Biblia ricuchin imarasha Yaya Dios sirtu tiashcara quirina ushanchi. Astaumbas, Dios tiashcara quiringaj religionguna ricsishca yachachishcaunara quirina randimanda ñucanchi “iyaihua” intindina anchi ima sirtu ashcara (1 Juan 5:20; Romanos 12:1). Ricushunchi imasna Biblia ricuchin Yaya Dios sirtu tiashcara.

•   Ahua pachai, cai Allpai tucui tiajcuna ricuchin imarasha quirina ushanchi shuj Ruraj Dios tiashcara. Biblia nin: “Tucui huasi shuj runa rashcami astaun tucuira raj Diosmi” (Hebreos 3:4). Cai rimashca shimiuna intindihuajlla ajpis ashca estudiaj runaunara yanapashca Yaya Dios sirtu tiashcara quiringaj. a

•   Tucui runauna intindingaj ministinchi ima rangaj causanchi, caita mana intindisha causaiga llaqui, mana imajpas sirvishca cuinta tucun. Caita ricuchin causangaj mana ministishca cosasgunallara charina ministinchi, astaun Biblia nin “almai pugri anchi” nishca sintishcara charinchi, caita ricuchinmi tucuiguna Diosta quiringaj, adurangaj ministishcahua rurashca anchi (Mateo 5:3; Apocalipsis 4:11). Cai ministishcara riparachin shu Llaquij Dios tiashcara, pai ñucanchira rurashca ñucanchi tucui ministishcaunara charisha cushi causangaj (Mateo 4:4).

•   Bibliai tiaj profeciaguna ashca huatauna quillcashca huasha tucuibi pactarinuca. Cai tucuibi pactachishcara ricuchin mana runa iyaigunamanda shamushcara (2 Pedro 1:21).

•   Bibliara quillcajcuna paiguna causaushca timpui ciencia intindishcaunamanda mas alira yachanuca. Ñaupa timpui causaj runauna quirij anuca cai Allpa shu elefante, jabalí, huagra shuj animal ahuai tiashcara. Chi randimanda Biblia nin “allpara mana imais huarcuchiunzhu” (Job 26:7). Astaumbas, Biblia cai Allpa imasna ashcara intindingaj nin shu “muyu” cuinta ashcara (Isaías 40:22). Ashca runauna quirinun Bibliara quillcaj runauna caimanda quillcana ushanuca Yaya Dios paigunara quillcachishcamanda.

•   Yaya Diospi mana quirijcuna tapurishcaunara Biblia cutipanmi. Maicanguna tapurinun: Yaya Dios ali, tucui ushaj ashas, ¿imarasha manalira, turmindusgunara tiachu saquin? ¿Imarasha religionguna ashca turmindusgunara apamunun? (Tito 1:16). Cai tunu tapuigunamanda Biblia cutipashcauna yanapana ushan Yaya Dios tiashcara quiringaj.