Notaguna
1. ¿Imara an Atun Babilonia?
¿Imarasha ninchi “Atun Babilonia” nishca tucui panda religionguna ashcara? (Apocalipsis 17:5). Quinsa iyaigunara ricushun:
-
Panda religionguna intiru mundui tian. Biblia nin Atun Babilonia “intiuna, llactauna” ahuai tiarishcara shinallara “cai pacha rey apuunara mandaj” ajta nin (Apocalipsis 17:15, 18).
-
Mana anzhu ashca ushaira charij politicoguna o catujcunas. Biblia nin Babilonia tucuchishca ajpis “cai pachai tiaj rey apuuna”, “catujcuna” paiguna chara tianungami (Apocalipsis 18:9, 15).
-
Atun Babilonia Diospa shutira manali saquichinun. Atun Babilonia “tacarisiqui huarmi” cuinta ajta ricuchin. Pai gobiernogunahua pariju tarban cullquimanda shuj yanapaigunamandas (Apocalipsis 17:1, 2). Intiru mundui tiaj runaunara umachin, ashca runauna huañushcamanda culpayuj an (Apocalipsis 18:23, 24).
2. ¿Ima huras Mesías ricurina aca?
Biblia rimaca Mesías manara pactamushcallaira 69 semanaguna pasana ashcara (leai Daniel 9:25).
-
¿Ima huras 69 semanaguna callarica? Huata 455 Jesús manara pagarishcallaira callarica. Chi huatai Nehemías gobernador, Jerusalenma pactamuca llactara ‘alichingahua cutillara shayachingahuas’ (Daniel 9:25; Nehemías 2:1, 5-8).
-
¿Masna timpu duraca 69 semanaguna? Huaquin Bibliamanda profeciagunai shu punzha shu huatara ricuchin (Números 14:34; Ezequiel 4:6). Chiraigu 7 punzha o shu semana 7 huatauna an. Cai profeciamanda 69 semanaguna 483 huatauna an (69 x 7 multiplicai).
-
¿Ima huras 69 semanaguna tucurica? Jesús manara pagarishcallaira 455 huatamanda 483 huatauna sumajpi 29 huatama pactan. a Chi huatallaira Jesús bautisarisha Mesías tucuca (Lucas 3:1, 2, 21, 22).
3. Ñucanchi yahuarhua rurashca tratamientoguna
Huaquin tratamientogunara ruranai runa quiquin yahuarllara utilizanun, shinajpis Jesusta catijcuna mana tucui tratamientogunara chasquinchi. Yahuarda mana cunchi shujcuna utilizangaj shinallara ñucanchi quiquin yahuarda huacachingaj mana saquinchi ñucanchira operaushcai ñucanchi yahuarllara cuti churanuchu (Deuteronomio 15:23).
Shinajpis huaquin tratamientogunara chasquina ushanchichari. Por ejemplo: análisis de sangre, hemodiálisis, hemodilución nishcara apina ushanchichari. Shinallara doctorguna operaushcai shu maquinahua yahuar shuturishcara aisasha, pichasha cuti aichama churanun o máquina de circulación extracorpórea (o bomba de derivación cardiopulmonar) nishca yanapaihua operanun. Jesusta catij caran shuj ajllana an operacionda rurashcai yahuarda utilizana, mana utilizana shu tratamientora ruraushcais. Caran doctor caran tunu rurana ushan cai tunu tratamientogunara. Chiraigu shu operación, shu tratamiento ruranai Jesusta catijcuna alira yachana anun ima rurangaraushcara paihua quiquin yahuarhua. Catij tapuigunara tapuringui:
-
Shu tratamientoi ñuca aichamanda llucchishca yahuarda shu timpu shayachijpi ¿ñuca iyaibi ñucara saquihuangachu ñucamanda llucshishca yahuar ñucajmandallara asha catin? nisha, ¿chiraigu ‘allpama talingaj’ mana ministirinzhu? nisha (Deuteronomio 12:23, 24).
-
Ñuca aichamanda yahuar shuturishcara chi yahuarda alichisha ñuca aichamallara cuti churajpi o chi yahuarda ambi cuinta churajpi ¿Bibliamanda ñuca ali yachachishca iyai ñucara saquihuangachu cai tunu tratamientora chasquingaj o mana chasquingaj?
4. Llushpirina
Diospa Shimi mana rimanzhu cari huarmi llushpirinamanda shinallara nin llushpirijcuna mana cuti casarangaj ushanunzhu nisha (1 Corintios 7:10, 11). Shinajpis huaquin Diosta sirvijcuna llushpiringahua iyarinushca.
-
Cari aillura mana cuirana munajpi: Cari paihua aillura mana cuirangaj munasha aillu ministishcaras mana cun (1 Timoteo 5:8).
-
Yapajta macasha llaquichijpi: Yapajta macaj cari huarmi aichara causairas llaquichina huanchinas ushan (Gálatas 5:19-21).
-
Jehová Diosta sirvingaj arcan: Cari huarmi asha Jehová Diosta aduranuchu o pai mandashcaunara casunuchu mana saquin (Hechos 5:29).
5. Istauna
Diosta sirvijcuna Jehová chijnishca istaunai mana masarinchi. Jesusta catij caran shuj Biblia yachachishca iyaira catinunga caran timpui. Catij pasashcaunai iyari.
