricuna anchi (Efesios 5:15). Diospa Shimi yachachinmi, causaira ñucanchima Dios cuyashcami nisha. Causaira Yaya Dios cushcaraigu tarbanai, huasii, maita purinais ama llaqui charingahua alira riparasha, iyaihua purina anchi. Leapai Rashcauna (Hechos) 17:28.

Jesús ishqui atun mandashcaunamanda yachachicami. Ñaupa punda nica Yaya Diosta ricsisha paita llaquina, ali aduranas anguichi nisha. Cai mandashcara ñucanchi causaibi ima rangaraushcais pactachina anchi (Proverbios 3:6). Cai mandashcara pactachishami Diospa amigo tucushun. Shinallara cushira, huiñai causairas charishun. Leapai Mateo 22:36-​38.

Shinallara Jesús yachachicami, tucui runaunahua ali apanusha, parijulla causana ashcara (1 Corintios 13:​4-7). Cai yachachishcara pactachisha Yaya Dios cuinta tucui runaunara llaquishunmi. Leapai Mateo 7:​12; 22:39, 40.

Dios mandashca shimiuna ailluunara yanapan, parijulla llaquinusha causanuchu (Colosenses 3:​12-​14). Shinallara Diospa Shimi yachachinmi, casarashcauna huañungagama ishquindi causanuchu. Chita pactachishami ailluuna cushi causanunga. Leapai Marcos 10:7-9.

Dios mandashca shimiunara pactachishami cushi, ali causashun. Tarbanaunai ministinunmi, mana quilla, mana shuhuaj runa achu, Diospa Shimira pactachij runa achu (Proverbios 10:​4, 26; Hebreos 13:18). Biblia yachachinmi, ansahualla charishas cushi causashun. Charijyana randi, ñaupa punda Dios munashcara rurana anchi. Leapai Mateo 6:​24, 25, 33; 1 Timoteo 6:​8-​10.

Bibliaga ansahualla upina mana uchachu nishas, pasajtami mandan, ama machanguichu nisha (1 Timoteo 5:23; 1 Corintios 6:​10). Chita pactachishaga ungüira, huañuiras mana yangamanda tupashun (Proverbios 14:30; 22:24, 25; Romanos 13:13). Imasnami ricushcanchi, Diospa mandashcauna yanapanmi ñucanchi ruraigunara, iyairas alichu an nisha riparangahua (Salmo 119:97-​100). Jesusta ali catijcuna Dios mandashca shimiunara pactachinun, mana paiguna ali causangahua nishalla, astaun Jehová Diosta ahuayachingaj nisha. Leapai Mateo 5:​14-​16.