Biblia ña nicami, Jesús huañushca huasha, paita punda catijcunamandallara llulla yachachijcuna llucshinungami nisha. Diospa Shimira paiguna panda panda yachachisha callarinuca (Rashcauna [Hechos] 20:29, 30). Biblia nishcasna pactarishcami. Llulla runauna Jesús yachachishcara turcachinuca. Chimanda manali quirijcuna tiai callarinuca (2 Timoteo 4:3, 4). Chiraigumanda Bibliara imasna ñucanchi intindishcara ¿imarasha yachanchi ali ajta?

Jehová rimashca ricsichina punzha callarica. Jehová Dios rimacami, puchucai punzhaunai ñuca shimira ali yachanungami nisha (Daniel 12:4). Ansalla runauna 1870 huatai iglesia yachachishcauna Bibliai mana tiajta riparianuca. Chiraigu Biblia cierto nishcara mascai callarinuca. Chita rashcamanda Jehová Dios bendiciacami alira intindingahua.

Mansu runauna Bibliara alira yachanuca. Chi timpui Bibliamanda Yachaujcuna nishca, ñucanchi huauquiunaga, shu yachaira apisha, intiru Bibliai ricuj anuca ali intindinagama. Cunan shinallara ruraunchi. Chi huauquiuna mana intindihuajlla shimiunara leashaga, intiru Bibliallaira shuj shuj partii mascanuca. Chita rasha Bibliallara ali intindichichu saquinuca. Ali intindishca huasha quillcasha saquinuca. Chibi Diospa shutira ali ricsinuca. Diospa Mandanamandas yachanuca. Astaumbas runaunahua, cai munduhua ima tucuna ashcara intindinuca. Shinallara, huañushcaunamanda, causarinamandas intindinuca. Bibliara yachasha, panda yachachishcaunamanda, manali ruranamandas anzhurinuca (Juan 8:31, 32).

Biblia cierto yachachishcara intiru mundui ricsichina ashcara ali intindinuca. Chiraigu La Atalaya. Anunciando el Reino de Jehová nishca revistara 1879 huatamanda cunagama llucchiunchi. Cunan punzhaunai Diospa cierto Shimira 240 llactaunai, 750 yali shimiunais yachachiunchi. ¡Cunaga Diospa Shimi tucui partima pactashcami!

• Jesús huañushca huasha Diospa cierto shimihuaga ¿imara tucuca?

• Cierto shimira ¿ima rashara intindinuca?