MALTAUNA TAPURINUN
¿Imara ricuchini ñuca churarishca churanahua?
¿Imarasha churanara ali ajllana valishca an? Churarishca churana can imasna ashcara ricuchishcamanda. Shinajpi ¿camba churarinara ricusha shujcuna canmanda imara iyanun?
Mushuj llucchishca churanaunara churarinamanda quinsa pandaigunai mana urmangaj ¿imara rurana ushangui?
1. Pandai: Propagandagunai ricurij churanaunara churarina angui.
Theresa shutiyuj malta huarmi nin: “Maican cosasgunamanda shu propagandara ashca cuti ricusha, munangaj callaringui. Runauna shu tunu churarishca churanara ashca cuti ricusha, paiguna cuinta churaringaj munangui”.
Propagandagunaga mana malta huarmiunajlla an. Una guía completa para criar chicos adolescentes nishca libro nin: “Malta cariunas mushuj llucchishca churanaunara churarina munanun [...]. Catujcuna yachanun huahuamanda pacha propangandagunai ricuchishcara ashca cuti ricusha, randingaj munanun”.
Caita rurai. Biblia nin: “Mana yachaj runa tucuira quirin, randi iyaiyuj runa alira riparasha purin” (Proverbios 14:15). Chiraigu iyari, imara propagandagunai ricuchina munanun. Propagandagunai dai, pullu churanaunara ricusha, tapuri:
“¿Pita valiringa ñuca cai churanaunara churarijpi?”
“¿Cai churanaunara churarijpi shuj runauna ñucamanda imara iyanunga?”
“¿Ñuca churarishca churana ricuchinzhu pi ashcara, ima quirishcara?”
Shuj camachina. Intiru semanai cai tunu churanaunara propagandagunai ricusha, tapuri: ¿Ima tunu causai charishcara ricuchingaj cai churanaunara catunun? ¿Canda quirichinunzhu chi tunu churarinara churarina angui? nisha. Karen shutiyuj malta huarmi nin: “Maltauna ashca munanchi ali churaringaj, sumaj ashcara ricuchingaj. Catujcuna chita yachashcamanda maltaunara ashca tintanun randinuchu”.
2. Pandai: Mushuj llucchishca churanaunara churarina angui shuj maltaunahua ali saquiringajlla.
Manuel shutiyuj malta nin: “Mushuj churanara llucchijpi tucuiguna churarinun. Chi churanaunara mana churarijpi canmanda burlarinun”. Ana shutiyuj malta shinallara nin: “Mushuj llucchishca churanaunara churaringaj munanchi ñucanchi amigogunahua ali saquiringaj”.
Caita rurai. Biblia nin: “Cai mundu causana samira ama catirichichu” (Romanos 12:2). Cai camachishca casushcara yachangaj, camba charishca churanaunara ricusha tapuri:
“¿Maican churanara churaringaj ajllaushcai imai iyarini?”
“¿Valij churanaunara churarina ñucaj ashca valishcachu an?”
“¿Ñuca churarishca tunuhua ricuchina munanichu sumaj ashcara?”
Shuj camachina. Cuna timpui ashca maltauna quirinun shuj runauna ñaupai sumaj ricuringajlla, mushuj llucchishca churanaunara churarina ministishca ashcara. Shinajpi, shujcuna canmanda ima iyashcara valichina randimanda can imasna ashcara sirtu valichisha ali sintiringui.
3. Pandai: Mas dai, pullu churanaunara churarisha alimi ricuringui.
Jennifer shutiyuj malta huarmi nin: “Sirtu pacha maicambi munarini dai, pullu churanaunara churaringaj”.
Caita rurai. Biblia nin: “Canguna sumajyarina ama canzhallara achu, […] astaumbas canguna sumajyarina ucuma achu, shungüi” (1 Pedro 3:3, 4). Cai camachishcara catisha, iyari ima mas valishca an: shujcuna ñaupai sumaj ricurina o shu ali shungu runa ana.
Shuj camachina. Ali shungu ana mas valishca an. Cuna punzhaunai ashca runauna mana shina anun, chimanda caita iyai:
¿Maican huras paimandalla rimaj runahua cuintarishcanguichu? Cai runa mana riparan chita rurajpi shujcuna paimanda caruyana munanun. Shinallara tucuna ushan dai, pullu churanaunara churarijpi.
Canmandallara cuintajpi runauna canmanda caruyana munanunga, shinallara tucun canda ricungajlla churarinaunara churarijpi.
Shina churarisha ricuchingui shujcuna canda ricunuchu munangui. Runauna iyanunga can mana yachangui ima munashcara, ahuayarishca ashcaras, astaumbas iyanunga can yapa turbarishca angui shujcuna ñaupai sumaj ricuringaj.
Runauna canmanda manali iyarinuchu ali churanaunara churari. Mónica shutiyuj malta nin: “Ali quillparisha churarina mana nisha ninzhu camba rucu mama cuinta churarina ashcara. Maspas ali churarisha canllara shujcunaras respetaj ashcara ricuchingui”.
Cai temagunaras leana munanguichari
IMARA IYANUN SHUJ MALTAUNA
Imara iyanun shuj maltauna: Imasna ricuringui
¿Imarasha maltauna yapajta turbarinun paiguna quiquinllara ricurinamanda? ¿Imara yanapana ushan?