-
“Feliz Año Nuevo”, “Feliz Navidad” canda nijpi. “Pagarachu” nina ali anga. Chi runa can rimashcamanda mas yachana munajpi rimana ushangui imarasha chi istara mana rurangui.
-
Mana quirij cari huarmi shu istara ruraushcai shuj ailluhua micungaj richu cumbirajpi. Bibliamanda yachashca iyai canda richu saquijpi, chi istai panda religiongunahua ruraigunai masachina munanujpi ñaupajtara camba carira huarmira rimangui can mana rurangaraushcara nisha.
-
Camba jefe mas cullquira chi istamanda pagana munajpi. ¿Chasquina ushanguichu? Catij tapuigunai riparai. ¿Camba jefe istamanda cullquira cuna munanzhu? Randi ¿can ali tarbashcamandallachu pagarachuna munan?
-
Shu ista tiashcai canda shu cuyanara cujpi. Maicambi cuyaj runa rimanga: “Ña yachani can cai istara mana rurajta shinajpis caita cuyana munani”. Pai llaquij shungura ricuchingajlla munanma. Tapuri: ¿camba quirinara shu camanai churangajllachu caita ruranga? nisha. Cai tapuira iyarishca huasha can ajllangui caita chasquina, mana chasquina. Imaras ajllana munashcai ali iyaira charina munanchi Jehová Dioshuas chuyaj shungura ricuchingaj (Hechos 23:1).
6. Pasaj ungüiguna
Pasaj ungüira charishcara yachasha o chi ungüihua ungushcani nisha iyasha, shuj runaunara llaquishcamanda paigunama chi ungüira ama pasachingaj ashca cuirarina anchi. “Camba mayambi causajta can cuintallara llaquinami angui” mandashcara pactachingaj chita ruranchi (Romanos 13:8-10).
¿Imara rurana anchi cai mandashcara pactachingaj? Maicambas pasaj ungüira charisha, mana muchasha, mana ujllarisha, mana maquira cusha salurana an. Shinallara mana piñarina, mana llaquirina an maican runa paihua aillura cuirangahua, pasaj ungüira charishcamanda paihua huasima mana pasiachijpi. Manara bautisarishcallaira coordinador del cuerpo de ancianos huauquira pasaj ungüira charishcara cuintana an, casna rurasha shujcunara chi ungüira mana pasachisha bautisarina ushan. Casarangahua shu huauquira o panira manara ricsishcallaira pasachij ungüira charij runaunahua ashcashaga yahuarda llucchisha shu examenda rurana an. Biblia mandashcasna ‘mana quiquimbajllara ricungaj, astaumbas shinallara shujcunajtas’ (Filipenses 2:4).
7. Negocioguna juiciogunas
Ima negociora rasha o cullquira mañachisha imasna pagana ashcara shu quillcaibi quillcasha firmachina anchi, Jesusta catijcunapuras shinallara rurana anchi (Jeremías 32:9-12). Shinajpis huaquimbi Diosta sirvijcuna cullquimanda o ima negociomanda problemara charinungachari. Shina tucujpi ishquindipuralla mana piñanusha uctalla problemara alichina anchi.
Shinajpis ¿imasnara atun problema alichina anchi maicambas cullquira shuhuajpi o shujcunamanda manalira rimasha llullajpi? (Leai Mateo 18:15-17). Cai quinsa camachishcaunara Jesús catichi nica:
-
Problema charij runaunapuralla alichina anun (Mateo 18:15 ricui).
-
Problema mana alichirijpi congregacionmanda Diospi shinzhi quirij shu o ishqui huauquiunara yanapai mañana anun (Mateo 18:16 ricui).
-
Caigunara rurashca huashas problema mana alichirijpi shina tucujpilla ancianogunara cuintana anun (Mateo 18:17 ricui).
Imamandallas ñucanchi huauqui paniunara juiciogunama mana apana anchi, apashaga Jehovahua shutira manalira saquichishun, shuj runaunas congregacionmanda manalira rimanunga (1 Corintios 6:1-8). Shinajpis divorciaringahua, huahuauna yayahua o mamahua saquirinara yachangahua, yaya o mama paihua huahuamanda cullquira pasachingahua, imaibis llaqui pasashcamanda seguro pagachingahua, bancoibi cullqui illaj saquirishcara rimangahua o testamentogunamanda tribunalgunama rina ushanchi. Shu huauqui o pani juezgunahua ñaupai chi problemara mansu shunguhua alichinara munajpi, Biblia nishcara mana pactachinzhu nisha mana rimana anchi.
Shinallara shu huauqui o pani yachasha autoridadgunara cuintajpi, maicandas huajlichishcamanda, huahuaunara huajlichishcamanda, macashcamanda, ashca shuhuashcamanda, huanchishcamandas, Biblia nishcara mana pactachinzhu nisha mana rimana anchi.
a 455 a. e. c. huatamanda 1 a. e. c. huatagama 454 huatauna anmi. 1 a. e. c. huatamanda 1 e. c. huatagama sumajpi shu huata anmi, huata cero mana tiashcaraigu. Huasha 1 e. c. huatamanda 29 e. c. huatagama sumajpi 28 huatauna anmi. Cai numerogunara 454 + 1 + 28 sumajpi 483 huatauna tucun.
